استانا مەديتسينا ۋنيۆەرسيتەتى جىل سايىنعى داستۇر بويىنشا «استانا وپەرا» مەملەكەتتىك وپەرا جانە بالەت تەاترىندا تۇلەكتەرگە ديپلوم تابىستاۋ ءراسىمىن وتكىزدى, دەپ حابارلايدى Egemen.kz ۋنيۆەرسيتەتتىڭ ءباسپاسوز قىزمەتىنە سىلتەمە جاساپ.
ونىڭ اياسىندا ءىرى كومپانيالاردىڭ وكىلدەرى ۋنيۆەرسيتەت ستۋدەنتتەرىنە 25 ملن تەڭگەدەن استام قارجىعا اتاۋلى گرانتتار مەن ستيپەنديالار تاعايىندادى. سالتاناتتى ءىس-شارادا ەلىمىزدەگى 4 جوعارى وقۋ ورىندارىنىڭ ۇزدىك ستۋدەنتتەرى دە ەلوردادا ەرەكشە ۇلگىدەگى ديپلومدارىن قولعا الدى.
استانا مەديتسينا ۋنيۆەرسيتەتى - قازاقستاندا دارىگەرلەردى دايىنداۋ بويىنشا كوشباسشى. جىل سايىن وقۋ ورداسىنىڭ 1000-نان استام جاس مامانى ەلىمىزدىڭ مەديتسينالىق مەكەمەلەرىنە جۇمىسقا ورنالاسادى.
بيىل استانا مەديتسينا ۋنيۆەرسيتەتىنىڭ 1200-دەن استام قازاق جانە شەتەل ستۋدەنتتەرى وقۋلارىن ءساتتى اياقتادى جانە جۇمىسقا كىرىسۋگە ءازىر. وقۋ ورداسىندا ءۇندىستان, پاكىستان, موڭعوليا, رەسەي, وزبەكستان جانە يوردانيادان كەلگەن جاس ماماندار ءبىلىم الدى. تۇلەكتەر ينتەرناتۋرا مەن باكالاۆريات دەڭگەيىندە 7 باعىت بويىنشا ءبىلىم الدى: «جالپى مەديتسينا», «ستوماتولوگيا», «فارماتسيا», «قوعامدىق دەنساۋلىق ساقتاۋ», «مەيىربيكە ءىسى», «كينەزيوتەراپيا» جانە «ەرگوتەراپيا». ولار تاجىريبەلىك داعدىلارىن ۇزدىك ەمحانالار مەن مەديتسينالىق ورتالىقتاردا شىڭداپ, الەمنىڭ جەتەكشى ۋنيۆەرسيتەتتەرىندە شەتەلدىك تاجىريبەنى زەردەلەۋگە مۇمكىندىك الدى.
«سىزدەر بىرنەشە جىل بۇرىن مەديتسينالىق ۋنيۆەرسيتەتكە ءتۇسىپ, ماڭىزدى تاڭداۋ جاسادىڭىزدار. بۇگىن بۇل قادامنىڭ سانالى جانە دۇرىس ەكەنىن دالەلدەدىڭىزدەر! ءبىزدىڭ وقىتۋشىلار ساپالى ءبىلىم الۋ ءۇشىن بارلىق قاجەتتى جاعدايلاردى جاساپ, بويلارىڭىزعا ادالدىق پەن كاسىبيلىكتى ءسىڭىردى! الداعى ۋاقىتتا سىزدەر ادامدارعا قىزمەت ەتۋ جانە ناۋقاستاردىڭ دەنساۋلىعىنا قامقورلىق جاساۋ دەگەن جاۋاپتى ميسسياعا كىرىسەسىزدەر. اق حالاتتىڭ ابىرويىن ساقتاپ, بىلىكتىلىك پەن ءبىلىمدى ۇنەمى شىڭداۋ ماڭىزدى», دەپ اتاپ ءوتتى ءوز سوزىندە وقۋ ورنىنىڭ رەكتورى قامالجان نادىروۆ.
قر دەنساۋلىق ساقتاۋ ءمينيسترى اقمارال ءالنازاروۆا تۇلەكتەردى قۇتتىقتاپ, جاس ماماندارعا قولدا بار جەتىستىكتى ودان ءارى دامىتۋ, زاماناۋي تەحنولوگيالار مەن تاجىريبەلەردى ەنگىزۋ, مەديتسينالىق كومەكتىڭ ساپاسى مەن قولجەتىمدىلىگىن جەتىلدىرۋ قاجەتتىگىن اتاپ ءوتتى.
