قىزىلوردا وبلىسىندا ەلىمىزدە اتوم ەلەكتر ستانساسىن سالۋ ماسەلەسى جاريا تالقىلاندى. ۇكىمەتتىك ەمەس ۇيىمداردىڭ وڭىرلىك اليانسى مەن وبلىستىق قوعامدىق كەڭەس ۇيىمداستىرعان شاراعا مەملەكەتتىك مەكەمە, قوعامدىق كەڭەس وكىلدەرى, قوعام قايراتكەرلەرى, ەڭبەك ارداگەرلەرى, ەكولوگتەر, ساياسي پارتيا مەن باق وكىلدەرى جانە ءوڭىر تۇرعىندارى قاتىستى.
جيىن باسىندا ەنەرگەتيكا مينيسترلىگى, «ۇلتتىق يادرولىق ورتالىق», «قازاقستان اتوم ەلەكتر ستانسالارى» جشس جانە «يادرولىق فيزيكا ينستيتۋتى» وكىلدەرى ءسوز سويلەدى. ولار اەس سالۋدىڭ ارتىقشىلىعى, جۇمىس قاعيداتى جانە اتوم ستانسالارىنىڭ قورشاعان ورتاعا جانە ادام دەنساۋلىعىنا اسەر ەتۋ دەڭگەيى تۋرالى كەڭىنەن ايتتى. ماماندار اتوم ەنەرگەتيكاسىن دامىتۋداعى تەحنيكالىق اسپەكتىلەر, الەۋەت جانە اەس سالۋ كەزىندەگى ەلدىڭ دامۋ پەرسپەكتيۆاسى تۋرالى ەگجەي-تەگجەي حاباردار ەتتى. تالقىلاۋ كەزىندە جيىن قاتىسۋشىلارى وزدەرىن تولعاندىرعان سۇراقتارىن قويدى. سۇراقتىڭ باسىم بولىگى – اەس قاۋىپسىزدىگى مەن ونى پايدالانۋعا, جوبانى قارجىلاندىرۋعا, كادرلار دايارلاۋعا, سونداي-اق قازىرگى جاعدايعا جانە وتاندىق ەنەرگەتيكالىق كەشەننىڭ دامۋ بولجامىنا قاتىستى بولدى.
«ەلىمىزدە اەس سالۋ ماسەلەسى كوپتەن كوتەرىلىپ كەلەدى. مەن پرەزيدەنتتىڭ وسى ماسەلە بويىنشا رەفەرەندۋم وتكىزۋ تۋرالى باستاماسىن تولىق قولدايمىن. ويتكەنى مۇنداي ماڭىزدى مىندەتتى شەشۋدە حالىق پىكىرى قاجەت. ءوزىم كوپتەگەن ەلدە بولدىم, قازىر رەسپۋبليكامىزدا اتوم ەلەكتر ستانساسىن سالۋ قاجەت ەكەنىنە كوزىم جەتتى. بىرىنشىدەن, ەلەكتر قۋاتىنىڭ تاپشىلىعى ارتىپ كەلەدى. ءبىز ۋران وندىرۋدەن الەمدە ءبىرىنشى ورىندامىز. ال بۇل سالانى ودان ءارى دامىتۋدا قيىندىق بولماۋ كەرەك. ەكىنشىدەن, جاڭا ەنەرگەتيكالىق جوبا عىلىمي-تەحنيكالىق پروگرەسكە سەرپىن بەرەدى. ۇشىنشىدەن, كوپتەگەن جەتەكشى ەلدە اەس بار. ەلىمىز دە الەمدىك دەرجاۆالارعا ىلەسە وتىرىپ, زامان تالابىنا ساي بولۋى كەرەك. تاعى ءبىر ماسەلە – اەس-تى كىم جانە قايدا سالادى؟ بۇعان الەمدىك تاجىريبەنى قولدانۋ ماڭىزدى. حالقىمىز رەفەرەندۋمدا وسىنداي ماڭىزدى ءارى قاجەتتى اەس قۇرىلىسىن قولدايدى دەپ ويلايمىن», دەيدى سەناتورلار كەڭەسىنىڭ مۇشەسى, ساياسي عىلىمدار دوكتورى, پروفەسسور مۇرات باقتيار ۇلى.
بۇل پىكىردى ي.ابدىكارىموۆ اتىنداعى قىزىلوردا اگرارلىق-تەحنيكالىق جوعارى كوللەدجىنىڭ ديرەكتورى باقىتجان ابدىكارىموۆ تە قولدايدى.
«بۇگىنگى وتىرىستا ەڭ ماڭىزدى ءۇش تاقىرىپ – اەس سالۋ قاجەتتىلىگى, ونىڭ قاۋىپسىزدىگى جانە حالىققا اەس قانداي پايدا اكەلەتىنى تالقىلاندى. ارينە, چەرنوبىل اپاتى جۇرتشىلىق ساناسىنان وشە قويعان جوق. بىراق وسىعان قاراماستان بۇگىندە ۋكراينادا 5 اەس جۇمىس ىستەيدى. فۋكۋسيماداعى اپاتتان كەيىن دە ادامدار اتوم ەنەرگياسىنان باس تارتقان جوق. قازىر بۇل ەلدە 21 رەاكتور جۇمىس ىستەيدى. جالپى, الەمنىڭ 18 ەلى 57 گۆت ەلەكتر ەنەرگياسىن وندىرەدى. قازىر ەنەرگياعا ۇلكەن قاجەتتىلىك تۋىپ وتىر. ال اەس – جاڭا ءارى زور قۋات كوزى. جەر بايلىعىن, قازىناسىن حالىق يگىلىگىنە جۇمساۋىمىز كەرەك. سوندىقتان ءبىز ءوز ەلىمىزدە اتوم ەلەكتر ستانساسىن سالۋعا ءتيىسپىز», دەيدى ول.
باسقا قاتىسۋشىلار دا اەس قۇرىلىسىنىڭ وزەكتىلىگى, ونىڭ الەۋمەتتىك-ەكونوميكالىق دامۋ, ونىڭ ىشىندە ەنەرگەتيكالىق كەشەندى ۇلعايتۋ, ادامداردىڭ ءومىر ءسۇرۋ ساپاسىن ارتتىرۋدا ماڭىزدىلىعىن اتاپ ءوتتى. قىزىلوردالىقتاردىڭ پىكىرىنشە, اۋقىمدى جوبا تۋرالى جۇرتشىلىقتى ءالى دە كەڭىنەن حاباردار ەتۋ قاجەت.
ۇيىمداستىرۋشىلاردىڭ ايتۋىنشا, جوبانى ودان ءارى ىلگەرىلەتۋدە بارلىق ايتىلعان پىكىرلەر مەن ۇسىنىستار ەسكەرىلەدى. ەسكە سالايىق, بيىل ماۋسىم ايىندا مەملەكەت باسشىسى رەفەرەندۋمنىڭ كۇزدە وتەتىنىن مالىمدەگەن ەدى. پرەزيدەنت اتاپ وتكەندەي, ەلدە شىن مانىندە, اتوم ەنەرگەتيكاسىن دامىتۋ ءۇشىن زور مۇمكىندىكتەر بار. ونى دۇرىس, ءتيىمدى پايدالانعان ءجون. ال بۇل ماسەلە بويىنشا تۇپكىلىكتى شەشىمدى حالىق قابىلدايتىن بولادى.