مەملەكەتتىك ءبىلىم گرانتىنا قول جەتكىزە الماي قالعاندار ءۇشىن ءالى دە گرانت جەڭىپ الۋعا مۇمكىندىك بار, دەپ حابارلايدى Egemen.kz.
بۇل تۋرالى ءماجىلىس دەپۋتاتى اسحات ايماعامبەتوۆ الەۋمەتتىك جەلى ارقىلى اقپارات ءبولىستى.
- گرانتتى جەڭىپ الماعاندارعا نە ىستەۋگە بولادى؟ كوممەنتتەردە جانە جەكەمە بىلتىرعى جىلداعىداي وسىنداي مازمۇنداعى سۇراق تاعى دا كوپ قويىلىپ جاتىر. سوندىقتان قىسقاشا ءوز ويىمدى قايتالايىن. باستىسى ءالى دە گرانتتى جەڭىپ الۋعا مۇمكىندىك بار, - دەپ جازدى دەپۋتات.
بىرىنشىدەن, يگەرىلمەگەن بىرنەشە مىڭ گرانت قايتادان ۇيلەستىرىلەدى. ياعني گرانت العان تالاپكەرلەردەن كەيىن تۇرعان تالاپكەرلەرگە ۇبت-دا جيناعان ۇپاي سانىنا سايكەس بەرىلەدى. سونى كۇتۋگە بولادى.
ەكىنشىدەن, اكىمدىكتەردىڭ گرانتتارى بار. بىرنەشە مىڭ گرانت جەرگىلىكتى بيۋدجەتتەن بولىنەدى.
ۇشىنشىدەن, «قازاقستان حالقىنا» قورىنىڭ گرانتتارى تاعى بار.
تورتىنشىدەن, كەيبىر تالاپكەرلەر ءتۇرلى سەبەپ بويىنشا جەڭىپ العان گرانتتارىنان باس تارتادى. ولاردىڭ سانى دا از بولمايدى. ول گرانتتار دا قايتا تاعايىندالادى.
بەسىنشىدەن, ءتىپتى ەشتەڭە بولماسا, ۋنيۆەرسيتەتكە اقىلى تۇردە ءتۇسىپ, كەيىن جاقسى وقىپ, GPA جوعارى بولسا, ءبىلىم الۋ كەزىندە بوساعان بوس گرانتتى ۇتىپ الۋعا بولادى.
التىنشى, «gap year» ارقىلى ءبىر جىل دايىندالىپ, قايتادان ۇبت تاپسىرىپ, گرانتتى جەڭىپ الۋعا بولادى.
“ول مەنىڭ ءوز باسىمنان وتكەن وقيعا. بۇل دا جاقسى شەشىم”, دەپ ءتۇسىندىردى ءماجىلىس دەپۋتاتى.
جەتىنشىدەن, كوللەدجگە تۇسۋگە بولادى. كوللەدجدە گرانت كوپ, قاجەتتى ماماندىقتار بويىنشا كوللەدج بىتىرگەندەر نارىقتا تاپشى. كەرەك بولسا, كەيىن ءارى قاراي جوو-عا ءتۇسىپ, قىسقا مەرزىمدە جوعارى ءبىلىم الىپ شىعۋعا دا بولادى.
- كورىپ وتىرعاندارىڭىزداي مۇمكىندىكتەر وتە كوپ. ءبارى الدا. تولىق مالىمەت الۋ ءۇشىن ۋنيۆەرسيتەتتەردىڭ قابىلداۋ كوميسسياسىنا جولىعۋ كەرەك, - دەيدى اسحات ايماعامبەتوۆ.
ەسكە سالا كەتسەك, بۇگىن قر عىلىم جانە جوعارى ءبىلىم مينيسترلىگى مەن ۇلتتىق تەستىلەۋ ورتالىعىنىڭ الەۋمەتتىك جەلىلەرىندە 2024-2025 وقۋ جىلىنا ارنالعان ءبىلىم گرانتى يەگەرلەرىنىڭ ءتىزىمى جاريالاندى.