ۇلتتىق بانك ۇلتتىق قوردىڭ قاراجاتىنان تسيفرلىق تەڭگە (بۇدان ءارى – تست) پلاتفورماسىن پايدالانۋ بويىنشا پيلوتتىق جوبانىڭ ءساتتى ىسكە قوسىلعانى تۋرالى مالىمدەدى. ۇلتتىق تسيفرلىق ۆاليۋتانى ەنگىزۋدىڭ ەكىنشى كەزەڭى اياسىندا تسيفرلىق تەڭگە «دوستىق-مويىنتى» تەمىر جول ۋچاسكەسىن سالۋعا جۇمسالادى, دەپ حابارلايدى Egemen.kz قازاقستان ۇلتتىق بانكىنىڭ ءباسپاسوز قىزمەتىنە سىلتەمە جاساپ.
ايتا كەتەرلىگى, تسيفرلىق تەڭگەنى باعدارلامالاۋ تەحنولوگياسى ۇلتتىق قور قارجىلاندىراتىن جوبا اياسىندا تەستىلەۋدەن ءوتىپ جاتىر.
جوبا اۆتورلارىنىڭ ايتۋىنشا, تسيفرلىق تەڭگەنى باعدارلامالاۋ تەحنولوگياسى قارجى يەسىنە ونى ءوز بەتىنشە باقىلاۋعا جانە ءتيىمدى جۇمساۋعا مۇمكىندىك بەرەدى. مۇنداي جۇيە تاڭبالاۋ تەحنولوگياسى بولىنگەن قاراجاتتىڭ نىسانالى جۇمسالماۋ تاۋەكەلدەرىن ازايتادى. سونداي-اق مەملەكەتتىك قارجى جۇمساۋدىڭ ايقىن جانە ءتيىمدى بولۋىن قامتاماسىز ەتۋگە ىقپالىن تيگىزەدى.
«پيلوتتىق جوبانى ىسكە قوسۋ بارىسىندا تسيفرلىق تەڭگە پلاتفورماسىندا جوبانى قارجىلاندىرۋعا بولىنگەن اقشاعا تاڭبا قويىلدى. تاڭبالانعان تسيفرلىق تەڭگە قاجەتتى مىندەتتەمەلەردى تولىق كولەمدە ورىنداعان ۇيىمداردىڭ اتىنا عانا تولەنەدى. تاڭبالانعان تست-مەن ەسەپ ايىرىسۋ تۇپكىلىكتى ءونىم بەرۋشىلەر مەن مەردىگەرلەرگە دەيىن بۇكىل تاۋار جەتكىزۋ تىزبەگى بويىنشا جۇرگىزىلەدى. بارلىق تۇتىنۋشىنىڭ تسيفرلىق تەڭگەدەگى شوتتارعا قول جەتكىزۋى نارىققا قاتىسۋشىلاردىڭ قولدانىستاعى ينتەرفەيستەرى ارقىلى ادەتتەگى فورماتتا ۇيىمداستىرىلعان», دەلىنگەن حابارلامادا.
پيلوتتىق جوبا «سامۇرىق-قازىنا» اق-مەن, «قازاقستان تەمىر جولى» ۇلتتىق كومپانياسى» اق-مەن, «قازپوشتا» اق-مەن جانە «قازاقستان حالىق بانكى» اق-مەن بىرلەسىپ ىسكە قوسىلعان.
«بۇل پيلوتتىق جوبانى دامىتۋ اياسىندا تسيفرلىق تەڭگەنى تاڭبالاۋ ءۇشىن ەتالوندىق دەرەككوزدەردى (اقپاراتتىق جۇيەلەردى) كەڭەيتۋ, نارىققا قاتىسۋشىلاردىڭ (ەكىنشى دەڭگەيلى بانكتەردىڭ) سانىن كەڭەيتۋ جانە ۇلتتىق قوردىڭ بيۋدجەتىنەن قارجىلاندىرىلاتىن وزگە دە جوبالارعا ارنالعان پلاتفورمانى پايدالانۋ جوسپارلانعان.
سونىمەن قاتار قر ۇكىمەتى مەن قر سىبايلاس جەمقورلىققا قارسى ءىس-قيمىل اگەنتتىگى بىرلەسىپ, اۋىل شارۋاشىلىعى, قۇرىلىس سالالارىندا بيۋدجەت قاراجاتىن نىسانالى مەملەكەتتىك جۇمساۋ, سونداي-اق مەملەكەتتىك قولداۋ شارالارىن تسيفرلاندىرۋ بويىنشا بىرنەشە پيلوتتىق جوبانى ىسكە اسىرىپ جاتىر. سالىقتىق اكىمشىلەندىرۋدى تسيفرلاندىرۋ, ۇلتتىق تسيفرلىق ۆاليۋتالارداعى ترانسشەكارالىق ەسەپ ايىرىسۋ جانە تسيفرلىق اكتيۆتەر سالاسىنداعى ەسەپ ايىرىسۋ بويىنشا پيلوتتىق جوبالار دا جوسپارلانعان», دەلىنگەن ۇلتتىق بانك حابارلاماسىندا.