بالامالى ەنەرگيا كوزدەرىنە دەگەن قىزىعۋشىلىق جىلدان-جىلعا ارتىپ كەلەدى. ەنەرگياعا قوسا ەكولوگيا ماسەلەلەرىن شەشۋگە دە قابىلەتتى جوبا ۇلىتاۋ وبلىسىندا قارقىندى دامي ءتۇستى. قازىر وبلىس بويىنشا بۇل باعىتتاعى بىرنەشە جوبا جۇزەگە اسىرىلىپ جاتىر.
وتكەن جىلدىڭ مامىر ايىندا ەل پرەزيدەنتى قاسىم-جومارت توقاەۆتىڭ قىتايعا ساپارى كەزىندە بىرنەشە قۇجاتقا قول قويىلعان ەدى. قازىرگى كەزدە ناقتى جۇزەگە اسا باستاعان جەل ەنەرگياسىن وندىرۋگە باعىتتالعان جوبالار دا – سول ساپاردىڭ جەمىسى.
قازان ايىندا ۇلىتاۋ وبلىسى اكىمدىگىندە وتاندىق «تەحنوگرۋپسەرۆيس» جشس جانە قىتايلىق «Sinohydro Engineering Bureau Machinery and Equipment Co.Ltd» كومپانيالارىنىڭ اراسىندا مەموراندۋمعا قول قويىلدى.
مەموراندۋم بويىنشا جاڭاارقا اۋدانىندا جەل ەنەرگەتيكالىق ستانساسىن سالۋ جانە جەزقازعان قالاسىندا سول ستانسالارعا قاجەتتى مۇنارالاردىڭ مەتالل كونسترۋكتسيالارىن ءوندىرۋ كوزدەلگەن ەدى. جوبانى ىسكە اسىرۋ ءۇشىن جاڭاارقا اۋدانىندا 20 مىڭ گەكتار, ال جەزقازعانداعى زاۋىت قۇرىلىسى ءۇشىن 20 گەكتار جەر تەلىمى ءبولىندى. مەموراندۋمعا قول قويىلعاننان كەيىن جەزقازعاندا سالىناتىن زاۋىتتىڭ ورنى بەلگىلەنىپ, سالتاناتتى جاعدايدا كاپسۋلا سالىندى.
بۇل ينۆەستيتسيالىق 2 جوبانىڭ جالپى قۇنى – 489 ملرد تەڭگە. ستانسا جىلىنا 3,4 ملرد كۆت/ساع. ەنەرگيا وندىرەتىن بولادى. بۇل وبلىستىڭ قاجەتىن تولىقتاي وتەيدى.
ال جەل ستانسالارىنا قاجەتتى مۇنارالار شىعاراتىن زاۋىت جىلىنا قۋاتتىلىعى 500-600 مەگاۆاتت قۇرايتىن 100 مۇنارا شىعارادى. قوس جوبا تولىق پايدالانۋعا بەرىلگەندە ەڭ كەمى 300 تۇراقتى جۇمىس ورنى پايدا بولادى.
بۇلاردان تىس قازىرگى كەزدە جەزقازعان قالاسىنىڭ ماڭىندا قۇنى 24,5 ملرد تەڭگەنى قۇرايتىن تاعى ءبىر ينۆەستيتسيالىق جوبا قولعا الىندى. قۋاتى 100 مۆت جەل ەلەكتر ستانساسىنىڭ قۇرىلىسىن قىتايلىق كومپانيامەن بىرگە «Mezgilder Qushteri» جشس اتقارىپ, جوبانى بەلگىلەنگەن ۋاقىتىندا پايدالانۋعا بەرۋدى قامتاماسىز ەتۋدى ماقسات ەتىپ وتىر. نەگىزگى ستانسا جەزقازعاندا, ال قوسالقى ستانسا ساتباەۆ قالاسىندا ورنالاسادى. جەل ستانساسى پايدالانۋعا بەرىلگەن كەزدە مۇندا 11 ادام تۇراقتى جۇمىسپەن قامتىلادى.
جاسىل ەنەرگيا تۋرالى از ايتىلعان جوق. «قۇلاق ەستىگەندى كوز كورەدى» دەمەكشى, ەلىمىزدە, سونىڭ ىشىندە ۇلىتاۋ وبلىسىندا بالامالى ەنەرگيا كوزدەرىن پايدالانۋعا كوشۋ قازىردىڭ وزىندە باستالدى. بۇعان – جوعارىداعى جۇزەگە اسىرىلىپ جاتقان جوبالار ايقىن دالەل.
«جاسىل ەنەرگيانىڭ تيىمدىلىگى كوپ. بىرىنشىدەن, ەكولوگياعا زيان كەلتىرمەيدى. ەكىنشىدەن, ارزان ەنەرگياعا قول جەتكىزەتىن بولامىز.ۇشىنشىدەن, ارتىق ەنەرگيانى كورشى وبلىستارعا ساتۋعا دا مۇمكىندىك بار. ال جەل ستانسالارىنا قاجەتتى قۇرىلعىلارعا, ياعني مۇنارالارعا سۇرانىس جاقىن شەتەلدەردەن دە ءتۇسىپ قالۋى مۇمكىن. مۇنىڭ ءبارى وبلىس ەكونوميكاسىن دامىتۋعا ءوزىنىڭ وڭ اسەرىن تيگىزەتىن بولادى», دەيدى « ۇلىتاۋ وبلىسىنىڭ كاسىپكەرلىك جانە ونەركاسىپ باسقارماسى» مم باسشىسى عازيز تولەۋوۆ.
ۋاقىت ارقاشان ءوزىنىڭ جاڭالىعىن ۇسىناتىنى راس. جاسىل ەنەرگيا دا – سونىڭ ءبىرى. ەندەشە, عىلىمنىڭ, تەحنولوگيانىڭ جەتىستىكتەرىنىڭ ناتيجەسى سانالاتىن جاڭالىقتاردىڭ يگىلىگىن كورە بىلگەنگە نە جەتسىن.