بۇگىنگى تاڭدا ونەر كورسەتىپ جۇرگەن سپورتشىلار اراسىنداعى ەڭ اتاقتىسى اقش-تىڭ وكىلى كەتي لەدەكين ەكەنى داۋسىز. ورتا جانە ۇزىن قاشىقتىققا جۇزەتىن 27 جاستاعى ۆاشينگتوننىڭ تۋماسى پاريجدە 1 التىن, 1 كۇمىس جانە 1 قولا مەدالدى يەلەندى. وعان دەيىن ول 2012 جىلى لوندون, 2016 جىلى ريو-دە-جانەيرو جانە 2021 جىلى توكيوداعى دودالاردا ولجاعا كەنەلدى. قازىرگى كەزدە كەتيدىڭ قورجىنىندا 9 التىن, 4 كۇمىس جانە 1 قولاسى بار. ءسويتىپ, لەدەكين وليمپيادادا ەڭ كوپ جۇلدە العان سپورتشىلار تىزىمىندە ءۇشىنشى ورىنعا كوتەرىلدى. ونىڭ الدىندا تەك امەريكالىق ءجۇزۋشى مايكل فەلپس (23 التىن+3 كۇمىس+2 قولا) پەن كسرو گيمناسشىسى لاريسا لاتىنينا (9+5+4) وراپ تۇر.
فرانتسيالىق لەون مارشان وليمپيا ويىندارى بارىسىندا 200 مەترگە براسس جانە باتتەرفلياي ادىسىمەن جۇزۋدە باس جۇلدەنى ولجالادى. ەكى رەتىندە دە ول وليمپيادالىق رەكورد ورناتتى. بۇعان دەيىن جەر-جاھانداعى ەشبىر ءجۇزۋشى ونداي كورسەتكىشكە قول جەتكىزە الماعان ەدى. تىپتەن داڭقى جەر جارعان مايكل فەلپستىڭ وزىنە ونداي باق بۇيىرماعان. 22 جاستاعى تۋلۋزانىڭ تۋماسى 200 جانە 400 مەترگە كەشەندى جۇزۋدە دە الدىنا جان سالماي, 4ح100 ەستافەتاسىندا قولا مەدالدى يەلەندى.
فرانتسيانىڭ باس شاھارىندا 57 كگ سالماقتا جۇدىرىقتاسقان مۇناربەك سەيىتبەك ۇلى جەڭىس تۇعىرىنا كوتەرىلدى. بۇل – قىرعىزستاننىڭ بوكس تاريحىنداعى وليمپيادانىڭ تۇڭعىش جۇلدەسى. قازىرگى كەزدە الەۋمەتتىك جەلىدە رينگتىڭ بۇرىشىنداعى مۇناربەككە ۇلتتىق قۇرامانىڭ باس باپكەرى دانيار تولوگون ۇلىمەن بىرگە وزبەك مامانى اقمال حاسانوۆتىڭ دا سەكۋندانت رەتىندە جاردەمدەسىپ جۇرگەنىن بايقاۋعا بولادى. سەبەبى قىرعىزستاننىڭ ۇلتتىق وليمپيادا كوميتەتى بوكسشىنىڭ جەكە جاتتىقتىرۋشىسى بەكاناس سۇلتانباەۆقا اككرەديتاتسيا بەرمەي, ونى ەلدە قالدىرىپ كەتتى. جالعىز ءوزىنىڭ قينالىپ جۇرگەنىن بايقاعان وزبەكستاننىڭ وكىلى ارىپتەسىنە كومەككە كەلدى. بۇل كورىنىس جۋرناليستەردىڭ نازارىنان تىس قالعان جوق. باۋىرلاس تۇركى حالقىنىڭ اۋىزبىرلىگى مەن ءبىر-بىرىنە دەگەن شىنايى جاناشىرلىعىنا ءتانتى بولعان باق وكىلدەرى ارنايى روليك ءتۇسىرىپ, سونى جەر-جاھانعا عالامتور ارقىلى تاراتىپ جاتىر.