كەرەكۋدەگى «كرەندەل» كاسىپورنى – ءتۇرلى-ءتۇستى كۋلينارلىق ونىمدەر, ءدامدى توقاشتار جانە تورت-تاتتىلەر ءوندىرۋ بويىنشا وبلىستا بالاماسى جوق كومپانيا. برەندتىك اتاۋى تانىمال فيرما جۇمىسىنىڭ سوڭعى جىلدارى شيراي تۇسۋىنە باس ديرەكتور ءمادينا مۇزاپاروۆانىڭ جاساپ وتىرعان ىقپالى زور.
«كرەندەلدىڭ» ءونىمىن بىلمەيتىن پاۆلودارلىق جوق. ءدال وسى جەردە سان الۋان ءتاتتى, ءدامدى توقاشتار, تورت, باۋىرساق, سامسا, قۇيماق, جارتىلاي پىسكەن جانە دايىن, مۇزداتىلعان ونىمدەر پىسىرىلەتىنىن اۋىل-قالاداعى جۇرتتىڭ ءبارى بىلەدى. تۋعان كۇن, ءارتۇرلى مەرەكە-مەيرامداردا ءداستۇرلى تۇردە «كرەندەل» تاتتىلەرى داستارقاندا تۇرادى.
كومپانيا وتاندىق نارىقتا 29 جىلدان بەرى قاناتىن كەڭگە جايىپ كەلە جاتىر. بۇگىندە ونىڭ ءونىم ءپىسىرۋ تسەحتارى عانا ەمەس, كوفەحانا, دۇكەن مەن مەيرامحانا جەلىلەرى تابىستى جۇمىس ىستەپ تۇر. كاسىپورىندا شامامەن 600 قىزمەتكەر ەڭبەك ەتەدى. كۇن سايىن تسەحتاردا 5-7 توننا ءونىم دايىندالىپ, بىردەن ساۋدا سورەلەرىنە جونەلتىلەدى.
ونىمدەرى ەلىمىزدىڭ بارلىق قالاسىندا, سونداي-اق قىتاي مەن رەسەي ەلدەرىندە تانىمال. مۇنداعى ساۋاتتى دامۋ مەن باسقارۋ فورماسى بۇگىندە كوپ كومپانيا ءۇشىن ۇلگى بولىپ وتىرعانى دا ءمالىم. كاسىپورىننىڭ قازاق حالقىنىڭ قوناقجايلىلىق قاسيەتىن گاسترونوميالىق مادەنيەت تۇرعىسىنان ارتتىرۋعا دا اسا ءمان بەرىپ وتىرعانى بايقالادى.
ساۋدا-ساتتىق سالاسى مەن مەنەدجەرلىكتىڭ قۇپياسىن ابدەن مەڭگەرىپ ۇلگەرگەن ءمادينا توقجانقىزى قىزمەت مانسابىن قاراپايىم بۋحگالتەر بولىپ باستاعان. كەيىن اۋىل شارۋاشىلىعىندا, سونىڭ ىشىندە اسىل تۇقىمدى مال ءوسىرۋ ىسىمەن اينالىسقان. ءبىراز جىلدار بەتون, تەمىر-بەتون ونىمدەرىن ءوندىرۋ, قۇرىلىس ماتەريالدارىن ساتۋ, تسەمەنت پەن ينەرتتى ماتەريالدار تاسىمالىن, قۇرىلىس-مونتاجداۋ جۇمىستارىن ۇيىمداستىرۋمەن شۇعىلدانىپتى. ال 2020 جىلدان بەرى «كرەندەل» كومپانياسىنا قوسىلىپ, كاسىپورىننىڭ جۇمىسى بويىنشا شەشىمدەر شىعارۋعا اتسالىسا باستاعان. ارادا ءتورت اي وتكەندە ول «كرەندەل» جشس اتقارۋشى ديرەكتورى, ودان كوپ ۇزاماي باس ديرەكتورى قىزمەتىن اتقارا باستادى. وسىلايشا, وتاندىق نارىقتا ءتاتتى ونىمدەرىمەن تانىمال كومپانيانىڭ ساۋدا-ساتتىق بويىنشا دامۋ ستراتەگياسىن ازىرلەپ, ونى باتىل تۇردە ىسكە اسىرا باستادى. قازىرگى ۋاقىتتا مۇندا 1000-نان استام اتاۋلى ءونىم بار. ولاردىڭ بارلىعى تۇتىنۋشىلار تاراپىنان سۇرانىسقا يە.
