بۇگىن ءماجىلىس دەپۋتاتى, «AMANAT» پارتياسى فراكتسياسىنىڭ مۇشەسى ەربولات ساتىبالدين ۇلىتاۋ اۋىلى اۋليەتاۋ تاۋىنىڭ باۋرايىنداعى مەملەكەتتىك رامىزدەر الاڭىنىڭ قۇرىلىس جۇمىسىمەن تانىستى, دەپ جازادى Egemen.kz.
2022 جىلى ماۋسىمدا پرەزيدەنت قاسىم-جومارت توقاەۆ ۇلتتىق قۇرىلتايدىڭ ءبىرىنشى وتىرىسىندا قازاق حالقىنىڭ بىرلىگىن ايگىلەيتىن ساۋلەتتى نىسان – مەملەكەتتىك رامىزدەر الاڭىن اشۋدى تاپسىردى. بۇگىندە نىسان قۇرىلىسىنىڭ 85%-عا جۋىعى اياقتالعان. الاڭدا قازاقستان تاريحىنىڭ ءارتۇرلى كەزەڭىن بەينەلەيتىن بارەلەفتەر, جاياۋ جۇرگىنشى جولدارى سالىنادى. نىساننىڭ جالپى اۋماعى 3 گەكتاردى قۇرايدى. قازىر الاڭدا كوگالداندىرۋ جانە جارىقتاندىرۋ جۇمىسى جۇرگىزىلىپ جاتىر.
« ۇلىتاۋ توپىراعى – ۇلى دالا تاريحىنىڭ كۋاگەرى, ۇلتىمىزدىڭ رۋحاني استاناسى. ءدال وسى جەردە 1730 جىلى جوڭعارلارعا قارسى ءۇش ءجۇزدىڭ جاساعى جينالدى. جىل سايىن مۇنداعى كيەلى ورىندارعا 40 مىڭعا جۋىق مەيمان كەلەدى. ۇلىتاۋ اۋدانىندا 600-دەن استام ەسكەرتكىش بار. سوندىقتان ءتۋريزمدى دامىتۋ – «AMANAT» پارتياسى ۇلىتاۋ وبلىستىق سايلاۋالدى باعدارلاماسىنداعى نەگىزگى باسىمدىقتاردىڭ ءبىرى. قوناق ءۇي, ساناتوري سالۋ, جولداردى جاڭعىرتۋ جونىندەگى كەشەندى ءىس-شارالار 2028 جىلعا قاراي جىل سايىنعى تۋريستەر سانىن 30%-عا ارتتىرۋعا مۇمكىندىك بەرەدى», دەدى ەربولات ساتىبالدين.
وڭىردە 2027 جىلعا قاراي اۋليەتاۋ شىڭىنا اپاراتىن جول سالىنادى, ۇلىتاۋ اۋدانىنىڭ كۇمىسبۇلاق جانە تاسبۇلاق بۇلاقتارىنىڭ اۋماعى اباتتاندىرىلادى, «ساتباەۆ-مالشىباي» اۆتوموبيل جولى, «جوشى حان» كەسەنەسى, دومباۋىل قورىمى قايتا جاڭارتىلادى.
ەربولات ساتىبالدين ازاماتتاردى دا قابىلدادى. ۇلىتاۋلىقتار دەپۋتاتقا: ينفراقۇرىلىمنىڭ جاي-كۇيى, الەۋمەتتىك تولەمدەر مولشەرىن ارتتىرۋ, سونداي-اق دەنساۋلىق ساقتاۋ جانە ءبىلىم بەرۋ ماسەلەلەرى بويىنشا جۇگىندى. اتاپ ايتقاندا, ۇلىتاۋ اۋىلىنىڭ بىرنەشە تۇرعىنى ءىسىن جاڭادان باستاعان شارۋالارعا مەملەكەت تاراپىنان ۇسىنىلاتىن جەڭىلدەتىلگەن نەسيەنى قالاي الۋعا بولاتىنىن سۇرادى.
«اۋىل تۇرعىندارىنا 5-7 جىل مەرزىمگە جىلدىق مولشەرلەمەسى 2,5 پايىزدى قۇرايتىن شاعىن نەسيە بەرىلەدى. ازاماتتار 8,6 ملن تەڭگە دەيىن نەسيە الا الادى. وسىلايشا, شارۋا جەكە كاسىبىن اشا وتىرىپ, قارىزدان قۇتىلىپ قانا قويماي, ءال-اۋقاتىن دا ەداۋىر جاقسارتا الادى. پرەزيدەنت بىلتىر قازاقستان حالقىنا جولداۋىندا «اۋىل اماناتى» جوباسىنىڭ ماڭىزىن اتاپ ءوتىپ, جەكە قوسالقى شارۋاشىلىقتار كووپەراتسياسىن ىنتالاندىرۋدى تاپسىردى. جوبانى جۇزەگە اسىرۋ جۇمىسى باستالعاننان بەرى ۇلىتاۋ وبلىسىندا جالپى سوماسى 3 ملرد تەڭگەنى قۇرايتىن 380-نەن استام جوبا ماقۇلداندى. قاراجاتتىڭ باسىم بولىگى مال شارۋاشىلىعىن دامىتۋعا باعىتتالدى. ۇلىتاۋ اۋىلىنىڭ كوپ تۇرعىنى جەڭىلدەتىلگەن نەسيە الدى. ازاماتتاردى جوباعا بەلسەندى قاتىسۋعا شاقىرامىن», دەدى ەربولات ساتىبالدين.