8–14 قىركۇيەكتە استانا قالاسىندا وتەتىن اسا ءىرى سپورتتىق سايىس V دۇنيەجۇزىلىك كوشپەلىلەر وينى. قازىرگى تاڭدا ءدۇبىرلى دوداعا دايىندىق قىزۋ ءجۇرىپ جاتىر. بايراقتى باسەكە ۇلتتىق سپورت پەن سالاماتتى ءومىر سالتىن دارىپتەۋ جاعىنان دا, ۇلى دالاداعى كوشپەلىلەر وركەنيەتىنىڭ مۇراگەرى سانالاتىن باۋىرلاس حالىقتاردىڭ مادەني-گۋمانيتارلىق بايلانىسىن ارتتىرۋ تۇرعىسىنان دا قاجەتتى ەكەنى ءسوزسىز.
وسى ورايدا ەسكەرەرلىك جايت, كوكتەمگى اۋقىمدى سۋ تاسقىنىنا بايلانىستى مەملەكەت باسشىسىنىڭ تاپسىرماسىمەن كوشپەلىلەر ويىندارىن ۇيىمداستىرۋعا جۇمسالاتىن شىعىن قىسقاردى. اتاپ ايتقاندا, ويىندار باعدارلاماسىنا بىرقاتار وزگەرىس ەنگىزىلدى. مىسالى, كورەي حالقىنىڭ ۇلتتىق كۇرەسى «سسيرىم» سپورتتىق باعدارلامادان الىندى. سونىمەن قاتار بىرنەشە سپورت ءتۇرى بويىنشا سالماق كاتەگوريالارى قىسقارىپ, سپورتتىڭ 10 ءتۇرىن قامتىعان ارنايى قويىلىمدار تولىعىمەن الىنىپ تاستالدى. دەسەك تە, قىرعىزستان مەن تاتارستان رەسپۋبليكالارى باسشىلارىنىڭ وتىنىشىمەن ويىن باعدارلاماسىنا «كوك ءبورى» جانە «كوراش» سايىس ءتۇرى جاڭادان ەنگىزىلدى.
تۋريزم جانە سپورت ۆيتسە-ءمينيسترى سەرىك جاراسباەۆ: «باستاپقى بيۋدجەتتەن 1,7 ملرد تەڭگە ۇنەمدەدىك. سونىمەن قاتار ءدۇبىرلى دودانى جوعارى دەڭگەيدە وتكىزۋ ءۇشىن دەمەۋشى رەتىندە وتاندىق جانە شەتەلدىك كومپانيالاردى تارتۋ ءىسى بەلسەندى جۇرگىزىلىپ جاتىر» دەسە, V دۇنيەجۇزىلىك كوشپەلىلەر ويىندارىن دايىنداۋ جانە وتكىزۋ ديرەكتسياسىنىڭ باسشىسى نايل نۇروۆ: «الداعى قىركۇيەك ايىندا استانا قالاسىندا وتەتىن دۇنيەجۇزىلىك كوشپەلىلەر تويىنىڭ باس دەمەۋشىسى – «قازاقستان حالىق بانكى» اق مەن «ALAGEUM ELECTRIC» ەلەكترتەحنيكا كومپانياسى. وسى دەمەۋشىلەر تاراپىنان بولىنەتىن قارجى 253 250 002 تەڭگەنى قۇراپ وتىر. بۇل قاراجات جارىس جەڭىمپازدارى مەن جۇلدەگەرلەرىنە اقشالاي سىيلىق رەتىندە ۇلەستىرۋگە, ويىنعا قاتىسۋشىلاردىڭ اۋە بيلەتتەرىنە, ماراپاتتاۋ سالتاناتى وتكىزىلەتىن الاڭداردى دايىنداۋعا, ەستەلىك مەدالدار مەن سەرتيفيكاتتار ازىرلەۋگە جۇمسالادى», دەدى.
ءدۇبىرلى دوداعا قاتىسۋشى مەملەكەتتەرگە توقتالار بولساق, ءدال قازىر الەمنىڭ 90 ەلى ىقىلاس تانىتىپ وتىر. وسىلاردىڭ اراسىندا برۋنەي – دارۋسسالام, ليبەريا, ۆەنەسۋەلا, يرلانديا, دومينيكان رەسپۋبليكاسى, گامبيا قاتارلى ەلدەر كوشپەلىلەر وينىنا العاش رەت قاتىسپاقشى.
