قازاقستان پرەزيدەنتى قاسىم-جومارت توقاەۆ تۇرىكمەنستان حالك ماسلاحاتىنىڭ توراعاسى گۋربانگۋلى بەردىمۇحامەدوۆپەن كەزدەسۋ وتكىزدى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
قاسىم-جومارت توقاەۆ گۋربانگۋلى بەردىمۇحامەدوۆكە تۇرىكمەن حالقىنىڭ كوشباسشىسى رەتىندە شانحاي ىنتىماقتاستىق ۇيىمىنىڭ سامميتىنە قاتىسقانى ءۇشىن ريزاشىلىعىن ءبىلدىردى.
پرەزيدەنت قازاق-تۇرىكمەن ىنتىماقتاستىعى جوعارى قارقىنمەن دامىپ كەلە جاتقانىن اتاپ ءوتتى.
«تۇرىكمەنستان – بەيبىتشىلىكتى, قاۋىپسىزدىكتى, كوپجاقتى ىنتىماقتاستىقتى قامتاماسىز ەتۋ تۇرعىسىنان ماڭىزدى ءرول اتقاراتىن وتە بەدەلدى ءارى بەيتاراپ مەملەكەت. بۇگىنگى استاناعا ساپارىڭىزدىڭ ماڭىزى ايرىقشا. ەڭ الدىمەن, ەنەرگەتيكا سالاسىنداعى ىقپالداستىعىمىزدىڭ ناقتى ماسەلەلەرىن تالقىلاۋ تۇرعىسىنان ءمانى زور», دەدى مەملەكەت باسشىسى.
قاسىم-جومارت توقاەۆ قازاق مادەنيەتىنىڭ دارىپتەلۋىنە قولداۋ كورسەتىپ, اشحابادتا ۇلى كۇيشى قۇرمانعازى ساعىرباي ۇلىنا ەسكەرتكىش اشقانى ءۇشىن گۋربانگۋلى بەردىمۇحامەدوۆكە العىس ايتتى.
ءوز كەزەگىندە گۋربانگۋلى بەردىمۇحامەدوۆ شىۇ سامميتىنە قاتىسۋعا شاقىرعانى جانە قازاقستان استاناسىندا تۇرىكمەن اقىنى ماقتىمق ۇلى پىراعى ەسكەرتكىشىنىڭ اشىلۋىنا جەكە قولداۋ كورسەتكەنى ءۇشىن قاسىم-جومارت توقاەۆقا العىس ايتتى.
«شانحاي ىنتىماقتاستىق ۇيىمىنىڭ سامميتىنە قۇرمەتتى قوناق رەتىندە شاقىرعانىڭىز ءۇشىن ريزاشىلىعىمىزدى بىلدىرەمىز. وسى حالىقارالىق قۇرىلىمدا بەيتاراپ تۇرىكمەنستاننىڭ پىكىرىن ايتۋ مۇمكىندىگىنە يە بولدىق. ءوزىڭىز اتاپ وتكەندەي, ەنەرگەتيكا سالاسىنداعى ماسەلەلەردى شەشۋ ىسىندە مول الەۋەتىمىز بار», دەدى حالك ماسلاحاتىنىڭ توراعاسى.
سونداي-اق كەزدەسۋدە ونەركاسىپ, كولىك جانە لوگيستيكا سالالارىنداعى ەكىجاقتى ىنتىماقتاستىقتىڭ قازىرگى جاي-كۇيى مەن پەرسپەكتيۆالارى قاراستىرىلدى.