تاراز قالاسىنداعى تەحنيكالىق جانە كاسىپتىك ءبىلىمدى دامىتۋ ورتالىعىنىڭ ۇيىمداستىرۋىمەن «Amanat» پارتياسىنىڭ «قارىزسىز قوعام» جوباسىن جۇزەگە اسىرۋ اياسىندا وبلىس ورتالىعىنداعى كوللەدجدەر پەداگوگتەرىنە ارنالعان 3 كۇندىك وقىتۋ سەمينارى ۇيىمداستىرىلدى. كوللەدج ستۋدەنتتەرىنىڭ قارجىلىق ساۋاتىن ارتتىرۋ ماقساتىندا قولعا الىنعان بۇل ءىس-شارادا وبلىستىڭ 72 پەداگوگى ءبىلىمىن تولىقتىردى.
جالپى, «قارىزسىز قوعام» جوباسىنىڭ جۇزەگە اسۋىنا بانك سەكتورىنىڭ تۇتىنۋشىلىق نەسيەمەن تىم اۋەستەنىپ كەتكەنىنىڭ سالدارى يتەرمەلەپ وتىر. حالىقتى بانكتىڭ شىرماۋىنان شىعارىپ, قارجىلىق ساۋاتتىلىققا جەتەلەيتىن مۇنداي جوبا جايىندا مەملەكەت باسشىسى قاسىم-جومارت توقاەۆ بىلتىرعى «ادىلەتتى قازاقستاننىڭ ەكونوميكالىق باعدارى» اتتى جولداۋىندا ەرەكشە اتاپ وتكەن ەدى. سەبەبى بانكتەر ەلگە شەكتەن تىس نەسيە ۇلەستىرۋى سالدارىنان قارجى جۇيەسىن تيتىقتاتقان سىن-قاتەر كوبەيىپ, ازاماتتاردىڭ قارىزعا بەلشەسىنەن باتۋىنا اكەپ سوققان ەدى. 2019 جىلى پرەزيدەنت شەشىمىمەن 500 مىڭ ازاماتتىڭ كەپىلسىز نەسيەسى كەشىرىلىپ, قارجىلىق تىعىرىققا تىرەلگەن تۇلعالاردىڭ بانكروتتىعى جاريالانعان. بىراق بۇل كۇردەلى جاعدايدى تۇبەگەيلى رەتتەمەدى.
احۋالدى ءبىرجولا تۇزەۋ ءۇشىن تىڭ جۇيەلى شارالار قابىلداۋ قاجەتتىگىن ايتقان پرەزيدەنت بىلتىرعى جولداۋىندا ازاماتتاردىڭ قارجىلىق ساۋاتىن ارتتىرۋدىڭ ماڭىزدىلىعىنا ەل نازارىن اۋدارىپ, «Amanat» پارتياسىنىڭ «قارىزسىز قوعام» جوباسىن ەرەكشە اتاپ وتكەن-ءدى.
جوعارىدا اتالعان تارازداعى سەميناردا تەحنيكالىق جانە كاسىپتىك ءبىلىمى دامىتۋ ورتالىعىنىڭ ادىسكەرى اسيما پەرنەباەۆا, «Amanat» پارتياسى وبلىستىق فيليالى توراعاسىنىڭ ورىنباسارى ءۋاليحان بولاتبەك, م.ح.دۋلاتي اتىنداعى تاراز وڭىرلىك ۋنيۆەرسيتەتى «قارجى جانە ەسەپ» كافەدراسىنىڭ مەڭگەرۋشىسى, ەكونوميكا عىلىمدارىنىڭ كانديداتى ايگۇل مولدابەكوۆا جولداۋدا ايتىلعان ماقسات-مىندەتتەرگە توقتالىپ, ءوز تاجىريبەلەرىمەن ءبولىستى. جيىندا ءسوز العان ءۋاليحان بولاتبەك سانانى تۇرمىس بيلەگەن بۇگىنگىدەي قوعامدا ازاماتتاردىڭ قارجىلىق ساۋاتتى بولعانى دۇرىس دەگەن پىكىردى العا تارتتى.
«بيىل جوبا اياسىندا تۇرعىنداردىڭ قارجىلىق ساۋاتىن ارتتىرۋ ماقساتىندا 8 500 ادامدى وقىتۋدى جوسپارلادىق. بۇگىنگە دەيىن 7 مىڭعا جۋىق تۇرعىننىڭ قارجىلىق ساۋاتىنىڭ ارتۋىنا ۇلەسىمىزدى قوستىق. ەندى جوبانىڭ كەلەسى كەزەڭىنە وتەمىز. ياعني وقۋشىلار مەن ستۋدەنتتەر وقىتىلادى. وسى ماقساتتا 4 پەداگوگ استانا قالاسىندا ءبىلىمىن جەتىلدىرىپ كەلىپ, وقۋ ورىندارىنىڭ ۇستازدارىن وقىتۋدى باستادى. بۇل ماماندار جاڭا وقۋ جىلىنان بىلىمگەرلەرگە قارجىلىق ساۋاتتىلىق كۋرستارىن جۇرگىزەدى», دەدى ءۋاليحان بولاتبەك ۇلى.
ۇيىمداستىرۋشىلاردىڭ ايتۋىنشا, سەميناردىڭ ءبىرىنشى كەزەڭىندە 36 ادام وقىتىلسا, كەلەسى كەزەڭىندە دە سونشا پەداگوگ ءبىلىمىن جەتىلدىرمەك. ال سەمينارعا قاتىسۋشىلار پىكىر الماسۋ كەزىندە قارجىنى ءتيىمدى باسقارىپ, جالپى شىعىنداردى ەسەپتەپ, جۇيەلەۋدى, الاياقتىق ارەكەتتەردىڭ بەلگىلەرى مەن سحەمالارىن جانە ولاردان قۇتىلۋ جولدارىن ۇيرەنىپ, قارجىلىق ساۋاتىن ارتتىرا العانىن جەتكىزدى.