سەمەيدەگى اپاتتى جەو-نىڭ جاي-كۇيى تەكسەرىلدى

ۇكىمەت باسشىسىنا ەنەرگەتيكا سالاسىن جانە جالپى تۇرعىن ءۇي-كوممۋنالدىق شارۋاشىلىقتى دامىتۋ جوسپارى مەن قازىرگى جاعدايى تۋرالى باياندالدى. اباي وبلىسى «قىزىل ايماقتاعى» وڭىرلەردىڭ قاتارىنا كىرەدى. وبلىس بويىنشا جىلۋ جەلىلەرىنىڭ توزۋ دەڭگەيى 64,2%-عا جەتەدى. بۇگىنگى تاڭدا 28 جوبا ىسكە اسىرىلىپ جاتىر. 37,9 شاقىرىم جەلى مەن 17 جىلۋ كوزىن سالۋ, رەكونسترۋكتسيالاۋ جانە جوندەۋ جۇمىستارى جۇرگىزىلىپ جاتىر. ەنەرگەتيكا ينفراقۇرىلىمىن جاڭعىرتۋعا 10,9 ملرد تەڭگەدەن استام قارجى ءبولىندى. وبلىس اكىمىنىڭ ورىنباسارى ديميتري گاريكوۆ وسى جىلدىڭ قورىتىندىسى بويىنشا جۇرگىزىلىپ جاتقان جۇمىستاردىڭ ناتيجەسىندە كوممۋنيكاتسيالار توزۋىنىڭ 57,7%-عا دەيىن تومەندەۋى كۇتىلىپ وتىرعانىن ايتتى.

ولجاس بەكتەنوۆ جەو-1-دە جوندەۋ جۇمىستارىنىڭ ناتيجەسىمەن تانىستى. اتاپ ايتقاندا, سۋ جىلىتۋ قازاندىعى مەن سورعى توبىنىڭ ءتورتىنشى قازاندىعى جاڭعىرتىلدى. 90 جىلدىق تاريحى بار جىلۋ كوزى «قىزىل ايماقتاعى» وبەكتىلەردىڭ تىزىمىنە ەنگىزىلگەن, جانە قالاداعى ەڭ ءىرىسى بولىپ سانالادى. جەو-1 «تەپلوكوممۋنەنەرگو» مكك قۇرامىنا كىرەدى. سونداي-اق كاسىپورىنعا 70 مىڭنان استام ابونەنتتى جىلۋمەن قامتاماسىز ەتەتىن 76 جىلۋ پۋنكتى مەن 21 قازاندىق كىرەدى. بەلسەندى تۇرعىن ءۇي قۇرىلىسىن جانە قولدانىستاعى جىلۋ جەلىلەرىنىڭ جوعارى توزۋ دەڭگەيىن ەسكەرە وتىرىپ, جىلۋ جانە ەلەكتر قۋاتىنىڭ تاپشىلىعى بايقالادى.

بۇگىندە سەمەي قالاسىنىڭ سول جانە وڭ جاعالاۋلارى اۆتونومدى تۇردە جىلۋمەن جابدىقتالعان. جەو-1 سول جاعالاۋ تۇرعىندارىن جىلۋمەن قامتاماسىز ەتەدى, وڭ جاعالاۋدا بۇل فۋنكتسيانى 21 قازاندىق اتقاراتىنى بەلگىلى بولدى.

ۇكىمەت باسشىسى جەو-3 جانە ونىڭ ماگيسترالدىق جەلىلەرىن سالۋ جوباسىنىڭ ىسكە اسىرىلا باستاعانىن ەسكە سالدى. جوبانى 2030 جىلعا دەيىن 3 كەزەڭدە ىسكە قوسۋ جوسپارلانعان. بۇگىنگى تاڭدا تەحنيكالىق-ەكونوميكالىق نەگىزدەمە ازىرلەنىپ جاتىر. جەو-3 پايدالانۋعا بەرىلگەننەن كەيىن قازاندىقتار سورعى-سۇزگى ستانسالارى رەجيمىندە جۇمىس ىستەيتىن بولادى, ياعني جىلۋ ەنەرگياسىن تىكەلەي ۇيلەرگە جەتكىزىلەدى دەپ جوسپارلانعان. سونىمەن قاتار بۇگىنگى تاڭدا وڭ جاعالاۋدا ساعاتىنا 146,99 گكال قۇرايتىن تاپشىلىق ماسەلەسى شەشىلۋى مۇمكىن.

سونداي-اق, بيىل 44 كوپپاتەرلى تۇرعىن ءۇيدى, 1200 ورىنعا ارنالعان مەكتەپتى جانە نەفرولوگيالىق ورتالىقتى پايدالانۋعا بەرۋ جوسپارلانىپ وتىرعان قاراعايلى اۋدانىنىڭ قارقىندى قۇرىلىسىن ەسكەرە وتىرىپ, پرەمەر-مينيسترگە قۋاتى ساعاتىنا 21,5 گكال قۇرايتىن بلوكتى-ءمودۋلدى قازاندىق سالۋ جوباسى تانىستىرىلدى. قۇنى شامامەن 5,9 ملرد تەڭگە بولاتىن ەنەرگەتيكا وبەكتىسىن سالۋ جۇمىستارى قۇرىلىس سالۋشىنىڭ قاراجاتى ەسەبىنەن باستالدى.

«اباي وبلىسىندا, ونىڭ ىشىندە سەمەي قالاسىندا جىلۋمەن جابدىقتاۋ ماسەلەسى وتە كۇردەلى ەكەنى بەلگىلى. ينجەنەرلىك جەلىلەردىڭ توزۋى مەن جەرگىلىكتى جەو جاعدايى بويىنشا ءوڭىر «قىزىل ايماققا» جاتادى. وسى جىلدىڭ سوڭىنا دەيىن جىلۋ كوزدەرىن ساپالى جاڭعىرتۋ جۇمىستارىن جۇرگىزۋ – مەملەكەت باسشىسىنىڭ تاپسىرماسى. بۇل ماسەلە ۇكىمەتتىڭ ەرەكشە باقىلاۋىندا», دەدى ولجاس بەكتەنوۆ.

جىلۋ جەلىلەرىن جاڭعىرتۋ, اپاتتىق جاعدايلاردىڭ الدىن الۋ, توزۋدى ازايتۋ جانە ينفراقۇرىلىمنىڭ ەكسپلۋاتاتسيالىق ساپاسىن ارتتىرۋ بويىنشا بىرقاتار تاپسىرما بەرىلگەن. ەنەرگەتيكا, قارجى مينيسترلىگىنە جەو-3 ماگيسترالدىق جەلىلەرى قۇرىلىسىن قارجىلاندىرۋ تەتىگىن پىسىقتاۋ تاپسىرىلعان.