جاقىندا ماسكەۋ تورىندە قازاقستاننىڭ ەڭبەك سىڭىرگەن قايراتكەرى, قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى, ءانشى, كومپوزيتور ساۋلە جانپەيىسوۆانىڭ جەڭىستىڭ 80 جىلدىعىنا ارنالعان «ەر ەسىمى – ەل ەسىندە» اتتى اۆتورلىق اندەر كەشى ءوتتى.
قازاقستاننىڭ رەسەي فەدەراتسياسىنداعى ەلشىلىگى, «حالىقتار دوستىعى مەن ۇلتتىق مادەنيەتتەردىڭ دامۋىن قولدايتىن «استانا» قورىنىڭ» ۇيىمداستىرۋىمەن وتكەن ءىس-شارانىڭ باستى ماقساتى – حالىق قاھارمانى, قازاقتىڭ اتى اڭىزعا اينالعان تۇڭعىش ۇشقىش قىزى حيۋاز دوسپانوۆانىڭ ەرلىگىن ۇلىقتاۋ.
اۆتورلىق اندەر كەشىنە جينالعان كورەرمەننىڭ قاراسى قالىڭ بولدى. ولاردىڭ باسىم بولىگى – كەزىندە ءتۇرلى جاعدايمەن رەسەيگە قونىس اۋدارعان, تاعدىر-تالايىمەن سول جاقتا قالعان قازاقتار. ماسكەۋدە ءبىلىم الىپ جۇرگەن جاستارىمىز دا وسى كەشتىڭ باسى-قاسىنان تابىلدى. كورشى ەلدە تۇرىپ جاتقان قىرعىز, وزبەك, تاتار, قاراقالپاق سەكىلدى وزگە ەتنوس وكىلدەرى دە اتالعان كونتسەرتتى ۇيىپ تىڭدادى.
ساحنا شىمىلدىعىن جۇمەكەن ناجىمەدەنوۆتىڭ سوزىنە جازىلعان ءشامشى قالداياقوۆتىڭ «بەيبىت كۇن تىلەگى» انىمەن اشقان ساۋلە ستاحانشىلقىزى وسىناۋ كەشتىڭ ماڭىزى ەرەكشە ەكەنىنە توقتالدى.
– ءبىز بەيبىت كۇندى سىيلاپ كەتكەن, جەڭىس كۇنىن جاقىنداتقان, فاشيزمگە قارسى جان اياماي سوعىسقان ءاربىر جاۋىنگەرگە قارىزدارمىز. ماسكەۋ تورىندەگى بۇگىنگى كەش – سول باتىر-بابالارىمىزعا ارنالعان تاعزىم كەشى بولماق, – دەدى ءانشى, كومپوزيتور.
بۇدان سوڭ كورەرمەندەرگە حيۋاز دوسپانوۆا تۋرالى شاعىن بەينەفيلم كورسەتىلىپ, داڭقتى ۇشقىشتىڭ قۇرمەتىنە ارنالعان ساۋلە جانپەيىسوۆانىڭ «حيۋاز» ءانىنىڭ تۇساۋى كەسىلدى. ءاننىڭ ءسوزىن جازعان اقىن نۇرسۇلتان مىقتىباي كەشكە ارنايى قاتىسىپ قانا قويماي, اتالعان كەشتىڭ تىزگىنىن ۇستادى. ءاندى حيۋاز قايىرقىزىنىڭ جەرلەسى ءارى كومپوزيتوردىڭ شاكىرتى, قۇرمانعازى اتىنداعى قازاق ۇلتتىق كونسەرۆاتورياسىنىڭ 4-كۋرس ستۋدەنتى, اباي اتىنداعى مەملەكەتتىك وپەرا جانە بالەت تەاترىنىڭ ءسوليسى شىڭعىس نۇرعالي ۇلى ورىندادى.
– قان مايداندا جاۋمەن الىسىپ, تالاي مارتە ءولىم اۋزىنان امان قالعان حيۋاز اپامىزعا ارنالعان ءان وسىدان ەكى جىل بۇرىن 100 جىلدىق مەرەيتويىنا وراي شىققان بولاتىن. بىراق حالىققا ۇسىنۋدىڭ ءساتى بۇگىن ءتۇسىپ وتىر, – دەدى قازاقستاننىڭ ەڭبەك سىڭىرگەن قايراتكەرى.
جەزتاڭداي ءانشى كەشتە حالىق اندەرى, اباي, مۇحيت, عاريفوللا شىعارمالارىنان بولەك, پۋشكين مەن ەسەنيننىڭ «تاتيانانىڭ حاتى», «قارا ءشالى» سەكىلدى ءوزى ءانىن جازعان اتاقتى تۋىندىلاردى ورىنداپ, ورىس, قىرعىز, نوعاي تىلدەرىندە ءان شىرقادى. ماسكەۋلىك كورەرمەن «جان اكە», «فاريزا – جىر بيىك», «كوك نوسەر», «تۇعىر» سەكىلدى اۆتورلىق اندەرىن جىلى قابىلداپ, قوشەمەت تانىتتى. سونداي-اق رەسەيدە تۇراتىن قازاقستاننىڭ ەڭبەك سىڭىرگەن مادەنيەت قىزمەتكەرى تاتيانا پولتاۆسكايا, رەسەيدە تۇراتىن جانە ءبىلىم الىپ جاتقان گۇلنار قوسپاقوۆا, گۇلبانۋ مۇراتوۆا, دينارا سەيتەشەۆا, گۇلساۋلە ۇدىلبەكوۆا, اقبەرمەت ايناقۇلوۆا, گۇلجانار بيمۇعامبەتوۆا, ەركىن ساياجان, اسحات ورالبەكوۆ, ابزال تاستانبەك, ايجامال اسقاروۆا ونەر كورسەتىپ, ءان مەن بيدەن شاشۋ شاشتى.
ماسكەۋدە باستالعان ءىس-شارا ارتىنشا حالىق قاھارمانىنىڭ كىندىك قانى تامعان تۋعان جەرىندە جالعاستى. اتىراۋ وبلىسىنىڭ قۇرمانعازى اۋدانىنداعى حيۋاز اۋىلىنىڭ مادەنيەت ۇيىندە قازاقتىڭ «قاناتتى قىزىنا» ارنالعان «حيۋاز» ءانى ورىندالعان ساتتە زال تولى كورەرمەن ورىندارىنان تىك تۇرىپ, ىستىق ىقىلاسىن ءبىلدىردى.
ايدىن ابدىحالىق