«استانا وپەرانىڭ» ايگىلى بالەت ترۋپپاسى ليۋبلياناداعى 72-حالىقارالىق جازعى فەستيۆالدا سلوۆەنيالىق كورەرمەننىڭ جۇرەگىن جاۋلادى. فەستيۆال ۇيىمداستىرۋشىلارىنىڭ شاقىرۋىمەن قازاقستاندىق ۇجىم 1-2 شىلدەدە كوپشىلىككە ارام حاچاتۋرياننىڭ «سپارتاك» بالەتىن ۇسىندى. بۇل گاسترولدىك ساپار مادەنيەت جانە اقپارات مينيسترلىگىنىڭ قولداۋىمەن جۇزەگە اسىرىلىپ وتىر.
سپارتاك» – ارنايى تانىستىرۋدى قاجەت ەتپەيتىن تۋىندى. حاچاتۋرياننىڭ كەمەڭگەر مۋزىكاسى, اڭىزعا اينالعان بالەتمەيستەر يۋري گريگوروۆيچتىڭ كەرەمەت حورەوگرافياسى مەن دراماتۋرگيا تەرەڭدىگى ونى الەمدىك بالەت ونەرى قازىنالارىنىڭ ءبىرى ەتتى.
حالىقارالىق جازعى فەستيۆالدا جوعارى دەڭگەيدەگى ونەرگە ۇيرەنگەن سلوۆەنيالىق كورەرمەن قازاقستاندىق ارتىستەردى تاڭدانىسپەن قارسى الدى. «تسانكارەۆ دوم» مادەني ورتالىعىنىڭ Gallus Hall زالى كەلۋشىلەرگە لىق تولى بولدى. ءۇش مىڭنان اسا كورەرمەن ارتىستەرگە توقتاۋسىز دۋ قول شاپالاق سوعىپ, قۇرمەت-قوشەمەت سپەكتاكلدەر اياقتالعاننان كەيىن دە كوپكە دەيىن تولاستامادى. كورەرمەن تەاتر ەتۋالدەرى باقتيار ادامجان, ايگەرىم بەكەتاەۆا, ءمادينا ونەرباەۆانىڭ تەحنيكالىق شەبەرلىكتەرىنە, ولاردىڭ ساحنادا ءمىنسىز جۇزەگە اسىرا بىلگەن تەرەڭ ەموتسيالىق قۇراۋشى بولىگىنە دە تاڭعالدى.
«ارتىستەردىڭ «سپارتاك» بالەتىنىڭ بارلىق نيۋانسىن سونشالىق انىق ءارى اسەرلى جەتكىزگەنىنە قايران قالدىم. بۇل جاي عانا حورەوگرافيا ەمەس, بۇل ءاربىر بولشەگى ماعىناعا يە ناعىز تەاترلىق قويىلىم بولدى. «استانا وپەرا» ترۋپپاسى قازاقستاندىق بالەتتىڭ الەمدىك دەڭگەيدە ەكەنىن دالەلدەدى. باقتيار ادامجان مەن ءمادينا ونەرباەۆا سپارتاك پەن فريگيانىڭ پارتيالارىن ورىنداپ, كەيىپكەرلەردىڭ بەينەلەرىنە وزدەرىنىڭ بىرەگەي ينتەرپرەتاتسيالارىن قوستى, بۇل سپارتاكتىڭ قايعىلى كوتەرىلىس حيكاياسىنا كورەرمەندەردىڭ جاڭا كۇشپەن ەنۋىنە مۇمكىندىك بەردى», دەدى ليۋبليانالىق كورەرمەن يانەز نوۆاك.
بالەت ترۋپپاسىنىڭ ونەرىن قازاقستاننىڭ ەڭبەك سىڭىرگەن قايراتكەرى, «استانا وپەرا» تەاترىنىڭ ديريجەرى, ماەسترو ابزال ءمۇحيتديننىڭ باسقارۋىمەن سلوۆەنيا فيلارمونياسىنىڭ وركەسترى مەن ايەلدەر حورى سۇيەمەلدەدى. وركەستر حاچاتۋريان مۋزىكاسىنىڭ بارلىق قۋاتى مەن درامالىلىعىن ءمىنسىز جەتكىزىپ, قايتالانباس اتموسفەرا جاسادى. ايگىلى مۋزىكا اسەم اۋەزدى ساحنالار مەن ەۋروپالىق جانە ءتول اۋەندەردىڭ ارالاسۋى ارقىلى كومپوزيتوردىڭ نەعۇرلىم تانىمال قىرلارىن كورسەتتى.
