استانادا وتەتىن V دۇنيەجۇزىلىك كوشپەلىلەر ويىندارى قارساڭىندا كوكپاردان قازاقستان ۇلتتىق قۇراماسى الماتى وبلىسىندا وقۋ-جاتتىعۋ جيىندارىن وتكىزىپ جاتىر, دەپ حابارالايدى Egemen.kz ۇلتتىق سپورت قاۋىمداستىعىنىڭ ءباسپاسوز قىزمەتىنە سىلتەمە جاساپ.
ۇلتتىق قۇرامانىڭ باس باپكەرى اقىلباي مانكەەۆتىڭ ايتۋىنشا, وسى وقۋ-جاتتىعۋ جيىنى اياسىندا قىركۇيەكتە وتەتىن ويىندارعا قاتىساتىن جىلقىلار دايىندالىپ جاتىر. بارلىعى 40 جىلقىنىڭ ىشىنەن مىقتىلارى ىرىكتەلىپ الىنادى. ونىڭ سوزىنشە, كوماندا دايىندىعى قازىر جاقسى دەڭگەيدە. ۇلتتىق قۇراماعا قىرعىزستان مەن وزبەكستاننان كەلگەن كوماندالار مىقتى قارسىلاس بولا الادى.
«ەكى ايدان بەرى 5-ءشى دۇنيەجۇزىلىك كوشپەلىلەر ويىندارىنا بەلسەندى دايىندالىپ جاتىرمىز. ەلىمىزدىڭ نامىسىن ابىرويمەن قورعايمىز دەپ ۇمىتتەنەمىز. وسىنداي ماڭىزدى سپورتتىق جارىستىڭ ەلىمىزدە ءوتىپ جاتقانى بىزگە ۇلكەن جاۋاپكەرشىلىك جۇكتەيدى. ءبىرىنشى وقۋ-جاتتىعۋ جيىنىندا ءوزىمىزدىڭ كۇش-قايراتىمىزعا باسا ءمان بەرسەك, ەندى جىلقىلاردى دايىنداپ جاتىرمىز», دەدى كوكپاردان ۇلتتىق قۇراما مۇشەسى ادىلەت مامىت.
ەستەرىڭىزگە سالا كەتەيىك, رەسپۋبليكالىق كوكپار فەدەراتسياسى ۇلتتىق سپورت تۇرلەرى قاۋىمداستىعىنىڭ قۇرامىنا كىرەدى. سونىمەن قاتار قاۋىمداستىق قۇرامىندا بايگە, جامبى اتۋ, اۋدارىسپاق, ساداق اتۋ, قۇسبەگىلىك, اسىق اتۋ, تەڭگە ءىلۋ, JORYQ جانە ت.ب. فەدەراتسيالار بار. ال قاۋىمداستىقتى بەلگىلى كاسىپكەر, مەتسەنات, Altyn Qyran Foundation قوعامدىق قورى قامقورشىلىق كەڭەسىنىڭ توراعاسى يسلامبەك سالجانوۆ باسقارادى.