بۇل تۋرالى مەملەكەت باسشىسى قاسىم-جومارت توقاەۆ «Egemen Qazaqstan» گازەتىندە جاريالانعان «ورتالىق ازيا رەنەسسانسى: ورنىقتى دامۋ جانە وركەندەۋ جولى» اتتى ماقالاسىندا اتاپ ءوتتى, دەپ جازادى Egemen.kz.
«كوپجاقتى ىقپالداستىقتىڭ بەرىك ەكونوميكالىق نەگىزىن قالىپتاستىرۋ ماسەلەسى ءبىزدىڭ ەلدەرىمىزدىڭ اينىماس مىندەتى بولىپ قالا بەرەتىنى ءسوزسىز. وڭىردەگى مەملەكەتتەردىڭ بىرلەسكەن كۇش-جىگەرى مەن قۋاتتى ەكونوميكالىق الەۋەتىنىڭ ارقاسىندا ورتالىق ازيا اۋماعى ساۋدا, ينۆەستيتسيا, عىلىم جانە يننوۆاتسيا سالاسىندا زور مۇمكىندىكتەرى بار كەڭىستىككە اينالىپ وتىر.
ەلدەرىمىزدىڭ جالپى اۋماعى – 3 882 000 شارشى شاقىرىم, حالقىنىڭ سانى 80 ميلليوننان اسادى, ال ىشكى جالپى ءونىمى 450 ميلليارد دوللارعا جۋىقتايدى. الەمدەگى ۋران قورىنىڭ شامامەن 20, مۇنايدىڭ 17,2, تابيعي گازدىڭ 7 پايىزى – ءبىزدىڭ ايماقتىڭ ەنشىسىندە. ورتالىق ازيا كومىر وندىرۋدەن الەمدە 10-شى, ەلەكتر ەنەرگياسىن وندىرۋدەن 19-ورىندا تۇر», دەپ جازدى پرەزيدەنت.
مەملەكەت باسشىسىنىڭ ايتۋىنشا, ءبىزدىڭ ەكونوميكالارىمىز ءبىرىن-ءبىرى تولىقتىرىپ وتىرادى. بۇل جاعداي ەلدەرىمىزدىڭ سىرتقى فاكتورلارعا لايىقتى توتەپ بەرۋىن قامتاماسىز ەتىپ, ساۋدا-ءوندىرىس سالاسىنداعى تسيكلدەردى ارتاراپتاندىرۋعا مۇمكىندىك بەرەدى. بىرلەسكەن ەكونوميكالىق جوبالاردى ءتيىمدى ىسكە اسىرۋ وسى ۇدەرىسكە وڭ ىقپال ەتە الادى.
«ەكونوميكالارىمىزدى تەحنولوگيالىق جاعىنان دامىتۋ – ماڭىزدى مىندەت. ءبىز تابيعي رەسۋرستارعا تاۋەلدىلىكتەن بىرتىندەپ ارىلۋىمىز قاجەت. وسى رەتتە مەديا, كينو, مۋزىكا, ديزاين, ءبىلىم بەرۋ جانە اقپاراتتىق تەحنولوگيالار سالاسىن قامتيتىن كرەاتيۆتى يندۋستريا مەن تسيفرلاندىرۋ ءىسى ەكونوميكاعا تىڭ سەرپىن بەرەتىن كۇشكە اينالا الادى. ءوڭىر ەلدەرىنىڭ وسى باعىتتا بىرلەسكەن جوبالار ازىرلەۋگە الەۋەتى دە جەتەدى», دەپ جازىلعان ماقالادا.
سونداي-اق تسيفرلىق جانە كرەاتيۆتى يندۋستريانىڭ جاپپاي قارقىن الۋى شيكىزاتقا سۇيەنگەن ەكونوميكادان زياتكەرلىك سيپاتتاعى وندىرىسكە دايەكتى تۇردە كوشۋگە ىقپال ەتەتىن بولادى.
«ورتالىق ازيانىڭ ىقپالداستىعى ءبىزدىڭ ەلدەرىمىزدىڭ ۇلتتىق ەكونوميكالىق ءوسىمىنىڭ باستى سەبەپشىسى بولماعانىمەن, ونىڭ نەگىزگى قاينار كوزىنىڭ ءبىرى بولا الاتىنىنا سەنىمدىمىن», دەدى ق.توقاەۆ.