ساداقشىلار ۇزدىك ناتيجە كورسەتتى

اشىلۋ سالتاناتى الدىندا پاريج وليمپيا­دا­سىندا ساداق اتۋدان جەكەلەي سىننىڭ ىرىكتەۋى اياقتالدى. ءبىزدىڭ كوماندادان جاقسى ناتيجەنى داۋلەتكەلدى جاڭبىرباي كورسەتتى. ول 668 ۇپايمەن 22-ساتىدان كورىندى. ال يلفات ابدۋللين 663 ۇپاي جيناپ, 29-ورىنعا تۇ­راقتادى. الەك­ساندر ەرەمەنكو – 59-ورىندا. ونىڭ ەنشىسىندە 640 ۇپاي بار.

تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتىنىڭ حابارلاۋىن­شا, ەندى وسى رەيتينگتىك كەزەڭ ناتيجەسىنە قاراي كەيىنگى جارىس جولى قۇرىلادى. ياعني 64 ەر مەرگەن بۇگىن العان ورنىنا قاراي ءبىر-بىرىمەن سىناسادى. مىسالى, 1-ورىن العان اتلەت پلەي-وفف ساتىسىندا 64-ساتىداعى سپورتشىعا قارسىلاس بولدى. ال پلەي-وفف 30 شىلدە مەن 1 تامىز ارالىعىنا جوسپارلانعان. ال كوماندالىق سايىس 29 شىلدەدەن باستاۋ الادى.

ساداق اتۋدان ەرلەر اراسىندا وليمپيادا رەكوردىن ريو-دە-جانەيرودا ۆۋدجين كيم (وڭتۇستىك كورەيا) تىركەگەن (700 ۇپاي). ال الەم رەكوردى امەريكالىق برەدي ەلليسونعا تيەسىلى (702 ۇپاي, ليما قالاسى, 2019 جىلعى 7 تامىز).

ايتا كەتەيىك, پاريجدەگى جازعى وليمپيادادا قازاقستان قۇراماسىنىڭ 80 اتلەتى 25 سپورت تۇرىنەن سىنعا تۇسەدى. XXXIII ويىندار 11 تامىزدا مارەسىنە جەتەدى.