قازاقستاندا قوس ازاماتتىق الۋعا رۇقسات ەتىلمەيدى. كوشى-قون قىزمەتى وسىنداي زاڭ بۇزۋشىلىقتاردى انىقتاۋدى جىل بويى جالعاستىرادى, دەپ جازادى Egemen.kz.
شقو پوليتسەيلەرى جارتى جىل ىشىندە 30 قوس ازاماتتىعى بار شەتەلدىكتى انىقتاپ, ولاردىڭ 8-ءى قازاقستاننان شىعارىلدى. ءتارتىپ ساقشىلارىنىڭ ايتۋىنشا, تۇرعىنداردىڭ كوبى زاڭدى دۇرىس بىلمەگەندىكتەن قازاقستان ازاماتىنىڭ قۇجاتتارىن وزدەرىندە ساقتاپ كەلگەن.
«مىسالى, شقو شەمونايحا اۋدانىنىڭ 19 جاستاعى تۇرعىنى بيىل اقپان ايىندا رەسەي ازاماتتىعىن العان. الايدا جاس جىگىت بۇل تۋرالى قولدانىستاعى زاڭنامادا بەلگىلەنگەن مەرزىمدە قۇقىق قورعاۋ ورگاندارىنا حابارلاۋ قاجەت ەكەنىن بىلمەگەن. قۇقىق بۇزۋشىعا قاتىستى ءتيىستى باپ بويىنشا اكىمشىلىك حاتتاما تولتىرىلدى. كەيىنىرەك بۇل ماتەريال اۋداندىق سوتتا قارالىپ, ونىڭ قاۋلىسىمەن شەتەلدىكتى قازاقستان رەسپۋبليكاسىنان شىعارۋ تۋرالى شەشىم قابىلداندى», دەلىنگەن شقو پوليتسيا دەپارتامەنتىنىڭ حابارلاماسىندا.
ازاماتتىقتى اۋىستىرعان جاعدايدا قازاقستان ازاماتى 30 كۇن مەرزىم ىشىندە ىشكى ىستەر ورگاندارىنا نەمەسە شەت مەملەكەتتىڭ اۋماعىنداعى قازاقستاننىڭ ديپلوماتيالىق وكىلدىگىنە حابارلاۋ كەرەك. سونداي-اق قازاقستان ازاماتتىعىنان شىعۋى تۋرالى مالىمدەپ, قازاقستان پاسپورتى مەن جەكە كۋالىگىن تاپسىرۋى قاجەت.