قاراعاندى وبلىسىندا ەكى كىشكەنتاي قىزىن تۇنشىقتىرىپ ولتىرگەن 20 جاستاعى كەلىنشەك 20 جىلعا سوتتالدى. ال ءتىرى قالعان ءبىر جاسقا تولار-تولماس نارەستەسى بالالار ۇيىنە وتكىزىلدى, دەپ حابارلايدى Egemen.kz.
كتك تەلەارناسى جازعانداي, ول تۇڭعىشىن 16 جاسىندا بوسانىپ, ودان كەيىن تاعى ەكى بالا تاپقان, كەيىنگى ۋاقىتتا باسقا ەر كىسىمەن ازاماتتىق نەكەدە بولعان. ەكەۋى تەمىرتاۋ ىرگەسىندەگى گاگارين اۋىلىندا تۇرعان.
4 ساۋىردە ەرى جۇمىسىمەن قالاعا كەتكەن. سوتتاعى تۇسىنىكتەمەلەرىنە سايكەس, ول تاماق سۇراپ جىلاي بەرگەن ەكى جانە ءتورت جاستاعى قىزدارىن تىنىشتاندىرماق بولعان. توسەككە جاتقىزىپ, ۇستىنە كورپە جاۋىپ تاپجىلتپاي باسىپ وتىرادى.
"جىلاعانىن قويعاندا اشسام, ءولىپ قالىپتى" دەپ اقتالعان. "بايقاۋسىزدا بولدى" دەپ جازانى جەڭىلدەتۋدى سۇرادى, بىراق ونىڭ ىستەگەنى "قاساقانا كىسى ءولتىرۋ" بابىنا جاتقىزىلدى. ءتىپتى ەمىزۋلى بالاسى بار ەكەنى دە جازانى جەڭىلدەتكەن جوق.
- ءجاسوسپىرىم بالالارى بولسا, بۇل - قىلمىستىق جازانى جەڭىلدەتەتىن جاعداي. الايدا قر جوعارعى سوتىنىڭ ءتيىستى نورماتيۆتىك قاۋلىسىنا سايكەس, ەگەر قىلمىس ءوزىنىڭ ءجاسوسپىرىم بالاسىنا قاتىستى جاسالسا, قىلمىستىق جازانى جەڭىلدەتەتىن ءمان-جايعا جاتقىزىلمايدى. ول "بايقاۋسىزدا ءولتىردىم" دەپ وتىر, بىراق ونىڭ قاساقانا ولتىرگەنى جونىندە كىناسى ءىس ماتەريالىمەن, ساراپتاما قورىتىندىلارىمەن دالەلدەندى, - دەدى قاراعاندى وبلىسى مامانداندىرىلعان اۋدانارالىق قىلمىستىق ىستەر جونىندەگى سوتىنىڭ توراعاسى بەكزات شالعىمباەۆ.