جاس ماماندارعا «AMANAT» پارتياسىنىڭ اتقارۋشى حاتشىسى داۋلەت كارىبەك, بەلگىلى مەديتسينا قايراتكەرلەرى, كاسىپكەرلەر, ۇلتتىق عىلىمي ورتالىقتار مەن مەديتسينالىق مەكەمەلەردىڭ باسشىلارى, ۋنيۆەرسيتەت وقىتۋشىلارى ءوز تىلەكتەرىن ءبىلدىردى.
«Orbis Qazaqstan», «Sensata Group», «G-Park», «MIT» كومپانيالارىنىڭ وكىلدەرى امۋ ءبىلىم الۋشىلارىنا 25 ملن تەڭگەدەن استام سوماعا اتاۋلى گرانتتار مەن ستيپەنديالار تاعايىندادى. كاسىپكەرلەر جەكە قاراجاتتارىن دارىندى جانە مۇقتاج ستۋدەنتتەردى قولداۋ ءۇشىن «AMU Endowment Development Fund» اۋداردى.
سالتاناتتى ءىس-شارا بارىسىندا قاراعاندى مەديتسينا ۋنيۆەرسيتەتىنىڭ, س.ج. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ, سەمەي مەديتسينا ۋنيۆەرسيتەتىنىڭ, م. وسپانوۆ اتىنداعى باتىس قازاقستان مەديتسينا ۋنيۆەرسيتەتىنىڭ 17 ۇزدىك تۇلەگىنە دە استانا قالاسىندا ديپلومدار تابىستالدى.
اسەت جارىلقاپوۆ ينتەرناتۋرادا وقۋىن اياقتاپ, جالپى دارىگەرلىك پراكتيكا بويىنشا ديپلومىن قولىنا الدى. جاس مامان بالا كۇنگى ارمانىن ورىنداپ, حيرۋرگ بولۋدى ۇيعاردى.
«بۇگىن مەن ءۇشىن تەبىرەنىسكە تولى كۇن. استانا مەديتسينا ۋنيۆەرسيتەتى ماعان كوپتەگەن مۇمكىندىكتەر اشىپ, دۇنيەتانىمىمدى كەڭەيتتى. تاجىريبەلى وقىتۋشىلاردىڭ ارقاسىندا زامان تالابىنا ساي ءبىلىم الىپ, شەت ءتىلىن مەڭگەرىپ, وقۋ بارىسىندا اعىلشىن ءتىلدى توپقا اۋىسۋعا مۇمكىندىك بەرىلدى. ءبىر جىل بويى ەۋروپادا شەبەرلىگىمدى شىڭدادىم. نەفرولوگيا, راديولوگيا, حيرۋرگيا سالالارى بويىنشا حالىقارالىق جانە رەسپۋبليكالىق وليمپيادالاردا 8 جۇلدەلى ورىنعا يە بولدىم. ەندى مەن حيرۋرگيانى تاڭداپ, وقۋىمدى ودان ءارى جالعاستىرامىن», دەيدى امۋ تۇلەگى اسەت جارىلقاپوۆ.
«استانا وپەرا» مەملەكەتتىك وپەرا جانە بالەت تەاترى ءۇشىنشى جىل قاتارىنان استانا مەديتسينا ۋنيۆەرسيتەتىنىڭ تۇلەكتەرىنە ديپلوم تاپسىرۋ ءراسىمىن تەگىن وتكىزۋ مۇمكىندىگىن ۇسىنىپ وتىر.
اتاپ وتكەن ءجون, بيىل ۋنيۆەرسيتەتىڭ نەگىزى قالانعانىنا 60 جىل تولادى. وسى ۋاقىت ارالىعىندا ەلىمىزدىڭ جەتەكشى ۋنيۆەرسيتەتى دەنساۋلىق ساقتاۋ سالاسى ءۇشىن 30 مىڭنان استام جوعارى بىلىكتى مامانداردى دايىندادى. ۋنيۆەرسيتەت ۋاقىت تالابى مەن قوعام سۇرانىسىنا ساي وقۋ-تاربيە ءۇردىسىن ۇنەمى جەتىلدىرىپ كەلەدى.