تۇركىستاندىق تۇلەك دامير ايۋپوۆ 45 شەتەلدىك جوعارى وقۋ ورنىنان شاقىرتۋ العان. ول اقش, شۆەيتساريا, گەرمانيا, يسپانيا, مالايزيا, شوتلاندياداعى كەز-كەلگەن تاڭداعان ۋنيۆەرسيتەتىندە ءبىلىم الادى, دەپ حابارلايدى Egemen.kz.
تۇركىستان قالاسىنداعى № 15 ورتا مەكتەپتىڭ تۇلەگى دامير ايۋپوۆ ۇلتتىق بىرىڭعاي تەستىلەۋدەن 133 بالل جيناعان.
«مەكتەپتە گەوگرافيا, ماتەماتيكا, اعىلشىن تىلىنە كوپ كوڭىل بولەتىنمىن. مەنىڭ جوسپارىمدا IT سالاسىن تاڭداۋ بولدى. الايدا 11-سىنىپتا جوسپارىمدى وزگەرتتىم, وكىنبەيمىن. قازىر بيزنەس باعىتىن تاڭدادىم», دەدى دامير ايۋپوۆ.
دامير ايۋپوۆ بارلىق ەلدەردىڭ ىشىنەن پراگانىڭ چەحيا قالاسىن تاڭداعان. ونىڭ ايتۋىنشا, ول چەحيادا ءبىلىم الۋ ءۇشىن ءبىر جىلىن ءتىل ۇيرەنۋگە جۇمسايدى.
«شەتەلدە 3 جىل وقيمىن, 1 جىلدان كەيىن وسى ەلدىڭ ءتىلىن ۇيرەنەمىن. مەنى 2,5 ميلليون تەڭگە ستيپەندياسى بار ۋنيۆەرسيتەتتەر شاقىردى, بىراق مەنىڭ قالاۋىم – ەۋروپا», دەدى جاس تۇلەك.
ەسكە سالا كەتەيىك, بۇعان دەيىن تۇركىستاندىق تۇلەك يسلام ابدۋراحمانوۆ الەمنىڭ 6 ەلىندە ورنالاسقان 40-تان استام ۋنيۆەرسيتەتتەن شاقىرتۋ العان بولاتىن. تۇلەك ءباا, اقش, انگليا, پولشا, مالايزيا, شۆەيتساريا ەلدەرىنىڭ الەمگە ايگىلى ۋنيۆەرسيتەتتەرىنىڭ گرانتىن جەڭىپ العان.