قوستاناي وبلىسىنىڭ پوليتسياسى اۋليەكول اۋىلىندا جوعالىپ كەتكەن قىزدىڭ ءولىمىنىڭ سەبەبىن ايتتى, دەپ حابارلايدى Egemen.kz.
ەسكە سالا كەتەيىك, 16 جاستاعى داريا تايرونينا 26 ماۋسىم كۇنى اۋليەكول اۋىلىندا ۇيىنەن شىعىپ كەتىپ, قايتىپ ورالماعان. سودان كەيىن پوليتسيا مەن ەرىكتىلەر ونى ىزدەستىرگەن.
28 ماۋسىمدا قىزدىڭ ءمايىتى اۋليەكول ماڭىنداعى ورماننان تابىلعانى بەلگىلى بولدى.
قوستاناي وبلىسىنىڭ پوليتسيا دەپارتامەنتىنىڭ حابارلاۋىنشا قىزدىڭ ولىمىنە مەحانيكالىق اسفيكسيا سەبەپ بولعان.
«اسا اۋىر قىلمىس جاسادى دەگەن كۇدىكپەن 27 جاستاعى جەرگىلىكتى تۇرعىن انىقتالىپ, ۇستالدى. قازىرگى ۋاقىتتا ول تەرگەۋ يزولياتورىندا. جان - جاقتى جانە وبەكتيۆتى تەرگەۋ ءۇشىن قاجەتتى شارالار جۇرگىزىلىپ, ساراپتامالار تاعايىندالدى», دەپ حابارلادى قوستاناي وبلىسىنىڭ پوليتسيا دەپارتامەنتى.
پوليتسيا ازىرگە جوعالعان قىزعا قاتىستى سەكسۋالدىق ارەكەتتەر جاسالعانى تۋرالى تۇسىنىك بەرە المايتىنىن اتاپ ءوتتى.
وزگە دە مالىمەتتەر تەرگەۋ مۇددەسى ءۇشىن جاريالانبايدى.