جارىستىڭ باسىم كوپشىلىگى «الاۋ» مۇز سارايى, «استانا ارەنا» ستاديونى جانە «قازانات» يپپودرومىندا وتەدى. بۇل نىساندارعا كۇردەلى جوندەۋ جۇرگىزىلىپ جاتىر. بۇيىرسا الداعى 15 تامىزدا اياقتالۋعا ءتيىس.
ۇلتتىق سپورت تۇرلەرى قاۋىمداستىعىنىڭ ۆيتسە-پرەزيدەنتى تاستانبەك ەسەنتاەۆتىڭ مالىمەتىنە ۇڭىلسەك, دۇنيەجۇزىلىك كوشپەلىلەر ويىندارى كەزىندە الاڭدا 370 تورەشى 21 سپورت ءتۇرى بويىنشا تورەشىلىك قىزمەت اتقارادى. سونداي-اق وسى جارىسقا قاتىساتىن ەلىمىز قۇراماسى مەن سپورتتىق جىلقىلاردىڭ فۋنكتسيونالدىق جانە پسيحولوگيالىق جاعدايىن باقىلاۋ ءۇشىن ۆەتەرينار, بيولوگ, گەنەتيك, سپورتتىق پسيحولوگيا جانە مەديتسينا ماماندارىنىڭ جەتەكشى عالىمدارىنان قۇرالعان ەكى توپ جۇمىس جاساپ جاتىر.
كوشپەلىلەر ويىندارىنا قاتىساتىن ەلىمىزدىڭ ۇلتتىق قۇراماسىن جاساقتاۋ ءىسى «ۇلتتىق جانە ات سپورتى تۇرلەرى ورتالىعى» مەكەمەسىنە جۇكتەلدى.
ءدۇبىرلى دودانىڭ نەگىزگى باعىتىنىڭ ءبىرى – مادەني ءىس-شارالار. بۇل باعىتتا ۇيىمداستىرىلاتىن مادەني وقيعالار تۋرالى دۇنيەجۇزىلىك كوشپەلىلەر ويىندارىن دايىنداۋ جانە وتكىزۋ ديرەكتسياسى باسشىسىنىڭ ورىنباسارى مۇراتبەك قىپشاقباەۆتان سۇراپ بىلدىك.
«مادەني باعدارلاما سپورتتىق باعدارلامادان كەم تۇسپەيدى. مادەني باعدارلاما اياسىندا: «بىرلىك كەرۋەنى» جانە «ەتنواۋىل: كوشپەلىلەر الەمى» جوباسى جۇزەگە اسىرىلادى. «بىرلىك كەرۋەنى» جوباسى بۇكىل ەلىمىزدى قامتيدى. جوبانىڭ يدەياسى – ەل ازاماتتارىن دۇنيەجۇزىلىك كوشپەلىلەر وينىنا تارتۋ. «بىرلىك كەرۋەنى» جوباسى اياسىندا وڭىرلەردەن 3 كيىز ءۇي اكەلىنىپ, ولار «كوشپەلىلەر عالامى» ەتنواۋلىنا ورناتىلادى. وتاندىق جانە شەتەلدىك ەتنوستىق توپتار اراسىنان ەتنواۋىلدىڭ مادەني باعدارلاماسى قالىپتاساتىن بولادى. بۇلاردان باسقا «تاريح جانە مادەنيەت», «سپورت», «ورتالىق ازيا كوشپەلىلەرىنىڭ تاماقتانۋى» اتتى ءۇش سەكتسيادان تۇراتىن «كوشپەلىلەر: تاريح, ءبىلىم, تاعىلىم» اتتى حالىقارالىق عىلىمي كونفەرەنتسيا وتەدى. بۇل باسقوسۋ بارىسىندا كورەيا, سلوۆاكيا, شۆەيتساريا, موڭعوليا, مالايزيا, اقش عالىمدارى بايانداما جاساۋعا ءوتىنىش بەردى», دەدى مۇراتبەك سۇلتانبەك ۇلى.