ەلىمىزگە جانە وڭىرگە ەسىمى تانىمال قايراتكەر, وبلىستىڭ قۇرمەتتى ازاماتى الماگۇل بوجانوۆانىڭ ومىردەن وتكەنىنە 40 كۇن بولىپ قالىپتى. ول مامىردىڭ 17-23-ىندە الماتىعا ەمدەلۋگە كەلگەندە كەزدەسىپ, ديدارلاسقان ەدىك. ەمەن-جارقىن سويلەسىپ, وتكەن-كەتكەندى ايتىپ, ءبىراز جاساپ قالعانبىز.
ء«ومىر بار جەردە قازا بار» دەمەكشى, ءبىر جەتى بولماي الماگۇلدىڭ دۇنيەدەن وزعانىن ەستىپ, ابدىراپ قالعانىمىز راس. بار ءومىرىن سىر ەلىندە وتكىزىپ, ءوڭىردىڭ وركەندەپ دامۋىنا ايرىقشا ۇلەس قوسقان قابىرعالى ازامات, بەلگىلى تۇلعا بولدى. ونىڭ ەرەكشە قايسار, قاجىرلى بولۋىمەن قاتار, بارىنشا ءادىل دە ادال قايراتكەر ەكەنىنە كوز جەتكىزدىك.
الماگۇل بوجانقىزى 1946 جىلى بۇرىنعى تەرەڭوزەك اۋدانىنىڭ ايناكول اۋلىندا تۋىپ, قىزىلوزەك, تەلمان اتىنداعى مەكتەپتە ءبىلىم الىپ, ونى پەدۋچيليششەدەگى وقۋىمەن جالعاستىردى. 1964-1972 جىلدارى شاعان اۋلىنداعى بالاباقشا مەڭگەرۋشىسى, №132 ورتا مەكتەپتە ۇستاز, 1972-1988 جىلداردا تەرەڭوزەك اۋداندىق كومسومول كوميتەتىنىڭ 1-حاتشىسى, مەكتەپ ديرەكتورى, اۋداندىق پارتيا كوميتەتىنىڭ حاتشىسى قىزمەتتەرىن اتقاردى. 1988 جىلى اۋداندىق اتقارۋ كوميتەتىنىڭ توراعاسى, 1992-1997 جىلدارى اۋدان اكىمى بولىپ سايلاندى. سول تۇستا رەسپۋبليكامىزدا العاش سايلانعان ايەل اكىم بولدى. بۇل كەزەڭ بۇرىنعى وداق تاراپ, كەڭشارلار جويىلىپ, نە ىستەۋ كەرەكتىگىن باجايلاي الماي تۇرعان ءولىارا شاقتا ا. بوجانوۆا بار كۇش-جىگەرىن جۇمساپ, اۋداندى تىعىرىقتان الىپ شىقتى.
ۇيقىسىز تۇندەر, دامىل تاپپاعان كۇندەرى ءوز جەمىسىن بەردى. تەرەڭوزەك اۋدانىنىڭ ەكونوميكاسى, مادەنيەتى مەن ءبىلىمى, ونەرى دامىدى, حالىقتىڭ ءال-اۋقاتى ارتتى. وسىنداي جەتىستىكتەردىڭ باسىندا الماگۇل بوجانوۆا تۇردى.1999 جىلى قىزىلوردا وبلىسى ءماسليحاتىنىڭ حاتشىسى, «نۇر وتان» پارتياسى فيليالىنىڭ باسشىسى سياقتى قىزمەتتەردى ويداعىداي اتقارىپ, ولاردىڭ جۇمىسىن جاڭا دەڭگەيگە كوتەرە ءبىلدى. جاسىنان ق.قازانتاەۆ, ە.كوشەرباەۆ, ن.ەرگەشباەۆ سىندى ايتۋلى ازاماتتاردان ۇلگى-ونەگە العان ا.بوجانوۆا ەسەلى ەڭبەگىنىڭ ناتيجەسىندە ەلگە سىيلى بولدى. ونى كوزىمىز كوردى.
1973 جىلى «قۇرمەت بەلگىسى» وردەنىمەن, ەل تاۋەلسىزدىگى جىلدارىندا قازاقستان رەسپۋبليكاسى پرەزيدەنتىنىڭ جارلىعىمەن «قۇرمەت», «پاراسات» وردەندەرىمەن قاتار, ونداعان مەدالمەن ماراپاتتالعان, سىرداريا اۋدانى مەن قىزىلوردا وبلىسىنىڭ قۇرمەتتى ازاماتى اتانعان ەدى. كەيىنگى جىلدارى «ۇرپاقتان-ۇرپاققا» قوعامدىق بىرلەستىگىن اشىپ, جاس ۇرپاقتى تاربيەلەدى. ءارتۇرلى تاقىرىپتا بىرقاتار تانىمدىق كىتاپ جازدى.
ا.بوجانوۆا اۋداندىق, وبلىستىق كەڭەستەردىڭ دەپۋتاتى, پارتيا ورگاندارىنىڭ مۇشەسى بولىپ سايلاندى. الەكەڭ رۋحاني, مادەني ىستەرگە وتە ءمان بەرەتىن جانە زيالى قاۋىم وكىلدەرىنە اسقان قۇرمەتپەن قارايتىن. ءا.تاجىباەۆ, ءا.نۇرپەيىسوۆ, ق.مۇحامەدجانوۆ, ءا.جۇماباەۆ, ءا.ءجامىشوۆ, ش.مۇرتازا, ف.وڭعارسىنوۆا, ك.احمەتوۆا, يران-عايىپ جانە باسقا اقىن-جازۋشىلارمەن تىعىز بايلانىستا بولدى. الماگۇلگە اقىندار ولەڭدەرىن, جازۋشىلار اق تىلەكتەرىن ارنادى.
«جازمىشتان وزمىش جوق», ەمەندەي بەرىك, قاجىماس قايرات يەسى بولعان سىر ەلىنىڭ بايتەرەگى قۇلادى. الايدا ا.بوجانوۆانىڭ سىر حالقىنا سىڭىرگەن ەڭبەگى ۇمىتىلماق ەمەس. ويتكەنى ول جاساعان يگىلىكتى ىستەردىڭ ءىزى بار دەمەكپىز.
قوش بول, جاتقان جەرىڭ جاننات بولعاي. سىر ەلى ءسىزدى ۇمىتپايدى.