سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ يراننىڭ ەنەرگەتيكا ءمينيسترى ءالي اكبار مەحرابيانمەن كەزدەستى. تاراپتار جاڭا گيدروتەحنيكالىق نىسانداردىڭ قۇرىلىسىن جانە سۋارمالى سۋ شىعىنىن ازايتۋ ماسەلەسىن تالقىلادى, دەپ حابارلايدى Egemen.kz اتالعان ۆەدومستۆونىڭ ءباسپاسوز قىزمەتىنە سىلتەمە جاساپ.
ءالي اكبار مەحرابيان يراندىق كومپانيالار ورتالىق ازيادا, اتاپ ايتقاندا, قازاقستاندا الەمدەگى ەڭ ءىرى بوگەتتەردىڭ ءبىرى سانالاتىن – «باحتياري» گەس-كە ۇقساس اۋقىمدى جوبالاردى ىسكە اسىرۋعا نيەتتى ەكەنىن جەتكىزدى. سونداي-اق مينيستر يران سۋارمالى سۋدى تاسىمالداۋدىڭ زاماناۋي تەحنولوگيالارىن ۇسىنۋعا دايىن ەكەنىن جانە بۇل بۋلانۋ سەبەبىنەن بولاتىن شىعىنداردى ەداۋىر ازايتۋعا مۇمكىندىك بەرەتىنىن مالىمدەدى.
نۇرجان نۇرجىگىتوۆ ءوز كەزەگىندە مۇنداي جوبالار قازاقستاننىڭ وڭتۇستىك وڭىرلەرى – جامبىل, قىزىلوردا جانە تۇركىستان وبلىستارى ءۇشىن قاجەت ەكەنىن اتاپ ءوتتى. وسى ورايدا مينيستر يراندىق كومپانيالاردى كەلىسسوزدەر جۇرگىزۋ ءۇشىن قازاقستانعا شاقىردى.
«بيىلعى سۋ تاسقىنى ەرىگەن قار سۋىن قاۋىپسىز وتكىزۋ جانە ودان ءارى ءتيىمدى پايدالانۋ ءۇشىن جاڭا سۋ قويمالارى قاجەت ەكەنىن كورسەتتى. يراندىق كومپانيالار وتە تابىستى جوبالاردى جۇزەگە اسىرىپ جاتىر. ولاردىڭ جۇمىسىنىڭ تيىمدىلىگىن كورگەندىكتەن يراندىق ارىپتەستەرىمىزبەن تىعىز جانە ۇزاق مەرزىمدى ىنتىماقتاستىققا دايىنبىز», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.