كەزدەسۋ بارىسىندا قاسىم-جومارت توقاەۆ شىۇ سامميتىنە ارنايى قاتىسقانى جانە استانانىڭ باستامالارى مەن باسىمدىقتارىن تۇراقتى تۇردە قولداپ كەلە جاتقانى ءۇشىن ەمومالي راحمونعا ريزاشىلىعىن ءبىلدىردى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
قازاقستان پرەزيدەنتى ەكىجاقتى ىنتىماقتاستىقتىڭ بارلىق باعىتتا قارقىندى دامىپ كەلە جاتقانىن اتاپ ءوتتى. ونىڭ ايتۋىنشا, قازاقستان مەن تاجىكستان شىن مانىندە وداقتاستىق قاتىناستاردى جولعا قويا ءبىلدى. بۇعان ەمومالي راحموننىڭ سىڭىرگەن ەڭبەگى وراسان.
تاجىكستان پرەزيدەنتى ءوز كەزەگىندە قازاقستاننىڭ شىۇ-داعى توراعالىعى تابىستى وتكەنىن ايتتى. سونداي-اق ەكى ەلدىڭ ساۋدا-ەكونوميكالىق, مادەني گۋمانيتارلىق سالالارداعى جانە قاۋىپسىزدىك باعىتىنداعى ىنتىماقتاستىعى جوسپارلى تۇردە دامىپ كەلە جاتقانىن اتاپ ءوتتى.
سونىمەن قاتار قاسىم-جومارت توقاەۆ پەن ەمومالي راحمون ەكى ەلدىڭ حالىقارالىق ۇيىمدار اياسىنداعى ءوزارا ىقپالداستىعىنىڭ جەكەلەگەن اسپەكتىلەرىن قاراستىردى.