سلوۆەنيا فيلارمونياسى وركەسترىنىڭ ءبىرىنشى سكريپكاسى ميران كولبل وسىعان دەيىن ا.حاچاتۋرياننىڭ «سپارتاك» بالەتىن ەشقاشان ورىنداماعاندىقتان, بۇل جوبادا ونەر كورسەتەتىن ءساتتى اسىعا كۇتكەنىن اتاپ ءوتتى.
«ماەسترو ابزال مۇحيتدين – عاجاپ ديريجەر. سوندىقتان ءبىز بارلىعىمىز ونىڭ باسقارۋىمەن ونەر كورسەتۋگە وتە قۋانىشتى بولدىق. وسى گاسترولدىڭ ارقاسىندا مەن سىزدەردىڭ ەلدەرىڭىز قازاقستان مەن استانا تۋرالى بىلە باستادىم. كوپتەگەن ەسىمدى ءبىلىپ, سىزدەردە جۇرەتىن جاڭا وپەرالىق قويىلىمنىڭ بەينەجازباسىن تاماشالادىم. استانالارىڭىزدى سۋرەتتەن كورىپ, ونىڭ اسەمدىگىنە سونداي ءتانتى بولدىم, ازداپ تاريحتارىڭىزدى دا زەرتتەي باستادىم, بالەت ترۋپپالارىڭىز تۋرالى مالىمەتتى وقىدىم. سەنىمىم اقتالعانىنا قۋانىشتىمىن, بۇل كەرەمەت ونەر كورسەتۋ, تاماشا ەكى سپەكتاكل بولدى», دەدى ميران كولبل.
سپەكتاكلدەر قارساڭىندا ليۋبلياناداعى مادەني ورتالىقتا قازاقستاندىق ترۋپپانىڭ گاسترولدىك ونەر كورسەتۋىنە ارنالعان ءباسپاسوز جيىنى ءوتىپ, وندا «استانا وپەرا» بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆا ءسوز سويلەدى. ول مۇنداي قويىلىمدى بالەت ارتىستەرىنىڭ سانى جەتكىلىكتى بالەت كومپانياسى عانا وزىنە رۇقسات ەتە الاتىنىن اتاپ ءوتتى.
ال ليۋبلياناداعى فەستيۆالدىڭ ديرەكتورى ءارى كوركەمدىك جەتەكشىسى داركو برلەك «استانا وپەرا» بالەت ترۋپپاسىنا العىسىن ءبىلدىردى.
ء«بىز ليۋبلياناداعى فەستيۆالعا الەمدىك رەپەرتۋارداعى بارلىق ۋاقىتتاعى ءىرى جانە اناعۇرلىم اۋقىمدى قويىلىم رەتىندە «سپارتاك» بالەتىن شاقىردىق. «استانا وپەرا» ترۋپپاسىنىڭ وسىندا كەلگەنىنە قۋانىشتىمىن. بۇل سالماقتى ۇجىمدا ءاربىر ارتىسكە زور كوڭىل بولىنەدى. ولاردىڭ كەيبىر ونەر كورسەتۋلەرىن استانادا سىزدەردىڭ تەاترلارىڭىزدا تاماشالاعان ەدىم. سول كەزدە بۇل ۇجىمنىڭ دەڭگەيى وتە جوعارى ەكەنىن بىردەن ءتۇسىندىم», دەدى داركو برلەك.
ايتا كەتەيىك, ليۋبلياناداعى حالىقارالىق جازعى فەستيۆال – ەۋروپاداعى بەدەلدى مادەني وقيعالاردىڭ ءبىرى. جىل سايىن ونىڭ ساحناسىندا دۇنيەجۇزىنەن ۇزدىك ارتىستەر, مۋزىكانتتار مەن ترۋپپالار ونەر كورسەتەدى. وسىناۋ فەستيۆالعا قاتىسۋ كەز كەلگەن ۇجىمنىڭ شەبەرلىگى مەن دارىنىنىڭ جوعارى دەڭگەيدە مويىندالعانىن بىلدىرەدى. كەزەكتى رەت وزدەرىنىڭ جوعارى كاسىبيلىكتەرىن دالەلدەگەن ارتىستەر ەكى ەل اراسىنداعى مادەني بايلانىسقا ۇلكەن ۇلەستەرىن قوسقانى انىق.