25 تامىز كۇنى ساعات 17: 40 شاماسىندا كاسپي تەڭىزىنىڭ «سولدات» جاعاجايى اۋماعىندا 18 جاستاعى جىگىت سۋعا باتىپ كەتكەن ەدى, دەپ جازادى Egemen.kz.
ماڭعىستاۋ وبلىسىنىڭ تۇرعىنى ءجۇزۋ ايماعىنان تىس جەردە, جاعالاۋدان 300-400 مەتر قاشىقتىقتا سۋعا سەكىرگەن. 2006 جىلى تۋعان جىگىت سۇڭگىگەن جەردە سۋ تەرەڭدىگى 3-4 مەتردى قۇراعان.
وبلىستىق توتەنشە جاعدايلار دەپارتامەنتى ونىڭ دەنەسى بۇگىن تاڭعى ساعات 7: 50 شاماسىندا تابىلعانىن ءمالىم ەتتى.
«ىزدەستىرۋ-قۇتقارۋ جۇمىسى بارىسىندا «سولدات» جاعاجايى اۋماعىندا جاعالاۋدان 300 مەتر قاشىقتىقتا, ەكى مەتر تەرەڭدىكتەگى سۋدان جاس جىگىتتىڭ ءمايىتى تابىلىپ, شىعارىلدى», دەلىنگەن وبلىستىق تجد حابارلاماسىندا.