كانادانىڭ بەدەلدى «Fantasia Film Festival» كينوفەستيۆالىندە قازاق تۋىندىسى قازىلار القاسى تاراپىنان جوعارى باعاعا يە بولدى. باستى رولدەردى سومداعان بەرىك ايتجانوۆ پەن اننا ستارچەنكو فەستيۆالدىڭ ۇزدىك اكتەرلەرى اتاندى.
فيلم ۇجىمى ءۇشىن ايتۋلى وقيعا – وپەراتور ەركىنبەك پتىراليەۆ وسكار كينواكادەمياسىنىڭ مۇشەلىگىنە قابىلدانۋى بولىپ وتىر. ول – «وسكار» سىيلىعىنا داۋىس بەرۋگە قاتىساتىن العاشقى قازاق ازاماتى.
رەجيسسەر ءادىلحان ەرجانوۆتىڭ «دالا قاسقىرلارى» ءفيلمى بۇعان دەيىن «Reims polar 2024» كينوفەستيۆالىندە فرانتسۋز سىنشىلار قاۋىمداستىعىنىڭ جۇلدەسىن جەڭىپ العان بولاتىن. فيلم تارتىپسىزدىك كەزىندە ۇرلانعان ۇلىن ىزدەپ جۇرگەن تامارا ەسىمدى ايەلدىڭ جان مۇڭىن باياندايدى. ول كۇماندى دەتەكتيۆتىڭ كومەگىنە جۇگىنىپ, كەيىن كۇتپەگەن وقيعالارعا تاپ بولادى. ايتا كەتەيىك, كينوكارتينا مادەنيەت جانە اقپارات مينيسترلىگىنىڭ قولداۋىمەن ءتۇسىرىلدى.