ء«بىزدىڭ سالادا, سونىڭ ىشىندە پاۆلودار قالاسىندا باسەكەلەستىك جوعارى دەڭگەيدە ءوسىپ كەلەدى. «كرەندەل» تەك ايماعىمىزدا عانا ەمەس, ەلىمىزدىڭ اۋماعىندا تاتتىلەر پىسىرۋدەن ءنومىر ءبىرىنشى كومپانيا بولىپ وتىرعانى ايقىن. بۇل دەڭگەيدەن تۇسپەۋ ءۇشىن بىزگە نارىقتاعى ءتۇرلى قيىندىقتان جول تاۋىپ شىعۋعا تۋرا كەلەدى. جۇمىستاعى باستى قاعيدام – ءوز ءىسىڭنىڭ پاتريوتى بولۋ. ءسۇيىپ ىستەگەن ەڭبەك قانا جەتىستىككە اكەلەدى. ەكىنشىدەن, ۇرپاعىمىز دەنى ساۋ بولىپ جەتىلۋى ءۇشىن ولار ساپالى ءارى تابيعي تاعامدى ءىشىپ-جەۋى كەرەك. بۇل تۇرعىدا ءبىزدىڭ كومپانيانىڭ تۇتىنۋشىلار الدىنداعى ارى تازا. تەحنولوگتەرىمىزدەن ۇنەمى ونىمدەرىمىزدىڭ تابيعي ءارى قۇنارلى بولۋىن تالاپ ەتەمىن. ۇشىنشىدەن, تۇتىنۋشىلاردىڭ ساتىپ الۋ مۇمكىندىگىن ەسكەرۋ. وزدەرىڭىز بايقاپ وتىرعانداي, كەيىنگى جىلدارى ەلدە قىمباتشىلىق ءۇردىسى بايقالادى. كوممۋنالدىق تاريفتەر جەكە تۇتىنۋشىلاردى قوسپاعاندا, زاڭدى تۇلعالار ءۇشىن بيىلدىڭ وزىندە 46 پايىزعا كوتەرىلىپ كەتتى. مۇنىڭ بارلىعى ونىمدەرىمىزدىڭ قىمباتتاۋىنا اكەپ سوقتىرادى. بىراق ءبىز كومپانيا ونىمدەرىنىڭ باعاسىن وسىرمەۋگە تىرىستىق. پايدا بۇرىنعىدان از تۇسەتىنىن بىلە تۇرساق تا, تۇتىنۋشىلاردىڭ ساتىپ الۋ مۇمكىندىگىمەن ساناسامىز. سەبەبى اينالانىڭ بارىندە قىمباتشىلىق ءۇردىسى پايدا بولعانىمەن, ەلدىڭ ءبارىنىڭ ەڭبەكاقىسى كوتەرىلگەن جوق. وسىنى ەسكەرۋ ماڭىزدى», دەيدى ول.
بيىل كاسىپورىن ءوز قىزمەتكەرلەرىنىڭ ەڭبەكاقىسىن بىرتىندەپ كوتەرە باستادى. ەندىگى رەتتە مەملەكەت بيزنەستىڭ كوممۋنالدىق شىعىندارىن تومەندەتۋگە كومەكتەسسە دەگەن تىلەگى بار كاسىپكەردىڭ. مەملەكەت باسشىسىنىڭ وتاندىق بيزنەستى جان-جاقتى قولداۋ تۋرالى تاپسىرماسىن ۇكىمەت پەن جوعارىداعى جاۋاپتى ۆەدومستۆولار ەسكەرسە ەكەن دەيدى.
