ەلىمىزدە شەتەلدىك جوعارى وقۋ ورىندارى, الەمدىك دەڭگەيدەگى ۋنيۆەرسيتەتتەردىڭ فيليالدارى كوپتەپ اشىلىپ جاتىر. بۇل ءۇردىس جوعارى ءبىلىمنىڭ ساپاسىن ارتتىرۋ ماقساتىندا قولعا الىنعان ەدى. عىلىم جانە جوعارى ءبىلىم مينيسترلىگى جاقىندا تاعى ءبىر جاڭا زەرتتەۋ ۋنيۆەرسيتەتىنىڭ قۇرىلعانىن حابارلادى.
سالالىق مينيسترلىكتىڭ حابارلاۋىنشا, 2024 جىلدىڭ 14 تامىزىندا عىلىم جانە جوعارى ءبىلىم مينيسترلىگى مەن Cardiff University اراسىندا استانا قالاسىندا حالىقارالىق دەڭگەيدەگى زەرتتەۋ ۋنيۆەرسيتەتىن قۇرۋ تۋرالى مەموراندۋمعا قول قويىلدى. كارديفف ۋنيۆەرسيتەتىمەن ىنتىماقتاستىق – جوعارى ءبىلىمدى ترانسفورماتسيالاۋعا, ساپالى ءبىلىم بەرۋدى دامىتۋعا جانە ەلدىڭ زەرتتەۋ الەۋەتىن كۇشەيتۋگە باعىتتالعان ماڭىزدى قادامداردىڭ ءبىرى. كەلىسسوزگە سايكەس, اتالعان شەتەلدىك جوعارى وقۋ ورنى جوبانىڭ نەگىزگى سەرىكتەسى رەتىندە قاتىسادى. كارديفف ۋنيۆەرسيتەتىنىڭ حالىقارالىق ىنتىماقتاستىق جونىندەگى ۆيتسە-كانتسلەرى, پروفەسسور رۋدولف اللەماننىڭ ايتۋىنشا, بۇل بايلانىس قازاقستان مەن ۇلىبريتانيا اراسىنداعى جوعارى ءبىلىم سالاسىنداعى قارىم-قاتىناستى جاقىنداتادى. جوبانى جۇزەگە اسىرۋ ءۇشىن استانا قالاسىنىڭ اكىمدىگى 10 گا جەر ءبولدى. جوبانى قولدايتىن «Qualified Centre of Education Public Foundation» وتاندىق ينۆەستورى ۋنيۆەرسيتەت عيماراتى مەن قاجەتتى ينفراقۇرىلىم سالۋدى قامتاماسىز ەتەدى.
مينيستر س.نۇربەك پەن ۆيتسە-كانتسلەر, پروفەسسور ۆەندي لەرنەر جانە دەپارتامەنت ديرەكتورلارى اراسىنداعى كەزدەسۋدە كارديفف ۋنيۆەرسيتەتىنىڭ ينجەنەريا, جاساندى ينتەللەكت, تۇراقتى دامۋ, مەديتسينا جانە بيوتەحنولوگيا سياقتى نەگىزگى باعىتتار بويىنشا ءبىلىم باعدارلامالارى مەن زەرتتەۋ تەحنولوگيالارىن جۇزەگە اسىرۋ جونىندە كەلىسىمگە قول جەتكىزىلدى. جاڭا ۋنيۆەرسيتەتكە ستۋدەنتتەردى قابىلداۋ 2025 جىلدىڭ قىركۇيەك ايىنا جوسپارلانىپ وتىر.
مينيسترلىك تاراتقان اقپاراتىنا سۇيەنسەك, Cardiff University 1883 جىلى قۇرىلعان, الەمگە تانىمال اكادەميالىق جانە عىلىمي الەۋەتكە يە. ۋنيۆەرسيتەت ۇلىبريتانيانىڭ ەڭ ۇزدىك 25 وقۋ ورنىنىڭ قاتارىنا كىرەدى, سونداي-اق ۇلىبريتانيانىڭ جەتەكشى زەرتتەۋ ۋنيۆەرسيتەتتەرىن بىرىكتىرەتىن بەدەلدى «RussellGroup» توبىنىڭ مۇشەسى سانالادى. وقۋ ورنى مەديتسينا, بيولوگيا, ينجەنەريا جانە الەۋمەتتىك عىلىمدار سياقتى باعىتتاردا جەتەكشى ۋنيۆەرسيتەت رەتىندە بەلگىلى. اسىرەسە ونكولوگيا, كارديولوگيا جانە يننوۆاتسيالىق تەحنولوگيالار سالاسىنداعى زەرتتەۋلەر ەرەكشە ورىن الادى. كارديفف ۋنيۆەرسيتەتىن تانىمال تۇلعالار, سونىڭ ىشىندە مەديتسينا سالاسىنداعى نوبەل سىيلىعىنىڭ لاۋرەاتى, پروفەسسور سەر مارتين ەۆانس, حيميا سالاسىنداعى نوبەل سىيلىعىنىڭ لاۋرەاتى پروفەسسور روبەرت حۋبەر, ۇلىبريتانيانىڭ لەيبوريستىك پارتياسىنىڭ بۇرىنعى كوشباسشىسى جانە ەۋروپالىق كوميسسيانىڭ ۆيتسە-پرەزيدەنتى نيل كيننوك, سونداي-اق BBC جاڭالىقتار جۇرگىزۋشىسى حيۋ ەدۆاردس تامامداعان.