دونورلىق اعزالاردى ۇزاق ۋاقىت كۇتكەن 4 پاتسيەنتكە ترانسپلانتاتتاۋ بويىنشا ءساتتى وپەراتسيالار جاسالدى, دەپ حابارلايدى Egemen.kz دسم ءباسپاسوز قىزمەتىنە سىلتەمە جاساپ.
جول كولىك وقيعاسى سالدارىنان جان تاپسىرعان 18-دەگى جىگىتتىڭ اعزالارىن الۋعا تۋىستارى كەلىسىم بەرگەن.
دەنساۋلىق ساقتاۋ مينيسترلىگىنىڭ مالىمەتىنشە دسم-ءنىڭ ترانسپلانتاتتاۋدى جانە جوعارى تەحنولوگيالىق مەديتسينالىق قىزمەتتەردى ۇيلەستىرۋ جونىندەگى رەسپۋبليكالىق ورتالىعى (تجتمقۇرو) دونورلىق جانە ترانسپلانتاتتاۋ پروتسەسىن جەدەل ۇيىمداستىرۋدى جۇزەگە اسىرىپ, باۋىر, جۇرەك, ەكى بۇيرەك الىنعان.
25 شىلدەدە ماماندار اعزالاردى ترانسپلانتاتتاۋ بويىنشا ءساتتى وپەراتسيالار جۇرگىزگەن.
شىمكەنت قالاسىنىڭ جۇرەك ورتالىعىندا 1966 جىلى تۋعان پاتسيەنت جاڭا جۇرەككە يە بولسا, ا.سىزعانوۆ اتىنداعى ۇلتتىق عىلىمي حيرۋرگيا ورتالىعىندا 58 جاستاعى پاتسيەنتكە باۋىر ترانسپلانتاتتالدى. تۇركىستان وبلىستىق كلينيكالىق اۋرۋحاناسىندا 1984 جىلى تۋعان پاتسيەنت جاڭا بۇيرەك الىپ, University Medical Center كلينيكاسىندا 16 جاستاعى بوزبالاعا ەكىنشى بۇيرەك ترانسپلانتاتتالدى.