تاتۋلىق, بىرلىك, كەلىسىم – اسىل باقىت ەل ءۇشىن

بۇگىن, سايلاۋ اتتى جالپىۇلتتىق «جيىندا» قازاقستان حالقى كوپجىلدىق كەلەشەگىن, كەلەسى زاڭعار بەلەستەرىن ايقىندايتىن ءتۇيىن جاسادى. ول ءتۇيىن-تاڭداۋ – تابىسى تولايىم, بەتالىسى ورايلى نازارباەۆتىڭ «نۇرلى جولىمەن» تاعى دا تولىق ۇندەستىك تاۋىپ وتىر. مەنى تاڭداندىرعانى ءارى ءتانتى قىلعانى سول, تاڭەرتەڭ, ساعات 6-دا سىرتقا شىققانىمدا, ۇلتتىق اكادەميالىق كىتاپحاناداعى, سونىمەن قوسا, №66-شى مەكتەپتەگى سايلاۋ ۋچاسكەلەرى الدىندا قاراقۇرىم حالىق جينالىپ قالىپتى. داۋىس بەرۋ ءراسىمىنىڭ تەك 7-دە باستالاتىندىعىنا قاراماستان, ءتىپتى تاياققا سۇيەنگەن قاريالارى جانە باسقا دا ادامدار بار, ەندىگى ۇزىن كەزەك تۇزگەن ەكەن. قازاقستان حالقىنىڭ ءوزىنىڭ ازاماتتىق ۇستانىمىن بىلدىرۋدە سونشالىقتى بەلسەندىلىك تانىتۋى مەنى ءبىر قۋانتىپ تاستادى. ءبىز وسى سايلاۋ الدىندا كانديدات ن.نازارباەۆتىڭ رەسپۋبليكالىق قوعامدىق شتابىمەن بىرگە ءارتۇرلى وڭىرلەردى, اۋىل-ايماقتى ارالاعانبىز. سوندا حالقىمىزدىڭ نۇرسۇلتان نازارباەۆتى قۋاتتاپ-قولدايتىنىنا, ەل باسشىلىعىندا تەك وسى تۇلعانى عانا كورۋگە قۇشتارلىعىنا ابدەن كوز جەتكىزدىك. قازاق ەلى – تاعدىرى تاريحتىڭ ءتۇپ-تەرەڭىنەن باستاۋ الاتىن ابىز حالىق. ول ەشقاشان ونەگەلى تاريحىن ۇمىتقان ەمەس. وسىدان 25 جىل بۇرىن ءبىز كىم ەدىك؟ كەڭەس وداعىنىڭ رەسپۋبليكالارى ىشىندەگى سوڭعى ورىندا تۇرعان, دامۋى كەنجە قالعان, كوش سوڭىندا سالپاقتاعان ەل ەدىك. سوناۋ مىڭجىلدىقتار توعىسىندا, كەڭەس وداعى كۇيرەپ جاتقان تاريحي سىن كەزەڭدە-اق حالقىمىز ەل تىزگىنىن نۇرسۇلتان نازارباەۆقا سەنىپ تاپسىرعان-تىن. ناتيجەسىندە, ونىڭ باسشىلىعىمەن قازاق ەلى تالاي اسقار اسۋلاردان استى. وسى جولداعى تالاي «تار جول, تايعاق كەشۋلەردەن» ەلباسى ەلدى ابىرويمەن شىعارىپ, ۇدەمەلى دامۋعا جول تابا ءبىلدى! ءسويتىپ, كەنجە قالعان جۇرتىن قۋاتتى, ۇرپاعىن ساۋاتتى, كەلەشەگىن تاتۋ-ءتاتتى كۇنگە جەتكىزدى. بۇل تۋعان ەلدىڭ – تاعدىر الدىنداعى, ال, ەلباسىنىڭ – تاريح الدىنداعى تۇعىرلى جەڭىسى, ۇلى ماقتانىشى بولاتىن. ال بۇگىن ءبىزدىڭ الدىمىزدان تاعى دا تاريحي دا تاعدىرلى تاڭداۋ جاساۋ ءساتى تۋعان ەدى. حالىقتىڭ قالاۋى – نازارباەۆ بولدى. قازاقستاندىقتاردىڭ قازاقستان كوشباسشىسىنا