ەلىمىزدە اگروونەركاسىپ كەشەنى سالاسىنداعى ترانسۇلتتىق كومپانيالاردىڭ قاتىسۋىمەن 7 جوبا جۇزەگە اسىرىلاتىنى وسىعان دەيىن ايتىلعان. سونىڭ ءبىرى – الماتى وبلىسىندا ىسكە قوسىلىپ وتىرعان «PepsiCo» ترانسۇلتتىق كومپانياسىنىڭ ءىرى ينۆەستيتسيالىق جوباسى. ۇكىمەت بۇل ورتالىق ازياداعى ەڭ ءىرى جوبا بولادى دەپ ۇمىتتەنەدى.
زاۋىتتىڭ ىسكە قوسىلۋى 2026 جىلعا جوسپارلانعان, ونىڭ قۋاتتىلىعى جىلىنا 16 مىڭ توننا دايىن ونىمگە دەيىن, كەيىننەن 2027 جىلدان باستاپ 21 مىڭ تونناعا دەيىن وسەدى. جوبانىڭ ماقساتى – وبلىستا تاماق ونەركاسىبىنىڭ جانە جالپى ەكونوميكانىڭ دامۋىنا وڭ اسەر ەتەتىن تۇزدى تاعامدار ءوندىرىسىن جولعا قويۋ. جوبانى جۇزەگە اسىرۋ بارىسىندا كومپانيا قىزمەتكەرلەرى مەن مەردىگەرلەردى قوسقاندا 1 000-عا جۋىق قىزمەتكەردى تارتۋ جوسپارلانعان. ناتيجەسىندە, وبلىستا 350-گە جۋىق تۇراقتى جۇمىس ورنى اشىلادى.
الاتاۋ قالاسىنىڭ اكىمى اركەن وتەنوۆ «PepsiCo» سەكىلدى الەمدەگى ەڭ جەتەكشى ترانسۇلتتىق كومپانيانىڭ كەلۋى جاڭا جۇمىس ورىندارىن اشۋعا, ينۆەستيتسيا مەن تەحنولوگيا جانە قوسىمشا قارجى تارتۋعا, كاسىپكەرلىك بەلسەندىلىكتى دامىتۋعا, سالىق تۇسىمدەرىن ۇلعايتۋعا مۇمكىندىك بەرەتىنىن, بۇل ءوز كەزەگىندە ءوڭىردىڭ ينۆەستيتسيالىق تارتىمدىلىعى مەن ەكونوميكالىق تۇراقتىلىعىن جاقسارتۋعا ىقپال ەتەتىنىن ايتتى. «جوبا جاس قالا ءۇشىن حالىقارالىق دەڭگەيدەگى №1 جوبا. قالا اكىمدىگى كومپانيانىڭ الەۋمەتتىك باعىتتاعى كەز كەلگەن جوباسىنا قولداۋ بىلدىرۋگە دايىن», دەدى ول.
«Kazakh Invest» ۇلتتىق كومپانياسى باسقارما توراعاسى ەرجان ەلەكەەۆ «PepsiCo سياقتى ءىرى ينۆەستوردىڭ كەلۋى ەلىمىزدىڭ جوعارى ينۆەستيتسيالىق تارتىمدىلىعىن راستايدى دەدى.
«مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, جاڭا ءوندىرىس ورىندارىنىڭ ىسكە قوسىلۋىنا, جاڭا جۇمىس ورىندارىنىڭ اشىلۋىنا قولايلى جاعداي جاسالىپ, بۇل ءۇشىن بارلىق دەڭگەيدەگى مەملەكەتتىك ورگاندار ناتيجەگە باعىتتالعان ءبىر ۇجىم بولىپ جۇمىس اتقارىپ جاتىر. «بۇگىن ءبىز «PepsiCo» كومپانياسىمەن جوبانى دامىتۋدىڭ جول كارتاسىنا قول قويدىق, وندا قازاقستاندا رەسۋرستىق ەمەس سەكتوردا جاڭا كاسىپورىن سالۋ جوباسىن ىسكە اسىرۋدى قامتاماسىز ەتۋ جانە ودان كەيىن ونىڭ ەكسپورتتىق الەۋەتىن ىسكە اسىرۋ بويىنشا بارلىق تاراپتاردىڭ جاۋاپكەرشىلىگى مەن مەرزىمدەرى ناقتى كورسەتىلگەن», دەيدى.
جوباعا الماتى وبلىسىنىڭ اكىمدىگى مەن وڭىرلىك دامۋ ورتالىعى ايتارلىقتاي قولداۋ كورسەتكەن. 2023 جىلدىڭ قاراشا ايىندا جوباعا «ينۆەستيتسيا» مارتەبەسى بەرىلىپ, ايماقتىق ۇيلەستىرۋ كەڭەسىنەن ءساتتى ءوتىپ, جەر تەلىمىن تىركەۋدىڭ بارلىق راسىمدەرى اياقتالعان. كومپانيا قازىر زاۋىت جوباسىن جاساپ جاتىر. رەسمي ىرگەتاسىن قالاۋ سالتاناتى بيىل قىركۇيەك ايىنا جوسپارلانعان.
«PepsiCo» كومپانياسى FMCG سەكتورىنداعى كوشباسشىلاردىڭ ءبىرى جانە وتاندىق نارىقتا 20 جىلدان استام قىزمەت ەتىپ كەلەدى. كومپانيا بۇكىل ەل بويىنشا قىزمەتىن ۇسىنادى. ورتالىق ازيانىڭ بيزنەس اۋديتورياسىنا ارنالعان نەگىزگى كەڭسە الماتى قالاسىندا ورنالاسقان. ونىڭ قۇرامىنا تاعى ەكى ەلدە – قىرعىزستان مەن وزبەكستانداعى وكىلدىكتەر كىرەدى. قازىرگى ۋاقىتتا «PepsiCo»-نىڭ ەلىمىزدەگى ۇجىمىندا – 250-دەن اسا, ال ورتالىق ازيا ايماعىندا 500-دەن استام قىزمەتكەرى جۇمىس ىستەيدى. كومپانيا 2024 جىلى قاتارىنان 7-ءشى رەت جاھاندىق «Top Employers» ينستيتۋتىنىڭ بەدەلدى «ۇزدىك جۇمىس بەرۋشى» سەرتيفيكاتىن يەلەندى.
2024 جىلدىڭ سوڭىنا قاراي «PepsiCo» وتاندىق اۋىل شارۋاشىلىعى وندىرۋشىلەرى ءۇشىن سەرىكتەستىك باعدارلاماسىن ىسكە قوسادى. ونىڭ اياسىندا «PepsiCo» فەرمەرلەردى كارتوپتىڭ ارنايى «چيپ» سورتتارىنىڭ تۇقىمدارىمەن قامتاماسىز ەتەدى, ال كومپانيانىڭ اگروكومانداسى سەرىكتەستەرگە زاماناۋي تەحنولوگيالاردى ەنگىزۋ بويىنشا تۇراقتى تۇردە كەڭەس بەرەدى.