مادەنيەت جانە اقپارات ءمينيسترى ايدا بالاەۆا الەۋمەتتىك جەلىدەگى پاراقشاسىندا ء«اليا» كوركەم ءفيلمىنىڭ ءتۇسىرىلىمىن توقتاتا تۇرۋ تۋرالى تاراتىلعان اقپاراتتى ءتۇسىندىردى.
سالا باسشىسى مينيسترلىك حالىق باتىرىنىڭ ەرلىگىن باياندايتىن ءفيلمنىڭ ۇلكەن ەكرانعا شىعۋىنا مۇددەلى ەكەنىن اتاپ ءوتتى. ء«اليا» ءفيلمى ءبىز ءۇشىن ماڭىزدى بولىپ قالا بەرەدى. بۇل – جالپى بيۋدجەتى 900 ملن تەڭگەدەن اساتىن اۋقىمدى جوبا, ونىڭ 450 ملن تەڭگەسى – جەكە ينۆەستيتسيا, ال قالعان سومانى كينوكومپانيا مەملەكەتتىك بيۋدجەتتەن الۋدى جوسپارلاعان. وسى ماۋسىمدا فيلم ءتۇسىرۋدى جوسپارلاپ وتىرعان توپ ۇلتتىق كينونى قولداۋ ورتالىعى ۇيىمداستىرعان پيتچينگكە قاتىسىپ, مەملەكەتتىك قولداۋعا ۇمىتكەر كارتينانىڭ ستسەناريىن ۇسىندى. ۆەدومستۆوارالىق كوميسسيا وتىرىسىنىڭ قورىتىندىسى بويىنشا قارجىلاندىرۋعا 18 جوبا ۇسىنىلدى, ونىڭ ىشىندە ء«اليا» ءفيلمى دە بار», دەپ ءتۇسىندىردى ايدا بالاەۆا.
ءمينيستردىڭ ايتۋىنشا, كەيىپكەر ەسىمىن ەل جادىندا جاڭعىرتۋداعى جوعارى جاۋاپكەرشىلىكتى جانە ءفيلمنىڭ كورەرمەن ءۇشىن ماڭىزدىلىعىن ەسكەرە وتىرىپ, كينوكومپانيا مەملەكەتتىك قاراجاتتى ۇتىمسىز پايدالانباۋ ءۇشىن كونكۋرسقا قاتىسۋدى ۋاقىتشا توقتاتا تۇرۋعا شەشىم قابىلداعان.
«بۇل شەشىم جوبانى كەشىكتىرۋدىڭ جوعارى قاۋپىمەن بايلانىستى, ويتكەنى ءتۇسىرىلىمنىڭ نەگىزگى بولىگى بەلارۋس رەسپۋبليكاسىنىڭ اۋماعىندا سوعىس قيمىلدارىنىڭ كورىنىستەرىن ءتۇسىرۋ جوسپارلانعان بولاتىن. قازىرگى ۋاقىتتا بۇل ەل باسقا جوبالاردىڭ, نەگىزىنەن رەسەيلىك جوبالاردىڭ جوعارى جۇكتەمەسىنە بايلانىستى قاجەتتى تابيعي الاڭداردى ۇسىنا المايدى. سول سەبەپتى تابيعي دەكوراتسيالاردى پايدالانۋ كەستەسىن كەلىسە المادىق, وسىعان بايلانىستى مەرزىمدەردى بۇزۋ جانە جوبانى ۋاقتىلى اياقتاماۋ قاۋپى تۋىندادى», دەپ اتاپ ءوتتى مينيستر.
ايدا بالاەۆانىڭ ايتۋىنشا, شىعىس قازاقستان وبلىسىنىڭ تابيعي الاڭدارىن قالپىنا كەلتىرۋ تۋرالى شەشىم قابىلداندى, بۇل ءتۇسىرىلىم ساپاسىن ساقتاپ قانا قويماي, ءفيلمنىڭ مەرزىمىندە تاپسىرىلۋىن قامتاماسىز ەتۋگە مۇمكىندىك بەرەدى.
«مۇنداي شارالار كورەرمەننىڭ ۇمىتىنە ساي جانە كەيىپكەردى ەسكە الۋعا لايىقتى فيلم تۇسىرۋگە كومەكتەسەتىنىنە سەنىمدىمىز. جوبانى قارجىلاندىرۋعا قاتىستى ماسەلە جوق, ءبىز ءفيلمدى ۋاقىتىندا اياقتاۋعا جانە ونى ۇلكەن ەكرانداردا كورسەتۋگە بار كۇشىمىزدى سالامىز. مينيسترلىك ء«اليا» جوباسىنا, تاريحي جادى مەن ۇلتتىق مۇرانى ساقتاۋعا باعىتتالعان باسقا دا باستامالارعا بارلىق قاجەتتى قولداۋدى كورسەتۋدى جالعاستىرادى. ءاليا مولداعۇلوۆا تۋرالى فيلم ەلىمىزدىڭ مادەني ومىرىندەگى ماڭىزدى وقيعا بولاتىنىنا سەنىمدىمىن», دەپ تۇيىندەدى مينيستر.
ايتا كەتەيىك, تولىقمەتراجدى كوركەم فيلم ءا.مولداعۇلوۆانىڭ 100 جىلدىعى مەن جەڭىستىڭ 80 جىلدىعىنا وراي جوسپارلانعان ەدى. كينوكارتينانىڭ رەجيسسەرى – الەن نيازبەكوۆ. ستسەناريىن ماسكەۋلىك جۋرناليست, تەلەجۇرگىزۋشى ءارى اكتريسا الەنا كۋلەشوۆا جازدى. جوبانىڭ باس پروديۋسەرى جانە ستسەناريستەرىنىڭ ءبىرى الەكساندر شۋحوۆقا فيلم ءتۇسىرۋ يدەياسى 2019 جىلى كەلگەن.
ەسكە سالساق, بيىلعى ۇلتتىق كينونى قولداۋ ورتالىعىنىڭ كونكۋرسىنا انيماتسيا, دەرەكتى, ويىن فيلمدەرى ساناتى بويىنشا 465 ءوتىنىم تىركەلگەن. ءبىرىنشى كەزەڭدە 101 ستسەناري كەلەسى كەزەڭگە جولدانسا, ەكىنشى كەزەڭدە 87 جوبا ىرىكتەلدى. ال پيتچينگتە 29 كينوجوبا ساراپتاما كەڭەسىنىڭ وڭ قورىتىندىسىنا يە بولعان.