ىلە-الاتاۋ مەملەكەتتىك ۇلتتىق تابيعي پاركى اۋماعىندا 2020 جىلى جاز مەزگىلىندە يسپان شىرىشىنىڭ پايدا بولعانى تۋرالى دابىل تۇسكەن ەكەن.
باستاپقىدا «مەدەۋ» وڭىرلىك تابيعي پاركى اۋماعىندا عانا كەزدەسكەن اتالعان زيانكەس ىلە-الاتاۋ پاركىنىڭ كەڭساي, كوكجايلاۋ سايلارىنداعى جول بويىندا كوپتەپ ۇشىراسقان. تاۋدىڭ ىلعال كليماتى دا يسپان شىرىشىنا قولايلى ورتا جاساپ وتىر. بيىل دا تاۋ بەتكەيلەرىندەگى وسىمدىك جامىلعىسى يسپان شىرىشىنىڭ شابۋىلىنا ۇشىراعان. اسىرەسە كوكتەمنىڭ جاڭبىرلى ايلارىندا سانى ەرەكشە كوبەيىپ, ۇرەي تۋعىزعان.
اتالعان زيانكەس ەۋروپا ەلدەرىنە وتكەن عاسىردىڭ 50 جىل كولەمىندە تۇگەل جايىلىپ ۇلگەرگەن ەكەن. ورمان اعاشتارى جاپىراعىن كەمىرىپ, قورەكتەنىپ, جەرگىلىكتى وسىمدىكتەر پوپۋلياتسياسىنا ەلەۋلى نۇقسان كەلتىرەتىندىكتەن يسپان جالاڭاش شىرىشتى ۇلۋى ەۋروپادا ەڭ قاۋىپتى ينۆازيۆ تۇرلەر تىزىمىنە ەنگەن.
ال, الەم ەلدەرىنە جىلدام جايىلىپ بارا جاتقانىنىڭ سەبەپتەرىنىڭ ءبىرى – يسپان شىرىشىنىڭ تابيعي جاۋلارىنىڭ ازايۋى ەكەن. يسپان شىرىشىن قورەك ەتەتىندەر: كەسىرتكە, جىلان, كىرپى جانە قارا سايراق (قۇس). بۇلار ازايسا, شىرىشتى ۇلۋدىڭ باقىلاۋسىز كوبەيۋ قاۋپى بار.
الداعى ۋاقىتتا يسپان شىرىشتى ۇلۋىنىڭ تەرىس اسەرىن ازايتۋ جانە بيولوگيالىق ارتۇرلىلىكتى ساقتاۋ بويىنشا ونىڭ پوپۋلياتسياسىن باقىلاۋدىڭ جانە ۇنەمى مونيتورينگ جۇرگىزۋدىڭ ماڭىزى زور سانالادى.
بۇل تۋرالى تولىعىراق ىلە-الاتاۋ مەملەكەتتىك ۇلتتىق تابيعي پاركىنىڭ عىلىمي قىزمەتكەرى كاليما تۇرسىنبايدىڭ «Egemen Qazaqstan» گازەتىندە جاريالانعان «شىرىشتى ۇلۋدىڭ زيانى» ماقالاسىنان وقي الاسىز.