ۇلىتاۋدا سوتتالعانداردى ازاپتاعان تۇرمە قىزمەتكەرلەرى جازالاندى

وسى جىلدىڭ 30 شىلدەسىندە قىلمىستىق ىستەر جونىندەگى مامانداندىرىلعان اۋدانارالىق اسكەري سوتتا قىلمىستىق-اتقارۋ جۇيەسى كوميتەتىنىڭ قاراعاندى جانە ۇلىتاۋ وبلىسى بويىنشا №62 مەكەمەسىندە جازاسىن وتەپ جاتقان 11 سوتتالعاندى ازاپتاۋ قولدانۋ فاكتىسى بويىنشا وسى مەكەمەنىڭ 7 جانە ۇلتتىق ۇلان №6505 اسكەري ءبولىمىنىڭ 4 قىزمەتكەرىنە قاتىستى ۇكىم جاريالاندى.

قىلمىستىق ءىستى ۇلىتاۋ وبلىسى پروكۋراتۋراسىنىڭ ارنايى پروكۋرورلارى تەرگەدى. پروكۋرورلار 11 سوتتالعانعا قاتىستى كىنالى قىزمەتكەرلەردىڭ ازاپتاۋ قولدانعاندىعىن تەرگەۋمەن دالەلدەدى.

«سوت ۇكىمىمەن مەكەمە باستىعى مەن ونىڭ رەجيم جونىندەگى ورىنباسارىنا 6 جىل 6 اي مەرزىمگە باس بوستاندىعىنان ايىرۋ جازاسى كەسىلدى. سونىمەن بىرگە وسى مەكەمەنىڭ باسقا 5 جانە اسكەري ءبولىمنىڭ 4 قىزمەتكەرى 4 جىل مەن 4 جارىم جىل مەرزىمگە باس بوستاندىعىنان ايىرىلدى», دەلىنگەن باس پروكۋراتۋرا حابارالاماسىندا.

ۇكىم زاڭدى كۇشىنە ەنگەن جوق.