بۇگىن ورتالىق كوممۋنيكاتسيالار قىزمەتىندە تجم ازاماتتىق قورعانىس جانە اسكەري بولىمدەر كوميتەتى توراعاسىنىڭ ورىنباسارى اقىلبەك احمەتجانوۆ شومىلۋ ماۋسىمىنداعى قاۋىپسىزدىك شارالارى تۋرالى باياندادى, دەپ جازادى Egemen.kz.
ەسكە سالايىق, بيىل ەلدىڭ باسىم بولىگىندە شومىلۋ ماۋسىمى 1 ماۋسىم كۇنى باستالدى.
شومىلۋ ماۋسىمى باستالعالى بەرى سۋ ايدىندارىنىڭ قورعالماعان بولىكتەرىندە 42 تۇراقتى جانە قوسىمشا 150-گە جۋىق جىلجىمالى ماۋسىمدىق قۇتقارۋ بەكەتتەرى ورناتىلعان.
سونداي-اق شومىلۋعا تىيىم سالىنعان 4 598 ورىن انىقتالىپ, وندا 5 894 ەسكەرتۋ جانە تىيىم سالۋ بەلگىلەرى قويىلعان.
«سۋداعى قاۋپىسىزدىك قاعيداتىن ساقتاماۋ ءتارتىبى بويىنشا 39 853 رەيد پەن پاترۋل جۇرگىزىلدى. انىقتالعان زاڭ بۇزۋشىلار اكىمشىلىك قۇقىق بۇزۋشىلىق تۋرالى كودەكسىنىڭ «ورتاق سۋ پايدالانۋ قاعيدالارىن بۇزعانى» 364-ءشى, «سۋ ايدىندارىنداعى قاۋىپسىزدىك قاعيدالارىن بۇزۋ نەمەسە ورىنداماعانى» 412-شى جانە «الكوگولدىك ىشىمدىكتەر ءىشۋ نەمەسە قوعامدىق ورىنداردا ماس كۇيىندە بولعانى» 440-ءشى باپتارى بويىنشا اكىمشىلىك جاۋاپكەرشىلىككە تارتىلادى. جىل باسىنان باستاپ 9 مىڭعا جۋىق حاتتاما تولتىرىلدى», دەدى اقىلبەك احمەتجانوۆ.
جىل باسىنان بەرى پاترۋلدەۋ وتكىزۋ بارىسىندا 131 ادام قۇتقارىلعان, ونىڭ ىشىندە 35 بالا بار.
«بيىلعى شومىلۋ ماۋسىمى باستالعالى (1 ماۋسىم مەن 9 شىلدە ارالىعىندا) 64 ادام سۋعا باتىپ كەتتى, ونىڭ ىشىندە 28 بالا بار. 2023 جىلى وسىعان ۇقساس كەزەڭدە 76 ادام سۋعا باتىپ كەتكەن, ونىڭ ىشىندە 21 بالا بولعان. ادام ءولىمى 16 پايىزعا, بالا ءولىمى 33 پايىزعا ءوستى», دەدى اقىلبەك احمەتجانوۆ.