پرەزيدەنتتىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا بەرىلگەن تاپسىرماسىن ورىنداۋ ماقساتىندا ۇكىمەت جول ينفراقۇرىلىمىن جاقسارتۋ جونىندەگى اۋقىمدى مەملەكەتتىك باعدارلامانى ىسكە اسىرىپ جاتىر, دەپ حابارلايدى Egemen.kz.
ايتا كەتەيىك, 2024 جىلى جول-قۇرىلىس جۇمىستارىنىڭ كولەمى رەكوردتى 12 مىڭ شاقىرىمعا جەتكەن. ونىڭ 8 مىڭ شاقىرىمى ەلىمىزدىڭ وڭىرلەرىن بايلانىستىراتىن ستراتەگيالىق ماڭىزى بار كولىك كۇرە جولدارىن قامتاماسىز ەتەتىن رەسپۋبليكالىق جولداردى قۇرايدى. قالعان 4 مىڭ شاقىرىمى – جەرگىلىكتى ماڭىزى بار جولدار.
سونىمەن قاتار بيىل جىل سوڭىنا دەيىن 7 مىڭ شاقىرىم جولدىڭ قۇرىلىسى, رەكونسترۋكتسياسى جانە جوندەۋ جۇمىستارى اياقتالىپ, پايدالانۋعا بەرىلەدى دەپ جوسپارلانعان.
«بۇگىنگى تاڭدا, مىسالى, «قاراعاندى – الماتى», «تالدىقورعان – وسكەمەن» جانە «اقتوبە – اتىراۋ – استراحان» سياقتى ءىرى كولىك كۇرە جولدارىن رەكونسترۋكتسيالاۋ جۇمىستارى اياقتالادى. بۇل جوبالار جول ءجۇرۋ ۋاقىتىن قىسقارتادى, كولىك شىعىندارىن ازايتادى ءارى جول قاۋىپسىزدىگىن ارتتىرادى. اتالعان جوبالاردىڭ جالپى ۇزىندىعى – 2 مىڭ شاقىرىم», دەپ حابارلادى ۇكىمەتتىڭ ءباسپاسوز قىزمەتى.
ۆەدومستۆو مالىمەتىنشە, تۇركىستان وبلىسىندا ۇزىندىعى 840 مەتر بولاتىن شاقپاق بابا اسۋىندا تۋننەل قۇرىلىسى اياقتالۋعا جاقىن قالعان. قۇرىلىس ايماق ءۇشىن ۇلكەن ماڭىزعا يە, ويتكەنى اسۋ «باتىس ەۋروپا – باتىس قىتاي» كولىك ءدالىزىنىڭ كۇردەلى بولىگى بولىپ سانالادى. بۇگىندە بەتون مەن اسفالت توسەلىپ, نەگىزگى قۇرىلىس جۇمىستارى اياقتالعان. سونىمەن قاتار بەينەباقىلاۋ جۇيەلەرىن, جەلدەتۋ جانە ورتكە قارسى جابدىقتاردى ورناتۋ بويىنشا ىسكە قوسۋ-رەتتەۋ جۇمىسى قارقىندى جۇرگىزىلىپ جاتقانى بەلگىلى بولدى.
«كولىك ينفراقۇرىلىمىن دامىتۋداعى تاعى ءبىر ماڭىزدى وبەكت – الماتى وبلىسىنداعى شامالعان ستانساسىندا اۆتوموبيل جولى وتپەسىنىڭ سالىنۋى. وتكەلدىڭ اشىلۋى اۆتوكولىكتەردىڭ تەمىر جولداردان قاۋىپسىز ءارى كەدەرگىسىز ءوتۋىن قامتاماسىز ەتۋى ءتيىس», دەلىنگەن حابارلامادا.
سونىمەن قاتار قازاقستاننىڭ شىعىسىندا ۇزىندىعى 1 316 مەتر بۇقتىرما سۋ قويماسى ارقىلى وتەتىن كوپىر وتكەلىنىڭ قۇرىلىسى اياقتالۋعا جاقىن. بۇل كوپىر ءوڭىر ءۇشىن ستراتەگيالىق ماڭىزعا يە, ويتكەنى بۇرىن شالعاي اۋدانداردىڭ تۇرعىندارى پاروم وتكەلىن پايدالانۋعا ءماجبۇر بولعان.
سونداي-اق ەلىمىزدىڭ وڭتۇستىك جانە ورتالىق وڭىرلەرىن بايلانىستىراتىن «قىزىلوردا – جەزقازعان» اۆتوجولىن رەكونسترۋكتسيالاۋ جۇمىسى باستالعان. ودان بولەك, «جەزقازعان – پەتروپاۆل», «قاندىاعاش – شالقار – ىرعىز», «قاراعاندى – اياگوز – بوعاس» جانە «سەمەي – بارناۋل» جولدارى ورتاشا جوندەۋدەن وتەتىنى حابارلاندى.