سۋرەتشى كەيدە تابيعات پەن ادام اراسىنداعى ەلشى سەكىلدى. جۇرەك ءلۇپىلى قىلقالامىنان تامعان ءار بوياۋدان سەزىلىپ تۇرسا عانا سۋرەتشىنىڭ ءومىرى مەن شىعارماشىلىعى ءبىرتۇتاس الەمگە اينالعانى.
جانىمەن جازاتىن شەبەر تاڭسىق جەمىستەر, ادەمى گۇل شوقتارى, گۇل تىزبەكتەرى, كۇلتەلەنگەن ماتالار, ءپىشىنى اشەكەيلى سەبەتتەر, تاۋىس قاۋىرسىندارى مەن اسەم ىدىستاردى بەينەلەگەندە, جان بىتىرگەندەي اسەرگە قالدىرادى. سالتانات سادىبەكوۆا تابيعات سۇلۋلىعىن جىرلاي وتىرىپ, تابيعي ورتاداعى ءومىردى انىق ءارى نانىمدى بەدەرلەۋگە تىرىسادى. تابيعاتتىڭ ءتۇسى مەن تىلسىم بوياۋلارىن تالعامپازدىقپەن سەزىنەدى. ونىڭ شىعارمالارىنا سەرگەكتىكپەن قاتار, كولوريتتىڭ قانىقتىعى ءتان.
كەنەپتەگى ومبى قارعا شومىلعان بيىك قاراعايلار, كىشكەنتاي تەرەزەلەرى جارقىراعان الاسا ۇيلەر, كۇن شاپاعىنا بولەنگەن اۋىل كەشى, ىلە الاتاۋى جوتالارىنىڭ ماڭعاز كورىنىسى جۇرەككە جىلى تيەدى. ونىڭ قولتاڭباسىنا ءتان باستى ەرەكشەلىك – جارقىن دا قانىق پاليترا, ومىرگە قۇشتارلىق ءھام پوزيتيۆ. مي كەمىرگەن مىڭ سان ويدىڭ جاۋابىن اعاشتاردان, گۇلدەردەن, جەمىستەردەن, اسپانداعى بۇلتتاردىڭ عاجاپ قۇبىلىسىنان ىزدەيتىن سۋرەتشى مۇڭنىڭ ءوزىن سۇلۋلىق ارقىلى بەرەدى.
كەيىپكەرىمىز ونەرگە العاش قادام باسقاندا يمپرەسسيونيست سۋرەتشىلەرگە ايرىقشا قىزىعۋشىلىق تانىتقان. ءوزىنىڭ سۇيىكتى سۋرەتشىلەرى سياقتى, ول دا ۇنەمى ەكسپەريمەنت جاسايدى. تازا بوياۋلاردى تۇتىكتەن تىكەلەي كەنەپكە سىعىپ, تۋىندىسىن يمپرەسسيونيستەرشە ۇساق بوياۋلارمەن اياقتايدى, كەيدە قاراما-قارسى ءتۇرلى ءتۇستى كولەڭكەلەر جاساۋ ءۇشىن قارا ءتۇستى نەمەسە قويۋ كوك كوبالتتى پايدالانادى. فرانتسۋز جانە ورىس پوست-يمپرەسسيونيست جانە اۆانگارد سۋرەتشىلەرىنىڭ پولەميكالىق جۇمىستارىنا دا نازار اۋدارادى. ونىڭ تۋىندىسىندا وزىنە ءتان قاراما-قارسى تۇستەر, جەڭىل گەومەتريالىق پىشىندەر بىرنەشە كوزقاراستىڭ ۇيلەسىمى كورىنەدى.
ونەرتانۋشى ماريا كوپەليوۆيچ «سالتانات ءۇشىن جالپىادامزاتتىق ماسەلەلەرگە, مىندەتتەرگە جانە ولاردى شەشۋ مۇمكىندىكتەرىنە كوڭىل ءبولۋ وزەكتى» دەي كەلە, سادىبەكوۆانىڭ قولتاڭباسى حاقىندا ءوز ويىن ورتاعا سالدى.
«بۇگىنگى تاڭدا سادىبەكوۆا مادەني ومىرىمىزگە بەرىك ەنگەن «ساندىك كەسكىندەمە» ستيلىندە جۇمىس ىستەيدى. دەكوراتيۆتىلىك كوركەم شىعارمانىڭ كوركەمدىك ديزاينىن تولىقتىرا وتىرىپ, تالعامپازدىعىمەن, ساندىك فورماسىمەن, بولشەكتەردى مۇقيات وڭدەۋىمەن ەرەكشەلەنەتىن ونەر تۋىندىلارىنىڭ ساپاسى. سۋرەتشى ءتۇستى تۋىندىنىڭ ءوزىن-ءوزى باسقاراتىن وبەكتىسى رەتىندە تۇسىندىرەدى. سونىمەن قاتار ول ءتۇس پەن سىزىق, پاندىك ءپىشىن جانە ۇشولشەمدى كەڭىستىك اراسىنداعى كورنەكى ديالوگكە دە قىزىعۋشىلىق تانىتادى. مىسالى, كۇزدىڭ سۋرەتتەرىن سالۋ ءۇشىن سالتانات كۇزگى اشىق تابيعي تۇستەردى پايدالانادى, بىراق ەكىنشى جانە ءۇشىنشى جوسپارداعى ءۇنسىز تونداردىڭ, اق داقتاردىڭ قاراما-قايشىلىقتارىنىڭ جانە ءبىرىنشى جوسپارداعى قاراڭعى سىزىقتىق ۇلگىسىنىڭ ارقاسىندا ولاردى كۇيدىرىپ, جارقىراتادى. قازىرگى زامانعى ونەردە فورما مەن ستيل شەكسىز تۇردە ەركىن قولدانىلادى. بۇل فاكتىنى باستاپقى نۇكتە رەتىندە قابىلداي وتىرىپ, سالتانات ءوزىنىڭ شىنايى ءۇنى مەن الەمگە دەگەن كوزقاراسىن كورسەتۋگە تىرىسادى. ونىڭ پىكىرىنشە, شىعارماشىلىق ىزدەنىس, ءوزىن-ءوزى كورسەتۋگە دەگەن ۇمتىلىس سۋرەتشىدەن وتە ادال بولۋدى, ەتەنە جاقىن, تەرەڭ تاجىريبەنىڭ باسىن اشۋدى تالاپ ەتەدى, سوندىقتان ول ارقاشان ءوز كارتينالارى ءۇشىن جاڭا باعىتتار مەن بەينەلەردى ىزدەيدى», دەيدى ماريا كوپەليوۆيچ.
ونىڭ «شارىن شاتقالى» دەپ اتالعان تۋىندىسى ەرىكسىز نازار اۋدارتادى. باستى نىساننان بولەك كەنەپتەگى جازدىڭ اپتاپ ىستىعى, اسپاننىڭ قانىق كوك ءتۇسى شولەيتتەر اڭعارىنىڭ سۇلۋلىعىن ارايلاندىرا تۇسكەندەي. سادىبەكوۆا كەنەپتەرگە الدىن الا ەسكيز جاسامايتىنىن, بىراق بوس كەنەپكە «كولەڭكەسىز سىزىقتارمەن» سۋرەت سالاتىنىن, سودان كەيىن جۇمىس «جوعارىدان ايان تۇرىندە كەلەتىن كولوريستيكالىق شەشىممەن» اياقتالاتىنىن ايتادى.
الماتى