وزبەكستان رەسپۋبليكاسىنىڭ پرەزيدەنتى شاۆكات ميرزيوەۆتىڭ ەلىمىزگە مەملەكەتتىك ساپارى اياسىندا ەلوردا تورىندەگى Chaplin كينوتەاترىندا وزبەك كينوسىنىڭ كۇندەرى باستالدى. ەلوردا تۇرعىندارى مەن قوناقتارىنا وزبەك كينەماتوگرافتارىنىڭ ەكى ءفيلمى تەگىن ۇسىنىلدى.
العاشقى كۇنى رەجيسسەر م.ەركينوۆتىڭ بىلتىر تۇسىرىلگەن «ابدۋللا وريپوۆ: تاۋەلسىزدىك ءانشىسى» كينوسى ۇلكەن ەكرانعا شىقتى. كينوكارتينادا وزبەكستان مەملەكەتتىك ءانۇرانى ءماتىنىنىڭ اۆتورى, كورنەكتى اقىنى ابدۋللا ءوريپوۆتىڭ ءومىرى مەن شىعارماشىلىعى تۋرالى باياندالادى. كورەرمەن اقىننىڭ بالالىق جانە جاستىق شاعىنا ساياحاتتاپ, ونىڭ وزبەك ادەبيەتى مەن مادەنيەتىنە قوسقان ەلەۋلى ۇلەسىنەن حاباردار بولا الادى.
ال ەكىنشى كۇنى وتباسىلىق قۇندىلىق تاقىرىبىنداعى «ياشا, حوتين!» كومەدياسى ۇسىنىلادى. سيۋجەت جەلىسى زەينەتكە شىققان جالعىزباستى ۇمىتشاق كەيىپكەردىڭ اينالاسىندا ءوربيدى. فيلم ەرلى-زايىپتىلار, اتا-انالار مەن بالالار اراسىنداعى ءوزارا سۇيىسپەنشىلىك پەن قامقورلىقتىڭ, ىستىق ىقىلاستىڭ ماڭىزىن باياندايدى. ياعني قازىرگى جۇمىسباستى قوعامداعى كوپتەگەن شاڭىراققا جەتىسپەيتىن ۋاقىتتىڭ قادىرىن ۇعىندىرادى. تاربيەلىك مانگە يە كينوكارتينا وتباسى ينستيتۋتىنىڭ باعدارىن كوزدەپ, جەڭىل ازىلمەن جەتكىزەدى.
كەز كەلگەن ۇلتتىڭ كينوسى ءوز حالقىنىڭ ادەت-عۇرپىنان, سالت-داستۇرىنەن, تابيعات-بولمىسىنان تامىر تارتاتىنى ءسوزسىز. قازاق كورەرمەنىنە ۇسىنىلعان وزبەك فيلمدەرىندە دە تۋعان توپىراقپەن نازىك ءبىر بايلانىس سەزىلەدى. عيبراتقا تولى داستۇرىنە, مىڭ قىرلى مادەنيەتىنە كەزەكتى رەت كۋا بولىپ قايتتىق.