ەلوردا جۇرتىنىڭ وزبەك ونەرى مەن مادەنيەتىنە قانىعىپ جاتقانىنا بىرنەشە كۇن بولدى. ۇلتتىق مۋزەيدەگى سۋرەت كورمەسىنەن باستالعان مادەني ءىس-شارالار تىزبەگى وزبەك كينوسىنىڭ كۇندەرىنە جالعاسىپ, ورتالىق ساياباقتا وتكەن تاشكەنتتىڭ استانا قالاسىنداعى مادەنيەت كۇندەرىنە ۇلاستى. ايتا كەتەيىك, اتالعان ءىس-شارا وزبەكستان رەسپۋبليكاسىنىڭ پرەزيدەنتى شاۆكات ميرزيوەۆتىڭ ەلىمىزگە مەملەكەتتىك ساپارىنا ورايلاستىرىلعان.
كۇنى كەشە امفيتەاتر ساحناسىندا تاشكەنتتىڭ تانىمال ونەرپازدارىنىڭ قاتىسۋىمەن جاندى داۋىستاعى كونتسەرتتىك باعدارلامالار, ۇلتتىق ساندىك-قولدانبالى ونەر كورمەلەرى, سپورتتىق جارىستار مەن ويىندار ۇيىمداستىرىلدى. وزبەك حالقىنىڭ سان قىرلى سالت-ءداستۇرى مەن استاناسىنىڭ تۋريستىك الەۋەتى تانىستىرىلدى.
«وزبەكستان مەن قازاقستاننىڭ تىعىز ارىپتەستىگى, دوستىعى اياسىندا استانادا قالا تۇرعىندارى مەن قوناقتارىنا ارنالعان ءىس-شارالار ءوتىپ جاتىر. بۇل – دوستىعىمىز بەن ارىپتەستىگىمىزدىڭ جارقىن مىسالى. ءبىز ەلدەرىمىزدىڭ مادەنيەتى مەن ءداستۇرىنىڭ بايلىعىن كورسەتە وتىرىپ, وزبەكستان مەن قازاقستان اراسىنداعى بايلانىستى نىعايتۋعا ۇمتىلامىز», دەدى تاشكەنت اكىمىنىڭ ءباسپاسوز حاتشىسى گۋلنوزا قاسىموۆا.
سونداي-اق ول تاشكەنتتىڭ استانا قالاسىنداعى مادەنيەت كۇندەرى اياسىندا بىرنەشە بيزنەس-فورۋم ۇيىمداستىرىلاتىنىن اتاپ ءوتتى. كەلۋشىلەر سامسا, پالاۋ مەن وزبەكتىڭ ءداستۇرلى تاعامى – حالەمنەن ءدام تاتا الادى.
«ەكى ەل پرەزيدەنتتەرىنىڭ باستاماسىمەن قازاقستان مەن وزبەكستان اراسىنداعى قارىم-قاتىناس ودان ءارى نىعايا ءتۇستى. قازىرگى ءىس-شارا – سونىڭ ءبىر كورىنىسى», دەيدى تاشكەنت قالالىق تۋريزم باسقارماسىنىڭ باس مامانى شوحرۋح نوسيروۆ.
استانانىڭ امفيتەاترىندا وزبەكستاننىڭ بەلگىلى ارتىستەرى, اتاپ ايتقاندا, قازاقستان مەن وزبەكستاننىڭ حالىق ءارتىسى فاررۋح زاكيروۆ, وپەرا ءانشىسى, وزبەكستاننىڭ حالىق ءارتىسى جەڭىسبەك پيازوۆ, «باحور» ۇلتتىق بي ءانسامبلى, باسقا دا ەسترادا جۇلدىزدارى ونەر كورسەتتى.
سونداي-اق قالا تۇرعىندارى مەن قوناقتارى ءداستۇرلى وزبەك تاعامدارىنىڭ ءدامىن تاتتى. تاشكەنتتىڭ ەڭ تانىمال تاعامى – توي پالاۋىنا قىزىعۋشىلىق تانىتقاندار كوپ بولدى. ودان بولەك, استانالىقتار نارىن, كاۋاپ, سامسا سەكىلدى كورشىنىڭ ۇلتتىق تاعامدارىنىڭ جاسالۋ ءادىسىن سۇراپ, اۋىز ءتيدى.