اتىراۋدا جايىق وزەنىنە شومىلۋعا بارىپ, باتىپ كەتكەن 14 جاستاعى ءجاسوسپىرىمدى ىزدەۋ جۇمىستارى ەكىنشى كۇننەن بەرى جۇرگىزىلىپ كەلەدى, دەپ حابارلايدى Egemen.kz وبلىستىق توتەنشە جاعدايلار دەپارتامەنتىنە سىلتەمە جاساپ.
قايعىلى وقيعا تۋرالى حابارلاما كەزەكشى پۋنكتكە 22 تامىزعا قاراعان ءتۇنى كەلىپ تۇسكەن. وقيعا اتىراۋ قالاسىنىڭ ىرگەسىندەگى اقجار اۋىلىندا بولعان.
ء«جاسوسپىرىمنىڭ بەلگىسىز جەردە شومىلعانى قايعىلى وقيعاعا الىپ كەلدى. وقيعا تۋرالى قوڭىراۋ تۇنگى ساعات 01:40-تا تۇسكەن, سودان كەيىن بىردەن وقيعا ورنىنا سۇڭگۋىرلەر جىبەرىلىپ, تاڭ اتقانشا بالانى ىزدەگەنىمەن, ىزدەۋ جۇمىستارى ناتيجە بەرمەگەن. تاڭەرتەڭ تاڭعى ساعات 6:30-دا ىزدەۋ جۇمىستارىنا 16 قۇتقارۋشى, ءتورت تەحنيكا مەن ءتورت قايىق قوسىلدى. قازىرگى ۋاقىتتا ىزدەۋ جۇمىستارى جالعاسىپ جاتىر», دەپ حابارلادى تجد.
توتەنشە جاعدايلار دەپارتامەنتىنىڭ وكىلدەرى وبلىس تۇرعىندارىنا سۋداعى قاۋىپسىزدىك ەرەجەلەرىن ساقتاپ, بەلگىلەنبەگەن جەرلەردە سۋعا تۇسپەۋدى ەسكەرتەدى. قۇتقارۋشىلار اتا-انالاردى بالالارىن ءجىتى باقىلاۋعا, سۋ ماڭىندا قاراۋسىز قالدىرماۋعا شاقىرادى.
ەسكە سالايىق, كەشە اتىراۋدا سۋعا باتىپ كەتكەن بالانىڭ ىزدەستىرىلىپ جاتقانىن حابارلاعان ەدىك.