وسىدان ەكى جىل بۇرىن ءار تاسى تاريحقا تۇنعان بەستەرەك دەيتىن كيەلى جەردە شاعىن عانا مۋزەي اشىلعان. شاعىن بولعانىمەن, ءىشى مول مۇراعا تولى. اڭىز قىلىپ ايتىپ جۇرگەن اقباۋىردان شىققان جادىگەرلەردىڭ 90 پايىزى وسىندا, بەستەرەك مۋزەيىندە. ونىڭ ۇستىنە ءتۇرلى تاس مينەرالدىڭ كورمەسى ءوتىپ جاتىر.
مۋزەي قوس قاباتتان تۇرادى. استىڭعى قاباتى كەڭەس وكىمەتى تۇسىنداعى تاريح پەن بەستەرەك اۋلىنىڭ باتىرلارىنا, ايتۋلى ازاماتتارىنا ارنالعان. ال اقباۋىردان تابىلعان قىش قۇمىرا, جەبە مەن نايزانىڭ ۇشتارى سەكىلدى ساق زامانىنىڭ ەسكەرتكىشتەرى نەگىزگى زالعا توپتاستىرىلعان.
– مۇنداعى جادىگەرلەر تاس, قولا, تەمىر داۋىرلەرىنە جاتادى. كورگەنىڭىزدەي, قىش قۇمىرانىڭ دا ءتۇر-ءتۇرى تۇر. ارحەولوگتەر اقباۋىردا قىش قۇمىرا جاسايتىن ورىن بولعانىن انىقتاعان. كەن بايىتۋ دا جاقسى دامىعان. ونىڭ سەبەبى پەش ورىندارى تابىلعان. ياعني ساق زامانىندا مەتاللۋرگيا, قىش قۇمىرا جاساۋ بولعان. ال ديىرمەن تاسىنا قاراساق, ەگىنشىلىكپەن دە اينالىسقان, – دەيدى مۋزەي باسشىسى ساكەن جۇنىسبەك ۇلى.
تورگى سورەلەردە مينەرالدى تاستاردىڭ سان ءتۇرى كورمەگە قويىلعان ەكەن. ءبىرى قىزىل, ءبىرى كوك تاستاردىڭ فورمالارى دا سان ءتۇرلى. بەينە ءبىر قولدان سوققانداي كورىنەدى. الايدا بارلىعى – تابيعي تاستار. ايتا كەتەيىك, مۇنداعى تاستار شىعىستان عانا تابىلماعان, سونىمەن قاتار سوناۋ ۋرۋگۆايدان اكەلىنگەن امەتيست جانە درۋزا مينەرالدارىنىڭ تابيعي قوسىندىسىن كورۋگە بولادى. قاراساڭىز, جارق-جۇرق ەتىپ, كوزدىڭ جاۋىن الادى. ەندى ءبىرى جاپ-جاسىل مينەرال ۋۆاروۆيت دەپ اتالادى ەكەن. جاقۇت تاستاردىڭ ىشىندە ۇلان اۋدانىندا كەزدەسەتىن كەن بايلىقتار دا بارشىلىق. ماسەلەن, وسى ماڭنان تابىلعان تاۋ ءحرۋستالى كورمەگە قويىلعان. سپودۋمەن سىندى ەمدىك قاسيەتكە يە تاستار دا تابىلادى. وتىرىك-شىنىن كىم ءبىلسىن, جەرگىلىكتى جۇرت الداعى ۋاقىتتا اسۋبۇلاق, تارعىن, وگنەۆ اۋىلدارىندا ليتي وندىرەتىن كاسىپورىن اشىلۋى مۇمكىن دەگەن دە بولجام ايتىپ ءجۇر. جەتپىسىنشى جىلدارعا دەيىن دامىلسىز ىستەگەن فابريكالار قايتا ىسكە قوسىلسا, اۋىلداردىڭ دا الەۋەتى ارتار ەدى.
شىعىس قازاقستان وبلىسى,ۇلان اۋدانى