كورسەتكەن ءبىراۋىزدى قولداۋىن كيەسى كۇشتى ەلىمىزدىڭ دانالىعى دارا ەلباسىنا جانە ونىڭ الداعى قادام-قيمىلدارىنا دەگەن «اق باتاسى» رەتىندە قابىلداۋعا دا بولادى. بۇل تاتۋلىق پەن تۇراقتىلىقتى تۋ ەتكەن, الەمگە بەيبىتشىلىك پەن كەلىسىم نۇرىن تاراتقان قازاق ەلىنىڭ جەڭىسى! ءار ەلدىڭ وزىندىك دەموكراتيالىق دامۋ جولىنىڭ بولاتىنى راس. قازاقستان دا حالىقارالىق قاۋىمداستىقتىڭ جانە جاھاندىق قۇقىقتىق ءتارتىپتىڭ ءبىر مۇشەسى رەتىندە تاۋەلسىزدىك جاريا­لاعان كۇننەن باستاپ, ءادىل دە ادال, حالىقارالىق ۇيىمدار اشىق دەپ باعالاعان سايلاۋ وتكىزىپ كەلە جاتىر. ازاماتتارىمىزدىڭ ءوزىنىڭ داۋىس بەرۋ قۇقىعى مەن مۇمكىندىگىن تولىققاندى پايدالانۋىنا بارلىق جاعدايلار, تەتىكتەر جاسالعان. ءبىز مەملەكەت باسشىسىنىڭ الدا قانداي ۇلى ىستەردى قولعا الاتىنىن بىلەمىز. ول – «5 حالىقتىق رەفورما» دەپ اتالادى. ال, بۇل رەفورمالاردىڭ تۇعىر-ۇستىنىن قۇراۋشى, «ءماڭ­گىلىك ەل» يدەياسى ارقاۋىنداعى جۇمىل­دىرۋشى قۇندىلىقتار – ازاماتتىق تەڭدىك, ەڭبەكسۇيگىشتىك, ادالدىق, وقىمىستىلىق پەن ءبىلىمدى قاستەر تۇتۋ, زايىرلى ەل – تاعاتتىلىق ەلى بولماق. ءبىزدىڭ بۇگىنگى جالپىۇلتتىق تاڭداۋىمىز ءۇشىن كەيىنگى ۇرپاق ءالى-اق العىسىن ايتار. ويتكەنى, ول كەلەشەككە كەمەل قازاقستاندى تابىس­تاۋدى كوزدەيدى. ءبىز ءبىرتۋار, بىرەگەي كوشباسىمىزبەن بىرگە الەمدەگى ەڭ دامىعان وتىز ەلدىڭ ساپىنا ەركىن قوسىلاتىن بولامىز. قازاقستاننىڭ مارتەبەسى زور, ىرىسى مول بولارىنا سەنىمدىمىن! ەلباسىنا داۋىس بەردىم مەن بۇگىن! تەڭسەلتپەگەن تاۋەلسىزدىك تەڭدىگىن. ماڭگىلىككە, «ماڭگى ەلگە» باستاعان, «نۇرلى جولمەن» ەگەمەندى ەلدىگىن.   ەلباسىنا داۋىس بەرۋ ەلگە سىن, بەيبىت كۇندە انا بەسىك تەربەسىن. وقتىڭ داۋسى نە ەكەنىن بىلەم مەن, وق پەن وتتىڭ ورتاسىنان كەلگەسىن.   ەلباسىنا داۋىس بەردىم, نەگە مەن؟! شاڭىراعىم – التىن, كۇمىس كەرەگەم, ەلباسىنىڭ ەڭبەگى دەپ تانيمىن, بۇگىنگى تاڭ, قازاقستان – ەگەمەن!   ەلباسىنا داۋىس بەردىم, سەبەبى, كوشباسشىمىز كوش باستاعان ورەلى. كىم نىعايتسا تاۋەلسىزدىك ىرگەسىن, حالقى ماڭگى سوعان عانا سەنەدى, سوعان داۋىس بەرەدى! باقىتبەك سماعۇل, پارلامەنت ءماجىلىسىنىڭ دەپۋتاتى, اۋعان سوعىسى ارداگەرلەرى ۇيىمدارىنىڭ «قازاقستان ارداگەرلەرى» قاۋىمداستىعىنىڭ توراعاسى.