ەرەن ەردى باستاعان حالقىن باققا,
تۋعان ەلى قوندىردى التىن تاققا!
ەلىن سۇيگەن ەلباسىن ەلى سۇيەدى. ونى كەشەگى سايلاۋ تاعى ءبىر دالەلدەدى. تورتكۇل دۇنيە كوز تىككەن ماڭىزدى ساياسي ءىس-شاراعا ەل حالقى ءبىر كىسىدەي اتسالىسىپ, ەل باسقارار باسشىcىن سايلادى. ءيا, حالقى تاعى ونى تاڭدادى. ەلىن سۇيگەن ەردى – ەلباسىمىز نۇرسۇلتان نازارباەۆتى قازاقستان رەسپۋبليكاسىنىڭ پرەزيدەنتتىگىنە لايىق دەپ تاپتى. بۇلاي دەۋىمىزگە كەزەكتەن تىس پرەزيدەنتتىك سايلاۋدىڭ العاشقى ناتيجەلەرى دالەل, ياعني دەموكراتيا ينستيتۋتى جاريالاعان مالىمەتتەرگە سۇيەنسەك, سايلاۋشىلاردىڭ 97,5 پايىزى نۇرسۇلتان نازارباەۆقا داۋىس بەردى. ءسوزدىڭ شىنى كەرەك, نۇرسۇلتان نازارباەۆتىڭ بۇل سايلاۋدا دا جەڭىسكە جەتەرىنە ابدەن سەنىمدى بولعانبىز. سەبەبى, ونى سايلاۋعا تۇسۋگە شاقىرعان, قولقا سالىپ, ۇگىتتەي وتىرىپ, ءوتىنىش جاساعان دا حالىقتىڭ ءوزى ەدى. ەل تاعدىرى ءۇشىن «ءبىر جەڭنەن قول, ءبىر جاعادان باس شىعارا الاتىن» ىنتىماقتى ەلدىڭ حالقى بۇل جولى دا بىرلىكتىڭ بىرەگەي سيپاتىن تانىتتى. جاھان جۇرتى قۇلاق تۇرگەن ايتۋلى ساياسي ناۋقاندا دا اۋىزبىرشىلىك تانىتىپ, ەلدىكتىڭ ەرەكشە ۇلگىسىن كورسەتتى. ءتىپتى, بۇل سايلاۋ ەلدىكتىڭ, تاتۋلىقتىڭ جارقىن مەرەكەسىنە اينالدى دەسەك, ارتىق ايتقاندىق ەمەس. ماسەلەن, سايلاۋدىڭ قورىتىندىسىن استانالىقتاردىڭ كوبى, اسىرەسە, ەلجاندى جاستار ەلورداداعى «ماڭگىلىك ەل» مونۋمەنتىنىڭ جانىندا كۇتتى. ارينە, ءدال وسىناۋ ساتتە «ماڭگىلىك ەلدىڭ» الدىنا جينالۋىندا دا ۇلكەن ءمان بار. مەزگىلدىڭ ءتۇن بولعانىنا قاراماستان, «ماڭگىلىك ەلدىڭ» ماڭىن شات-شادىمان كوڭىل-كۇيگە بولەگەن حالىقتىڭ قۋانىشى, نۇرسۇلتان نازارباەۆقا دەگەن زور سەنىمى, ۇلتىمىزدىڭ ۇلى پەرزەنتىنە دەگەن شەكسىز قۇرمەتى ەكەنى داۋسىز. سەبەبى, ءبىز ءۇشىن بولاشاعىمىزعا باعدار ەتىپ ۇلتتى ۇيىستىرا ۇلى ماقساتتارعا جەتەلەيتىن يدەيا ول – ماڭگىلىك ەل. ال ەلدى سول جولعا جەتەلەگەن ەلباسى نۇرسۇلتان نازارباەۆ. ەلباسى ماڭگىلىك ەل يدەياسىن ۇلتىمىزدىڭ ۇلى باعدارى, «قازاقستان-2050» ستراتەگياسىنىڭ تۇپقازىعى دەپ ۇستاندى. ءيا, ەلىمىز بۇگىندە تاۋەلسىزدىگىمىزبەن بىرگە, تۇڭعىش پرەزيدەنتىمىز نۇرسۇلتان نازارباەۆپەن بىرگە ماڭگىلىك مۇراتتارىنا باعىت الىپ بارادى. ەلباسىنىڭ ءوزى ايتقانداي, «ماڭگىلىك ەل» – اتا-بابامىزدىڭ سان مىڭ جىلدان بەرگى اسىل ارمانى بولسا, ول ارمان – الەم ەلدەرىمەن تەرەزەسى تەڭ قاتىناس قۇراتىن, الەم كارتاسىنان ويىپ تۇرىپ ورىن الاتىن تاۋەلسىز مەملەكەت اتانۋ. ول ارمان تۇرمىسى باقۋاتتى, ءتۇتىنى ءتۇزۋ شىققان, ۇرپاعى ەرتەڭىنە سەنىممەن قارايتىن باقىتتى ەل بولۋ ەدى». ءبىزدىڭ ەل بۇل ارمانداردى نۇرسۇلتان نازارباەۆتاي كوشباسشىسىنىڭ ارقاسىندا اقيقاتقا اينالدىردى. ماڭگىلىك ەلدىڭ ىرگەسى قالاندى. مىنە, بۇكىل قازاقستاندىقتار ءۇشىن ەلدىكتىڭ سىنىنداي بولعان كەزەكتەن تىس پرەزيدەنتتىك سايلاۋدىڭ قورىتىندىسى دا جاريالانۋعا جاقىن بولاتىن. سول ءسات ەلورداداعى ەلدىگىمىزدىڭ سيمۆولى ىسپەتتەس «ماڭگىلىك ەلدىڭ» جانىندا ايرىقشا اسەمدىك ورنادى. قولدارىنا كوك تۋ ۇستاپ, اسپانعا جەلبىرەتكەن جاستاردىڭ جانارىندا وت ويناپ, كوڭىلدەرىندە ەلباسىنىڭ جەڭىسىنە سەنگەن سەزىمدەر مەنمۇندالاپ تۇردى. حالقىمىزدىڭ اسقاق رۋحىن پاش ەتىپ, بىرلىك پەن تاتۋلىققا, جاقسىلىق پەن جاسامپازدىققا شاقىرعان «ماڭگىلىك ەلدىڭ» ەرەكشە قاسيەتىنەن دە شىعار, جاستاردىڭ جالىنى كوكتەمگى ءتۇننىڭ ىزعارىن دا سەزدىرمەيدى. ءبىر ءسات قۇيعىلجىعان كۇي, اسەم ءان, ىرعاقتى ءبيدىڭ ءبارى ءبىر توقتادى دا, بارلىعى دەمدەرىن ىشكە تارتىپ, سايلاۋدىڭ الدىن الا ناتيجەلەرىن كۇتتى. الاڭعا قويىلعان ۇلكەن ەكراننان العاشقى ناتيجەلەر ەستىلگەندە «ماڭگىلىك ەلدىڭ» تۇنگى اسپانى جارقىراپ, اينالا تۇگەل وت-شاشۋعا بولەندى. وسى ءسات جاستار جارىسا ايقايلاسىپ, ءوز تاڭداۋلارىنىڭ, ءوز سەنىمدەرىنىڭ ورىندالعانىنا قۋانىسىپ, قيقۋلاسىپ كەتتى. مىنە, ەل بولاشاعىنا, ءوز بولاشاقتارىنا سەنىممەن قاراعان جاستاردىڭ ەلباسىنا دەگەن سەنىمى وسىلاي بولسا كەرەك-ءتى. جاستاردىڭ جۇزدەرى نۇرعا بولەنىپ, «جاساسىن قازاق ەلى!», «العا, قازاقستان!» دەگەن ۇراندار بۇكىل قازاق دالاسىن شارلاپ كەتكەندەي اسەرگە بولەدى. جەڭىستىڭ تۋىن جەلبىرەتكەن شارا ودان ءارى قازاقستاننىڭ تانىمال ەسترادا جۇلدىزدارىنىڭ ءان-شاشۋلارىمەن جالعاستى. مۇنىمەن قوسا, اتالعان مونۋمەنت الاڭىنان باستاپ بىرىڭعاي اق ءتۇستى كولىك مىنگەن قالا جاستارى قازاقستاننىڭ مەملەكەتتىك تۋىن كوتەرىپ, اۆتوكولىك شەرۋىمەن ەلوردا كوشەلەرىمەن ءجۇرىپ ءوتتى. دينارا بىتىكوۆا, «ەگەمەن قازاقستان».