مەملەكەت باسشىسىنىڭ باستاماسىمەن قولعا الىنعان «تازا قازاقستان» جالپىۇلتتىق اكتسياسى اياسىندا تۋعان جەردى اباتتاندىرۋعا اقتوبەلىكتەر بەلسەنە اتسالىسىپ جاتىر, دەپ حابارلايدى Egemen.kz اقتوبە وبلىسى اكىمدىگىنىڭ ءباسپاسوز قىزمەتىنە سىلتەمە جاساپ.
3 شىلدە كۇنى اقتوبە قالاسىنىڭ پوليتسيا دەپارتامەنتى «ەكوپاترۋل» پروفيلاكتيكالىق ءىس-شاراسىن ۇيىمداستىردى. ءىس-شارا بارىسىندا پوليتسيا قىزمەتكەرلەرى اباتتاندىرۋ ەرەجەسىن بۇزۋشىلارعا ەسكەرتۋ جاساپ, ءتارتىپ پەن تازالىقتى ساقتاۋعا شاقىردى. سونداي-اق جاۋاپكەرشىلىك پەن اكىمشىلىك جازالار تۋرالى 200-دەن استام پاراقشا تاراتقان. «ەكوپاترۋل» ءىس-شاراسى ەلىمىزدە ءساۋىر ايىندا باستالعان «تازا قازاقستان» اكتسياسىنا پوليتسيانىڭ زور ۇلەس قوسىپ وتىرعانىن كورسەتتى.
«وتكەن ءۇش ايدىڭ ىشىندە كوپشىلىكتىڭ جۇمىلا جاساعان جۇمىستارىنىڭ ناتيجەسىندە اينالامىز تازارىپ قالدى. اركىم ءوزى جۇرگەن جەردى تازا ۇستاپ, قالانى جايلى ءارى ادەمى ەتۋگە تىرىسىپ جاتىر. بۇگىن اقتوبە سۋ قويماسىنىڭ جاعاسىندا «Jasyl سگوѕѕ 2024» پلوگگينگ-مارافون وتكەن. پلوگگينگ - جۇگىرۋدى قوقىس جيناۋمەن بىرىكتىرەتىن ەكولوگيالىق قوزعالىس. بۇل ءسوز شۆەد تىلىنەن اۋدارعاندا «plocka upp» جانە «jogging» دەگەن ەكى ۇعىمنان تۇرادى», دەپ حابارلادى وبلىس اكىمدىگىنىڭ ءباسپاسوز قىزمەتى.
جاستار ىرعاقتى مۋزىكانىڭ اسەرىمەن سۋ قويماسى جاعالاۋىنداعى شاشىلعان قوقىستى تەز جيناپ تاستاعان. جىگىتتەر قوقىس سالۋعا ارنالعان قاپشىقتارىن تەزىرەك تولتىرۋعا تىرىسقان, ويتكەنى مارافوندا كىم جىلدام, كىم كوبىرەك جينايدى, سول جەڭىسكە جەتەدى دەگەن ۇعىم بولعان.
كوپتىڭ جۇمىلىپ جۇمىس ىستەۋىنىڭ ناتيجەسىندە 18 توننا قوقىس جينالدى. قاعازدار, پلاستيكالىق, شىنى بوتەلكەلەر, پاكەتتەر — قوقىستار جاستار جيناپ العانشا جەلمەن بىرگە ۇشىپ, شاشىلىپ, جاعالاۋدىڭ ءسانىن كەتىرىپ تۇر ەدى. ءاپ-ساتتە اينالا جايناپ شىعا كەلدى — جاعالاۋ تازارىپ, ءسانى كىرىپ قالعان.
ايتا كەتەيىك, بۇل «تازا قازاقستان» اكتسياسى اياسىندا ۇيىمداستىرىلعان ءبىرىنشى جانە سوڭعى ءىس-شارا ەمەس.
اقتوبەلىكتەر مەملەكەت باسشىسىنىڭ ەلىمىزدە تازالىق جۇمىستارى مەن سەنبىلىك وتكىزۋگە قاتىستى ۇسىنىسىن زور ىقىلاسپەن قابىلدادى.
ساندىق مالىمەتتەرگە سۇيەنسەك, 6 ساۋىردەن باستاپ وبلىس بويىنشا كوگالداندىرۋ, سانيتارلىق تازالىق جانە ەلدى مەكەندەردى اباتتاندىرۋ بويىنشا ەكى ايلىق اكتسيا ۇيىمداستىرىلعان.
«تازا قازاقستان» اكتسياسىنا 213 954 تۇرعىن قاتىسىپ, 5 993 مەكەمە مەن كاسىپورىن جۇمىلدىرىلدى. 18 982 اۋلا تازارتىلدى, ونىڭ 2 326-سى - كوپقاباتتى ۇيلەرگە, 16 656-سى - جەكە ۇيلەرگە تيەسىلى. ەرىكتىلەر ەڭبەك ارداگەرلەرىنىڭ, قارتتار ۇيلەرىنىڭ اۋلالارىن رەتكە كەلتىردى.
276 ساياباق پەن گۇلزاردىڭ قوقىسى جينالدى. قالا مەن ەلدى مەكەندەردە 285 910 اعاش پەن 6 350 كوشەت ەگىلدى. كوگالداندىرۋعا «جاسىل ەل» ەڭبەك جاساعىنىڭ جاستارى دا بەلسەنە ارالاستى.
ءۇش اي ىشىندە بارلىعى 205 سۋ ايدىنىنىڭ جاعالاۋى (وزەندەر, كولدەر, بۇلاقتار) قوقىستان تازارتىلدى. 41 جاساندى سۋ قويماسى مەن سۋبۇرقاقتاردىڭ اينالاسى, 84 526 مەتر ارىق تازارتىلدى. بۇلاقتاردىڭ اينالاسى تازارتىلىپ, قورشاۋلار مەن ورىندىقتار سىرلانىپ, اعاشتار اكتەلگەن.
256 تاريحي-مادەني ەسكەرتكىشتىڭ اينالاسى تازارتىلعان.
الاڭداردى تازالاۋعا 2 866 بىرلىك تەحنيكا جۇمىلدىرىلدى. قوقىس پوليگوندارىنا 30 905 توننا قالدىق شىعارىلعان.