بيىل ءشوپ شۇيگىن. مالساق قاۋىم شىنداپ كىرىسسە, ەكىجىلدىق مال ازىعىن ەركىن جيناپ الۋعا تولىق مۇمكىندىك بار. كەي جىلدارى ساراڭسىپ شالعىنى شالعىعا ىلىكپەيتىن تابيعي شابىندىقتىڭ ءوزى قالى كىلەمدەي قۇلپىرىپ تۇر.
زاپوروجە سەلوسىنداعى «ستيمۋل» شارۋا قوجالىعى ءشوپ شابۋعا ماۋسىم ايىنىڭ ورتاسى اۋا كىرىسكەن بولاتىن. قازىر مال قورالارى ماڭىندا تايلانىپ, بۋىلعان 300 توننا ءشوپ ءۇيۋلى تۇر. 200 باس ءىرى قارا, 800 جىلقى باعىپ وتىرعان شارۋا قوجالىعىنا قىستان قىسىلماي شىعۋ ءۇشىن كەمىندە مىڭ توننا ءشوپ قاجەت. اتتەڭ, كۇن سايىن دەرلىك جاۋىن جاۋىپ, العا باسقان قادامىن ىلگەرى اتتاتپاي تۇر. ايتسە دە ءشوپ بۋىنى قاتقانشا ەڭسەرە جۇمىس ىستەۋگە تالپىنعان شوپشىلەر اۋا رايىنىڭ ءاربىر اشىق ءساتىن ءتيىمدى پايدالانىپ, اتجالعا تۇسىرىلگەن ءشوپتى ءالسىن-ءالسىن قوپارا كەپتىرىپ, جەلگە قاقتىرىپ, وراما دايىنداپ جاتىر. ەگەر اۋا رايى مۇمكىندىك بەرسە, ەكىجىلدىق ءشوپ قورىن جاساپ الماق.
– باعىمداعى مال قىستان كۇيلى شىعۋى ءۇشىن بۇرىنعىداي جالعىز ءشوپ پەن سابانعا يەك ارتۋعا بولمايدى, – دەيدى شارۋاشىلىق باسشىسى سەرگەي چەپۋرنوي. – پىشەندەمە دە دايىنداماقپىز. كەيىنگى جىلدارى مال ازىعىن بايىتۋعا باعىت الدىق. كەيىنگى ەكى جىل بويى ارپا مەن س ۇلىنى ارالاستىرىپ, ۇنتاقتاپ, مال ازىعىن دايىنداۋعا كوشتىك. ول ءۇشىن مال ازىعىن دايىندايتىن شاعىن زاۋىت سالىپ الدىق.
بۇل جۇمىستى ءوندىرىس شەبەرى اناتولي كولەسنيك قاداعالايدى ەكەن. ال شابىندىقتا ۋاقىتپەن ساناسپاي جۇمىس ىستەپ جاتقان مايتالمان مەحانيزاتورلاردىڭ ءبىرى – ولجاس اۋباكىروۆ. ول «بەلارۋس» تراكتورىن جۇرگىزەدى. تەحنيكا تىزگىندەگەنىنە ون جىل بولىپتى. مەحانيزاتورلار كۋرسىن اياقتاپ كەلگەن سوڭ وزگە شارۋاشىلىقتا جۇمىس ىستەگەن. اۋىل ادامدارى ءبىر-ءبىرىن جاقسى تانيدى ەمەس پە, الدىنان جۇمىس ۇركىپ وتىراتىن ولجاستىڭ تىندىرىمدى ەڭبەگىن كورگەن شارۋا قوجالىعىنىڭ باسشىلارى ات-تۇيەدەي قالاپ, وزدەرىنە شاقىرتىپ الىپتى. ءبىر جاقسى جەرى شارۋا قوجالىعىنداعى تەحنيكانىڭ ءبارى ءونىمدى جۇمىس ىستەيتىن شەتەلدىك تراكتورلار. ايتپاقشى, ولجاس – اكە جولىن قۋعان ورەندەردىڭ ءبىرى. اكەسى ەسىلباي – بۇرىنعى قيما اۋدانىنىڭ ەسىل كەڭشارىندا تابانى كۇرەكتەي قىرىق جىل جۇمىس ىستەگەن مەحانيزاتورلاردىڭ ءبىرى.
ولجاستىڭ ءوز ايتۋىنا قاراعاندا, مەكتەپتە وقىپ جۇرگەنىندە-اق تراكتور تىزگىندەگەن اكەسىنىڭ الدىنا وتىرىپ, جۇمىس قايناپ جاتقان دالاعا بارعاندى جاقسى كورگەن. اكەسى كوڭىلى تۇسكەندە سايىن دالادا تراكتور تىزگىنىن دە ۇستاتاتىن. كەكىلىنەن سيپاپ وتىرىپ كەلىستى كەڭەسىن بەرەتىن. وسىلايشا, ءوزىنىڭ ادال ەڭبەگىن جالعاستىراتىن ارلى ۇرپاعىن تاربيەلەدى. «ۇيادا نە كورسەڭ, ۇشقاندا سونى ىلەرسىڭ» دەگەندەي, ولجاس تا سايىن دالا توسىندە اقىق ءدان ءوسىرىپ, اقتىلى مال باعاتىن دالا ەرلەرىنە ۇقساعىسى كەلدى. ونىڭ ىشىندە اسقار تاۋ اكە بەينەسى, ونىڭ ەسەلى ەڭبەگى, پاراساتتى بەينەسى ومىرشەڭ ونەگە ىسپەتتى.
ونىنشى جىل مەحانيزاتور بولىپ كەلە جاتسا دا, بىلمەيتىن تۇستارى بولىپ قالادى. وندايدا كورشى اۋىلدا تۇراتىن اكەسىنە تەلەفون سوعىپ حابارلاسادى. قازاقتىڭ جالپاق تىلىمەن ايتقاندا, «اقىل قالتاسى» جانىندا.
ءسوز اراسىندا زاپوروجە سەلوسى اۋدانداعى ۇلگىلى ەلدى مەكەندەردىڭ ءبىرى ەكەنىن ايتا كەتسەك, ارتىق بولماس. اۋىلدا قالىپ, تۋعان ەلدىڭ ءتۇتىنىن ءتۇزۋ ۇشىرۋعا ءبىر ازاماتى رەتىندە اتسالىسۋدى پارىزى ساناعان ولجاستىڭ كوڭىلى قالاعان جۇمىسى, تۇراقتى تابىسى بار. ءبىر-بىرىمەن توننىڭ ىشكى باۋىنداي ارالاسىپ, ءتىل تابىسا الاتىن ۇجىمنىڭ ورتاسىندا. ودان ارتىق ەشتەڭە تىلەمەيدى دە.
اقمولا وبلىسى,
جاقسى اۋدانى