كەشە پارلامەنت سەناتىنىڭ شاحمات بويىنشا «Senat Open» اشىق كۋبوگىنىڭ جارتىلاي فينالداعى بەس ءتۋرنيرىنىڭ ءبىرى اقتوبەدە ءوتتى. سەنات اياسىندا قازاقستان شاحمات فەدەراتسياسى مەن Kazchess العاش رەت ۇيىمداستىرعان تۋرنيرگە بارلىق وبلىستار مەن رەسپۋبليكالىق ماڭىزى بار قالالار ءماسليحاتتارىنىڭ دەپۋتاتتارى, وبلىستىق جانە قالالىق قوعامدىق كەڭەستەردىڭ مۇشەلەرى جانە باق وكىلدەرى قاتىستى.
اقتوبە, اتىراۋ, ماڭعىستاۋ جانە باتىس قازاقستان وبلىستارىنىڭ ىرىكتەۋ كەزەڭدەرىندە شاحماتتان جەڭىمپاز بولعان 100 اۋەسقوي اقتوبەدە وتكەن جارتىلاي فينالدا باق سىنادى. جارتىلاي فينال ويىندارىنىڭ اشىلۋ سالتاناتىنا وبلىس اكىمدىگى مەن ءماسليحاتىنىڭ جانە قازاقستان شاحمات فەدەراتسياسىنىڭ وكىلدەرى قاتىستى.
9-تۋر راپيد قورىتىندىسى بويىنشا «Senat وpen» فينالىنا قاتىساتىن «باتىس» ءوڭىرىنىڭ جيىرما بەس وكىلى انىقتالدى. ولاردىڭ ىشىندەگى ءىس-شاراعا قاتىسىپ, ۇزدىك ويىنشى اتانعان دەپۋتاتتار, جۋرناليستەر, قوعام بەلسەندىلەرى, ايەلدەر مەن 60 جاستان اسقان قاتىسۋشىلار ارنايى سەرتيفيكاتپەن ماراپاتتالدى.
تۋرنير بارىسىندا توعىزقۇمالاقتان حالىقارالىق دارەجەدەگى سپورت شەبەرى, ەكى دۇركىن الەم چەمپيونى, قازاقستاننىڭ ەڭبەك سىڭىرگەن جاتتىقتىرۋشىسى نۇربەك قابيەۆ ءبىر مەزگىلدە ءماسليحات دەپۋتاتتارىمەن, وبلىستىق جانە قالالىق قوعامدىق كەڭەستەردىڭ مۇشەلەرىمەن, باق وكىلدەرىمەن ويىن وتكىزدى.