كۇنى كەشە گلۋبوكوە كەنتىندە «بىرقاباتتى شىعىس» باعدارلاماسى اياسىندا 12 وتباسىنا جاڭا تۇرعىن ۇيلەردىڭ كىلتىن تابىستاۋ سالتاناتى ءوتتى. گلۋبوكوە اۋدانىندا 2020 جىلدان باستاپ جاڭا ۇيلەردىڭ قۇرىلىسى ءجۇرىپ جاتىر.
قازىردىڭ وزىندە 44 قوسپاتەرلى 88 تۇرعىن ءۇي كوپبالالى جانە از قامتىلعان وتباسىلارعا بەرىلدى.– كوپتەن كۇتكەن باسپانامىزعا قول جەتكىزدىك. 2015 جىلدان بەرى ءۇي كەزەگىندە تۇردىم. بۇگىن اق تۇيەنىڭ قارنى جارىلىپ, قۋانىشىمىزدا شەك جوق. ءتورت بالانىڭ اناسىمىن. مەملەكەتتەن كوپبالالى وتباسىلارعا ۇلكەن قولداۋ كورسەتىلىپ جاتىر. سوندىقتان جەرگىلىكتى اكىمدىككە ەرەكشە العىسىمدى ايتقىم كەلەدى, – دەپ ىستىق لەبىزىن ءبىلدىردى اباي شاعىن اۋدانىنىڭ تۇرعىنى ايگەرىم نامازباەۆا.
ايتا كەتەيىك, بىلتىر وسى جوبا اياسىندا 20 ءۇي سالىنعان. ونىڭ ىشىندە جەتى ءۇي گلۋبوكوە اۋدانىنا قاراستى بەلوۋسوۆكا, بوبروۆكا, ۆەسەلوۆكا, پراپورششيكوۆو جانە چەرەمشانكا اۋىلدارىنداعى كوپبالالى وتباسىلارعا تابىس ەتىلگەن. بۇل ۇيلەردىڭ ارقايسىسىندا شارۋاشىلىق جۇرگىزۋگە ارنالعان 20 گەكتار جەر ۋچاسكەسى بار ەكەنىن دە ەسكە سالا كەتكەنىمىز ءجون. ەڭ باستىسى, بەرىلگەن جەرگە ءدان ەگىپ, بولماسا ءشوبىن شاۋىپ, تابيعات ىرىزدىعىن دەر كەزىندە پايدالانا بىلسە, بولعانى. باسپانادان بولەك جەردىڭ بەرىلۋى دە ۇلكەن كومەك.
– گلۋبوكوە اۋدىنىندا وبلىس اكىمدىگىنىڭ باستاماسىمەن «بىرقاباتتى شىعىس» باعدارلاماسى دامىپ كەلەدى. بۇل ۇيلەر اۋدان اكىمى, اۋداندىق ءماسليحات دەپۋتاتتارى مەن قوعامدىق كەڭەس مۇشەلەرى جانە «Amanat» پارتياسىنىڭ قاتاڭ باقىلاۋىندا. ءۇيدىڭ ساپالى بولۋى ماڭىزدى. سونىمەن قاتار اۋداندا اباتتاندىرۋ جۇمىستارى قولعا الىنعان. قازىردىڭ وزىندە جارىقتاندىرۋ جۇمىسى جۇرگىزىلىپ, بالالار الاڭى سالىنعان. جاقىندا اسفالت توسەلەدى, – دەدى گلۋبوكوە اۋداندىق ءماسليحاتىنىڭ توراعاسى التاي قاليعوجين.
«بىرقاباتتى شىعىس» مەملەكەتتىك تۇرعىن ءۇي باعدارلاماسىنىڭ تەتىگى وتە ىڭعايلى. مەردىگەر ءوز قاراجاتىنا باسپانا سالىپ, مەملەكەتكە ۇسىنادى. بارلىق تەكسەرۋدەن وتكەن سوڭ مەملەكەت قاراجات ءبولىپ, باسپانالاردى ساتىپ الادى. كەيىننەن كەزەكتە تۇرعان ازاماتتار جەرگىلىكتى اتقارۋشى ورگاندار ارقىلى ۇيلەرگە يە بولادى. دەمەك ۇيلەردىڭ ساپالى بولۋى ەڭ اۋەلى قۇرىلىسشىنىڭ قىزىعۋشىلىعىندا.
– ءۇي اۋماعى – 85ح65 شارشى مەتر. گاز بلوكتان سالىنعان. بارلىق جاعداي جاسالعان. تەرەزەلەر پلاستيكتەن, جەرگە لينولەۋم توسەلگەن. ءۇيدىڭ ىشىندە اقىلدى پەش ورناتىلعان. قونىستانىپ جاتقان تۇرعىندارعا اماندىق تىلەيمىن, – دەپ ءوز تىلەگىن جەتكىزدى كتب قۇرىلىس كومپانياسىنىڭ ديرەكتورى تىلەك قوڭىروۆ.
سالتاناتتى ءىس-شارادا باسپانا كىلتىنە يە بولعان ازاماتتار ءبىر-بىرىنە قۇتتى بولسىن ايتىسىپ, جاڭا قونىسقا كوشۋ قامىنا كىرىسپەك.
شىعىس قازاقستان وبلىسى,گلۋبوكوە اۋدانى