پراگا مۋزەيىندە الماتى قالاسى مۇراجايلار بىرلەستىگى كوللەكتسياسىنىڭ جادىگەرلەرىنەن ۇسىنىلعان «ۋاقىت كەرۋەنى» اتتى كورمەنىڭ سالتاناتتى اشىلۋ ءراسىمى ءوتتى.
كورمەنىڭ اشىلۋ سالتاناتىنا الماتى جانە پراگا قالالارىنىڭ, چەحيانىڭ مەملەكەتتىك, قوعامدىق جانە مادەني توپتارىنىڭ, پراگادا اككرەديتتەلگەن ديپلوماتيالىق كورپۋستىڭ, سونداي-اق جەرگىلىكتى باق وكىلدەرى قاتىستى. ءىس-شاراعا قاتىسۋشىلار الدىندا قازاقستان رەسپۋبليكاسىنىڭ چەح رەسپۋبليكاسىنداعى ەلشىسى باقىت دۇيسەنباەۆ, الماتى قالاسى ءماسليحاتى توراعاسىنىڭ مىندەتىن اتقارۋشى ءاسيا اقانوۆا, الماتى قالاسى مۇراجايلار بىرلەستىگىنىڭ ديرەكتورى ءلاززات ساعىندىقوۆا جانە پراگا قالاسى مۋزەيىنىڭ ديرەكتورى يۆو ماتسەك قۇتتىقتاۋ ءسوز سويلەدى.
ب.دۇيسەنباەۆ ءوز سوزىندە ەلدەر مەن حالىقتار اراسىنداعى دوستىق قاتىناستاردى دامىتۋداعى مادەني ديپلوماتيانىڭ ماڭىزدىلىعىن اتاپ ءوتتى. الماتى قالاسى اكىمدىگى مەن ءماسليحاتىنىڭ, پراگا قالاسى مەرياسىنىڭ جانە قازاقستان رەسپۋبليكاسىنىڭ چەحياداعى ەلشىلىگىنىڭ قولداۋى ارقاسىندا جۇزەگە اسىرىلعان بۇل مادەني جوبا ەكى ەل حالىقتارىن جاقىنداستىرۋ جولىنداعى كەزەكتى قادام بولدى. سونداي-اق ديپلومات قوناقتاردى 8–13 قىركۇيەكتە استانادا وتەتىن V دۇنيەجۇزىلىك كوشپەلىلەر ويىندارى تۋرالى حاباردار ەتە وتىرا, ولاردى كوشپەلىلەردىڭ داستۇرلەرى مەن مادەنيەتىن ءوز كوزىمەن كورۋ ءۇشىن وسى ەرەكشە ءىس-شاراعا قاتىسۋعا شاقىردى.
باعدارلامانىڭ مادەني بولىگىندە «الاتاۋ» ءداستۇرلى ونەر تەاترىنىڭ ارتىستەرى ونەر كورسەتىپ, تانىمال حالىق اۋەندەرى مەن بەلگىلى قازاق كومپوزيتورلارىنىڭ شىعارمالارى ورىندالدى. سونىمەن قاتار ءىس-شارا قوناقتارىنا ءداستۇرلى قازاق تاعامدارى – قۇرت, ىرىمشىك, جەنت, قازى ۇسىنىلدى.
31 تامىزعا دەيىن جالعاساتىن كورمەدە الماتى قالاسى مۇراجايلار بىرلەستىگىنىڭ قورىنان 220-دان استام ەكسپونات ۇسىنىلعان. ەكسپوزيتسيانىڭ نەگىزىندە قازاق حالقىنىڭ ءومىرى مەن تۇرمىسى, سالت-ءداستۇرى, قولدانبالى ونەرى تۋرالى باياندايتىن ەتنوگرافيالىق ارتەفاكتىلەر, قازاق حالىق مۋزىكالىق اسپاپتارى, سونداي-اق الماتى قالاسىنىڭ تاريحى مەن قازىرگى ءومىرى تۋرالى باياندايتىن فوتوسۋرەتتەر بار.
وسى كورمە ارقىلى پراگا تۇرعىندارى, سونداي-اق چەحيا استاناسىنىڭ قوناقتارى قازاقتاردىڭ تاريحىنا كوز جىبەرىپ, مادەنيەتىمەن, تۇرمىسىمەن تانىسا الادى. «ۋاقىت كەرۋەنى» كورمەسى – قازاقستان مەن چەحيانىڭ مادەنيەتارالىق ديالوگىن جالعاستىرىپ, كەلۋشىلەرگە دارقان قازاقتىڭ كوشپەلى وركەنيەتىنىڭ باي مۇراسىن پاش ەتەرى ءسوزسىز.