قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ ماڭعىستاۋ وبلىسىنداعى «ماەك» جشس قىزمەتىن قولداۋعا ۇكىمەت رەزەرۆىنەن 5 ملرد تەڭگە ءبولۋ تۋرالى قاۋلىعا قول قويدى, دەپ حابارلايدى Egemen.kz.
قاراجات وبلىستىق بيۋدجەت ارقىلى ەنەرگەتيكا كومبيناتىن سۋبسيديالاۋعا باعىتتالاتىن بولادى, بۇل كاسىپورىنعا الداعى جىلىتۋ ماۋسىمىنا ۋاقىتىلى دايىندالۋعا جانە ەنەرگەتيكالىق ينفراقۇرىلىمنىڭ تۇراقتى جۇمىس ىستەۋىن قامتاماسىز ەتۋگە مۇمكىندىك بەرەدى.
2023 جىلدان باستاپ كاسىپورىندى كەزەڭ-كەزەڭىمەن جاڭعىرتۋ جۇمىستارى جۇرگىزىلىپ كەلەدى. ۇزدىكسىز وندىرىستىك تسيكلدى قامتاماسىز ەتۋگە جانە جابدىقتىڭ توقتاپ قالۋ قاۋپىن ازايتۋعا باعىتتالعان بىرقاتار نەگىزگى جوبالاردى ىسكە اسىرۋ كوزدەلگەن. ولار قازاندىق اگرەگاتتارىن, رەزەرۆتىك قورعاۋ جانە اۆتوماتيكا جۇيەلەرىن, سونداي-اق ەلەكتر ەنەرگياسىن باسقارۋ مەن ەسەپكە الۋدىڭ اۆتوماتتاندىرىلعان جۇيەلەرىن جاڭعىرتۋدى قامتيدى.
ماەك – اقتاۋ قالاسىن قوسا العاندا, وڭىردەگى ەلدى مەكەندەر مەن كاسىپورىنداردى ەلەكتر جانە جىلۋ ەنەرگياسىمەن, سونداي-اق اۋىز سۋ, ىستىق جانە تەحنيكالىق سۋمەن قامتاماسىز ەتەتىن ماڭعىستاۋ وبلىسىنىڭ ءىرى ەنەرگيا كەشەنى.