بۇگىندە وتاندىق ءتاتتى تاعامدار سالاسىن ساپالى شيكىزاتپەن قامتۋدا ءبىراز ماسەلە بار. مىسالى, ونىمدەرگە قوسىلاتىن كوپتەگەن شيكىزات, سونىڭ ىشىندە مارگارين, ءسۇت, كىلەگەي, شوكولاد رەسەيدەن جەتكىزىلەدى. ولاردىڭ ءونىمى شىنداپ كەلگەندە قىمبات. سوندىقتان كونديتەرلىك ونىمدەر مەن تاتتىلەر دايىندايتىن كومپانيالاردى وتاندىق شيكىزاتپەن قامتيتىن ارنايى باعدارلاما جاسالسا, جامان بولماس ەدى.
«كوپ دۇنيەنى ەلىمىزدە جاساۋعا بولاتىنىنا كوزىمىز جەتىپ تۇرىپ, ءىشىم ۋداي اشيدى. ماسەلەن, كەيىنگى جىلدارى پاۆلودار وبلىسىنداعى ءۇي اۋلالارىنا, بالالارعا ارنالعان الاڭدارعا رەسەيلىك ويىن جانە جاتتىعۋ جابدىقتارى ورناتىلا باستادى. نەشە ءتۇرلى قۇرال-جابدىق كوزدىڭ جاۋىن الادى. ءدال مۇنداي ساپاداعى ءونىمدى ءوزىمىزدىڭ كاسىپورىندار دا دايىنداپ شىعارا الار ەدى. جالپى, وزگە مەملەكەتتەردەن كوپ كولەمدە ساتىپ الىپ وتىرعان تاۋارلاردى وزىمىزدە وندىرەتىن ۋاقىت جەتتى. ەسەسىنە ميلليونداعان بيۋدجەت قاراجاتىن ەلدە قالدىراتىن ەدىك», دەپ ءوزىن تولعاندىرىپ جۇرگەن ماسەلەمەن ءبولىستى.
ءمادينا توقجانقىزى بۇگىندە پاۆلودار قالالىق ءماسليحاتىنىڭ دەپۋتاتى قىزمەتىن دە ابىرويمەن اتقارىپ ءجۇر. ادامداردىڭ جەكە ماسەلەسىن شەشۋدە الدىنا جان سالمايدى. دەيتۇرعانمەن ونىسىن الەۋمەتتىك جەلىلەردە جارنامالاعاندى ۇناتپايتىنى بايقالادى. بۇعان قوسا جەرگىلىكتى مەشىت-مەدرەسەلەرگە, جالعىز باستى انالارعا ماتەريالدىق تۇرعىدان تۇراقتى كومەك كورسەتىپ كەلەدى. ومىرلىك قيىن جاعدايعا تاپ بولعان كەيبىر جانداردى كاسىپورىنعا جۇمىسقا شاقىرىپ, اياعىنا تۇرىپ كەتۋىنە جاردەمدەسكەنىن دە ەستىپ بىلدىك.
ءسوز سوڭىندا ول تۇتىنۋشىلار ريزالىعىنىڭ ولشەمى ارقىلى ءوز كومپانياسى وندىرەتىن ونىمدەردىڭ ساپاسىن تارازىلاپ وتىراتىنىن جەتكىزدى. تۇتىنۋشى – ءونىم ساپاسىنىڭ بارومەترى. ال بۇل ساۋدا-ساتتىق سالاسىندا ماڭىزدى ءرول وينايدى. ءوز تۇتىنۋشىلارىن جاقسى كورۋ, تۋعان ەلدى, جەردى ءسۇيۋ كاسىپكەر ءۇشىن بۇگىندە ومىرلىك كرەدوعا اينالعان.
پاۆلودار وبلىسى