اتىراۋ ويىن-ساۋىق ساياباعىندا اتتراكتسيون ءۇزىلىپ, سالدارىنان بەس بالا زارداپ شەكتى, دەپ حابارلايدى Egemen.kz Azh.kz سايتىنا سىلتەمە جاساپ.
وقيعا 2 شىلدە كۇنى كەشكە «كەرەمەت» ساياباعىندا بولعان. الەۋمەتتىك جەلىدە پايدا بولعان كادرلاردا «فورساج» اتتراكتسيونى قۇلاپ, ادامداردى باسىپ قالعان.
اتىراۋ وبلىستىق دەنساۋلىق ساقتاۋ باسقارماسىنىڭ مالىمەتىنشە بەس بالا وبلىستىق اۋرۋحاناعا جەتكىزىلگەن. مەديتسينالىق كومەك كورسەتىلگەننەن كەيىن تورتەۋى ۇيلەرىنە جىبەرىلىپ, ءبىر بالا اۋرۋحانادا قالعان.
«اتالعان فاكتى بويىنشا قىلمىستىق كودەكستىڭ 306-بابىنىڭ 2-بولىگى («قاۋىپسىزدىك تالاپتارىنا ساي كەلمەيتىن تاۋارلاردى شىعارۋ نەمەسە وتكىزۋ, جۇمىستاردى ورىنداۋ نەمەسە قىزمەتتەردى كورسەتۋ») بويىنشا قىلمىستىق ءىس قوزعالدى», دەپ حابارلادى اتىراۋ وبلىستىق پوليتسيا دەپارتامەنتى.
Azh.kz سايتىنىڭ مالىمەتىنشە ساياباق اكىمشىلىگى ازىرگە جاعدايعا قاتىستى پىكىر بىلدىرمەگەن.
ايتا كەتەيىك, وسىدان ەكى جىل بۇرىن اتىراۋدا اتكەنشەك ءۇزىلىپ, بالالار قۇلاپ قالعان ەدى.