كولىك ءمينيسترى مارات قاراباەۆ قازاقستانداعى اقىلى جولداردى كۇتىپ ۇستاۋعا 80 ملرد تەڭگە قاجەت ەكەنىن ايتتى. وسى ماقساتتا بيۋدجەتكە ارتىق سالماق تۇسىرمەۋ ءۇشىن اقىلى جولدار سانىن كوبەيتۋ جوسپارلانىپ وتىر, دەپ جازادى Egemen.kz.
ءمينيستردىڭ ايتۋىنشا, وتكەن جىلى 3,2 مىڭ شاقىرىم اقىلى جولدان 30 ملرد تەڭگە جينالعان.
«رەكونسترۋكتسيالاۋدان وتكەن جولداردى نورماتيۆتىك دەڭگەيدە كۇتىپ ۇستاۋ ماقساتىندا بيىل 2 مىڭ شاقىرىمنان استام 11 ۋچاسكەگە كەزەڭ-كەزەڭىمەن اقى الۋدى ەنگىزۋ جوسپارلانىپ وتىر. جولداردىڭ تەز بۇزىلۋىنا سالماعى اۋىر جۇك كولىكتەرى تىكەلەي اسەر ەتەتىنى انىق. ەلىمىزدە 450 مىڭنان استام جۇك كولىگى تىركەلسە, ونىڭ 60 مىڭى رۇقسات ەتىلگەن 25 توننا جۇك تاسۋ كولەمىن ساقتامايدى. وسىعان بايلانىستى سالماق پارامەترلەرىن ساقتاۋ بويىنشا جاۋاپكەرشىلىكتى كۇشەيتۋ, كارەرلىك ساموسۆالداردىڭ جالپىعا ورتاق پايدالانىلاتىن جولدارعا شىعۋىنا تىيىم سالۋعا ءتيىستى زاڭنامالىق تۇزەتۋلەر ازىرلەندى», دەدى مارات قاراباەۆ.
كەلەسى جىلدىڭ سوڭىنا دەيىن اۆتوكولىكتىڭ قوزعالىس كەزىندەگى سالماعىن ولشەيتىن 220 ستانسا ورناتىلا باستايدى. ولشەۋ ستانسالارى بۇزۋشىلىقتاردى ونلاين تىركەپ, ايىپپۇلدى «سەرگەك» باعدارلاماسى فورماتىندا راسىمدەيدى.