8-13 قىركۇيەكتە استانا قالاسىندا 5-ءشى دۇنيەجۇزىلىك كوشپەلىلەر ويىندارى وتەدى. وسى ءدۇبىرلى دودادا باق سىنايتىن قازاقستان كوكپارشىلارى كوكبورى ويىنىنا دايىندىعىن پىسىقتاپ جاتىر. بۇل تۋرالى ۇلتتىق سپورت قاۋىمداستىعى حابارلادى, دەپ جازادى Egemen.kz.
ويىن قارساڭىندا كوكپارشىلار الماتى وبلىسىندا كوكپار جانە كوكبورى ويىندارى بويىنشا وقۋ-جاتتىعۋعا جينالدى.
كوكپاردان ۇلتتىق قۇراما مۇشەسى ناۋرىزباي قالتاەۆ بايراقتى باسەكەگە دايىندىق بارىسىن بايانداپ, كوكپار مەن كوكبورىنىڭ ايىرماشىلىقتارىن ايتتى.
«5-ءشى دۇنيەجۇزىلىك كوشپەلىلەر ويىندارىنا دايىندىعىمىز جوعارى دەڭگەيدە ءوتىپ جاتىر. ەكى سپورتتىڭ ايىرماشىلىعى تايم سانىندا – كوكبورىدە ءۇش تايم وينالادى, ال كوكپاردا ەكەۋ. كوكبورىدە قازاندىققا, ال كوكپار جەرگە سىزىلعان شەڭبەردە وينالادى. كوكبورى سايىسىنا ءار كوماندادان 12 ادام قاتىسادى», دەدى ناۋرىزباي قالتاەۆ.
سپورتشىلاردىڭ شەبەرلىگىن شىڭداۋ ءۇشىن كوكپار فەدەراتسياسى تاجىريبەلى كەڭەسشىلەردى دە شاقىرتقان.
«دۇنيەجۇزىلىك كوشپەلىلەر ويىندارى اياسىندا كوكپار جانە كوكبورى ويىندارى وتەدى. قازىر سپورتشىلاردىڭ دايىندىقتارى جاقسى. باستى قارسىلاس رەتىندە قىرعىزستان مەن وزبەكستاندى ايتار ەدىم. ءبىز كوكپاردان جەڭىسىمىزگە سەنىمدىمىز, ال كوكبورى ويىنىنان مۇمكىندىكتەرىمىز تەڭ دارەجەدە. ءبىراز جىلدان بەرى كوكبورى ويناعانىمىز جوق. دەسە دە جەڭىس ءۇشىن بارلىق مۇمكىندىگىمىزدى پايدالانامىز», دەدى كوكپاردان ۇلتتىق قۇرامانىڭ باس باپكەرى اقىلباي مانكەەۆ.
ايتا كەتەيىك, استانادا وتەتىن باسەكەگە الەمنىڭ 89 ەلىنەن 2000-نان استام سپورتشى قاتىسادى دەپ جوسپارلانعان.